Cabakkuk 2 - NABUWWA KEE MALIKWA

¹ Sarrak kaadu iyyeemih, «Ahaysa magaalat maroh tan gasoh amol dacayrih yan qaskariitih innah, gacca exceh YALLI yok iyyam aabbu waah, kaa essereemik yol gacsam kaak qambaalu waa» iyye.

YALLI CABAKKUKUL GACSE RADDI

² Sarrak YALLI yok iyyeemih, «Allaak akah tankirriye innah, anu koh warisu waam luucul meqe innah uktub.

³ Away koh warisu waam edde takku wayta ayro uxih taniimih sabbatah, uktubay sug. Takkay immay maxeeriiy, too ayro xayuk amaatele. Anu koo ayballayu waam nummah akkele. Raagelem akkaletto'mmay takkem fanah qambaalay sug. Udurra mabtaay, akkele» iyye.

⁴ Qagseh iyyeemih, «Farmo ah teetik, uktub. ‹Kaxxiina-leela wagitay, kaxxiina ken roocit aamele. Meqe marah tu gactek, imaanat waarelon› » 'yaanam iyye.

UMA MARAT TAKKU WAYTA BAATI

⁵ Gaddaliino sahda aylahissa. Diiko rabak akah cayye wayta innah, kaxxiina-leela kaxxiinak macaytaay; geenimit mayaseehedan. Kulli baaxot qeebi akah abaanaah, baaxooxa akah yabbixeenim, tohih sabbata.

⁶ A saaku qeebil akak yeysen mari keenil anqaasak maaciseloonuuh, ken bursutelon. «Garaqtan duyye gaaboysaah, marak bukkuse duyyet gaddalite maraw, woyyow siinit takku waytaamow!» keenik axcelon. «Garqiino abaah, mago bee marak dulmil mago gacsa maraw, aham fan gaddalitteenih. Annal hay, magid fan sugtoonu waytaanah tanin!» keenik axcelon.

⁷ Mago akak beyten mari cube'kal guutuh sin gorriselon. Too mari siinit yamaatu waa waqdi gilic siinit heele. Litoonum siinik buubelon.

⁸ Mango baaxoh mara buubteeniih, mango baaxoh mara qidden. A saaku too marak saaboh raaqe mari sin buubele. Tah siinit akah takku waytam, sahdat abak sugten qidim kee baadal enna 'ya mara kee baadal enna 'ta magaaloolit abak sugten dirki kee umaaneh sabbata.

⁹ Woyyow siinit takku waytaamow! Dirkih sahdak beyten duyyet gaddalitak sugten. Dabaaqat tu siinik takkeemik dacayri takke'gidih, kaxxa qarwa megdeb innal bicissen.

¹⁰ Abba haak sugten umaane, sin kee sin buxah marah qaybi xalele. Mango baaxo bayisseenih, finqa siinih xalele.

¹¹ Sin qarwal tan xeetik bicsen gidaarwa kinni way xongolteh innah siinit gacele; cooxuk bicsen qamidwah deero qalê-berri gurral siinil raddah innah siinit gacele.

¹² Sahdak caxxan qabala kee abtan uma-taamat magaala xisa maraw, woyyow siinit takku waytaamow!

¹³ Sinam foyyah taqabta. Oson abba heenim inkih girâ-gadda takke. Ah absissem, YALLAY Nabaamak Nabahiyya.

¹⁴ Bad kibuk akah yan innah, baaxol yan mara kaadu YALLIH nabnah ixxiga duudele.

¹⁵ Sin naqbi kamri inna le. Cuggaaneh siinik tan baaxooxah marah, kamri taceen. Qaybik radak qasunuk qawrat keenik yambullee'gidih kamrit ken taskirisen. Woyyow siinit takku waytaamow!

¹⁶ Migaq elle luk sugten baaxol qaybi sin abbixele. Isin kaadu kamrit iskirra 'teenih qawrat siinik ambulleele. YALLAK migdi gabat tan digaalah kobbaayak aaqubetton. Too waqdi, a saaku liton migaq-gexxoh aftok qaybi sin abbixele.

¹⁷ Lubnaan rasul sugte garbo tirgiqeenih immay a saaku sin argiqelon. Too garbol sugte alluwwa qiddeenimih sabbatah, a saaku alluwwa sin meysiisele. Tah inkih siinit akah takku waytam, sahdat abak sugten qidim kee baadal enna 'ya mara kee baadal enna 'ta magaaloolit abak sugten dirki kee umaaneh sabbata.

¹⁸ A xeet kee cooxuy taqbudeeni maca siinih xiqtaah? Tet le marah mannah tanim xiqta? Ah sahdayti isi gabak bicseemi'kkal tu siinih xiqtam hinnaay, deedalak sa akak geytaanam manton. Yaqbuden duyye bicse mari, isi gabat bicseemiy afak yaabe waytahiyyal yaamineh!

¹⁹ Woyyow siinit takku waytaamow! Caxxa kee xaay gabak orra heenih bicseenihiyyak «Xiinik uguta» intan. Ta xeet kee coox siinih warsa sirri maay le? Siinih tu warsam hinna'mmay xeet kee coox isih rooci mali. Bagul dahab kee lakqo akak haytaanah immay tohuh rooci mali.

²⁰ YALLAH tu gactek, elle yanim taahirik yan qariy qaraanal yani. Addunyal enna 'ya mari kay foocal tibbi iyyoonay.