Cabakkuk 3 - NABUWWA KEE MALIKWA

NABI CABAKKUK ABE DOOQA

¹ Nabi Cabakkuk abe dooqa ah teeti.

² YALLAW, duma abtem kok oobbeh. Migaq gexxo le Dagelta kinnitom, YALLAW, aaxigeh. YALLAW, kok abto digga haa; duma-abtem cubbusa waqdi, qagabsitah, qagab axce. Kaxxa abittoy dumah abte, ni dabaanal kaadu qagis. Isi qande nee uybulluyaay isi bagcarrak nee cataay, isi racmatta nel oobis.

³ Ni Dagelti akak yamaatem, Edom kabuuy, Edom rasu. Ni Dagelti akak yamaatem, Faaran migaq le koomaami. Taahirik yan Dagelti kaa. Kay nabna qaranwa gufteh. Kay fayla baaxo timlikeh.

⁴ Tonnal yamaate waqdiina cankaxi innah ifak yanih. Noori Yallih gabak yawqe. Isi qande qellut tanim, too gabay noori akak yawqe.

⁵ Sahda digaalam faxa way, dalka isik naharat ruuba. Balak, «Yoo kataata» iyya way, bala too way kaa katatta.

⁶ Kay soolol baaxo tangayye. Inkih tan ummat kee ayyunti, kay wagittol axaxita. Addigille wayta qale kay wagittot riira takke. Dumî-dabaanal, xer saaku, usuk edde gexe gital sugte koomaami sutta inteh.

⁷ Kusaanah yooboke mari, kaak cunxitah innih uble; Miidiyan-mari isi qarwal, kaak cunxitak axaxitah, anu inni namma intih uble.

⁸ YALLAW, nasri geysissa'gid farasah qambur luk sugte. Macâ sabbatah tinqibeh? Weeqaytu faxe waak sugtee? Badak waagissem luk sugtee?

⁹ Gaysê-baxa qalaamissuh, sibak addak bukka hayte. Gaysê-baxa qalaamisseh; baaxo gudeek faqaaqisse, leey racta akak teyyeeqe.

¹⁰ Qaleeli koo yuble waqdi, kok cunxiteeh, axaxiteh. Qaraanak kaxxa rob radeh; baaxol sugga 'tem duufut bee. Baaxok guba tan lee muxxe; weeqi kaxxa haffo baahe.

¹¹ Ato lito gaysê-baxay habug iyyaah liliq iyya, qalaamisseeh qidde waqdi, qaran bagul alsa solteh, ayro kinnih edde solte. Ku macaxuy habug iyyah, ayro solteeh, alsa teede.

¹² Tenneeqebbeeh, bagcarritteh. Ku naqabu kee bagcarra inkih tan baaxo gufteh tan. Ku naqabu kee bagcarrat baadal yan marat taqqa 'te.

¹³ Akah temeetem, Dageltaw, isi-ummatay dumaak doorte catta'gidiiy wadda'gidi. Umeenitik abbah yen num bayisseeh, taqqa kaat inte. Kay qaskar kaa'lih finqisse.

¹⁴ Qaskarak abbah suge num, isi macaxut bayisse. Caacoh innah net yemeeten; kaxxam farcitak yemeeten; nee fixiixisaanam faxen. Boola akak dareemen marat, xukkutaanam faxak sugen.

¹⁵ Ku faariisa badal gexxek, bad qaafitaah, haffo baaha.

¹⁶ Tah oobbe way yi Dageltaw, axaxiteeh, kumkummateh. Sokaati yok axaxitteh; ibi yok kadiidimiteh; ariiqo yok axaxitteh. Nel umaane baaha mara, neh digaalla haytam fanah, asbireyyooh, qambaaleyyo.

¹⁷ Subul xaylo xale waamah, qinab xaylo xale waamah, *daytuun xaylo xale waamah, daro neh orbe waytaamah, illik loyni yambaxeemih, wadar kaadu tambaxeemih, laahi buxah orbe waamah,

¹⁸ taham inkih net takke way, YALLI yoo catam aaxaguk, ruffu axceeh, kaxxam tassa axce. Yi Dagelta assakooteyyo.

¹⁹ YALLAY Mulki lek qande gee; iba yok cayla bahsiise. Yi-iba maqarah sara abe. Qale awqeeh, qalek oobaamah, iba maqar yok bahsisse. [Aham, Yallih Qibaadah-Qarih addal saare aba marak abbah yen numuh yuktuben saare. A saare aban waqdi *kirar gurral yan caxxal digirak aba.]