Cabakkuk 1 - NABUWWA KEE MALIKWA

¹ YALLI, nabi Cabakkuk yuybulle wacyi ah kaana.

CABAKKUK «QADAALAT MAYANA» YAANAM IYYE

² Cabakkuk iyyeemih, «YALLAW, a mari nel baaha umaanek macah tibba 'taah, kot aba kallacik macah tibba 'ta? YALLAW, aham magid fan sugtu waytah tan!

³ Edde an gadaamak tibba macah yok inta? Table umaanek abalih tibba mannal inta? Sinam dirkisaanam kee baatiy takkehiyya kulli'kkel able. Qeebi kee qaduwwi baaxo duudeh.

⁴ Tohih sabbatah, xinto boolatteh; qadaalat mayana. Yab gitah mekla mari mayanak, umeynit meqe marak fillat gacte» iyye.

YALLI TOO YAABAL GACSE RADDI AH KAANA

⁵ Tohuk lakal Yalli isi ummatak iyyeemih, «Ama dariifal siinik tan doolatwa wagga haay, tokkel takkem tabloonu waytaanam kaxxa qagab siinil akkele. Taabbeenimih numma siinit ceele waytaamay qagabak tanihiyya isin addunyâ bagul anih abeyyo.

⁶ Macaay inteenik, Baabelon maray racmatta sinniih, geenimit aseehede waahiyyah abbootan aceeyyo. Ta mari baaxooxat qeebi abaana'gidiiy, carbit yabbixeeni'gidih kulli baaxo fan gexelon.

⁷ Sahdat cunxo kee meysi qideloonuuh; sarrak isinnih meqe madqay ken fayya haytahiyya mudelon.

⁸ Ken faaris sissikaaneh kabqik laftele. Satqitte suulak aban cunxok fuli cunxo keenik abelon. Faariisa keenik kaqoh fayxih inki aracal mataseehedaay, xukcunoh baaxo dub heele. Qawi tu bukkusam faxa waqdi sissikuk elle yamaate innal, a mari kaadu xer baaxok marin baaxo yabbixe'gidih, faaris xoxbisak amaatelon.

⁹ Ken qaskar sinam dirkissa'gid kee mango baaxo qandet tabbixe'gidih amaatele. Ken yabalu waa mari wariggitele. Oson seewah been mari mangah ballaaqê gide akkele.

¹⁰ Ta mari, malikwa qunxa intit yable mara kinnon. Kaxxa maray doolatat yanihiyyal qangi asalah rabaanah. Faxe gaso haanamah magaala cule ken kalaanam maxiqan. Magaalat maroh tan gasot ballaaqe massossa heenih teetil koreenih, tet abbixelon.

¹¹ Tohih lakal foocat sugga tam duufut beelon. Oson dambileelah yan maraay; elle yaamineenim, isinni qande» iyye.

CABAKKUK «QADAALAT ABLEH MAAN» IYYE

¹² Cabakkuk tohuk lakal iyyeemih: «YALLAW, atu dumaak yan Dagelta kinnitooh, waara Yalli koo. Kudduusuk yan Dagelta kinnito. Aqbudem kooy; yoo dacrissam koo. YALLAW, Baabelon mara sinaamak addak doorru hayteh nee edde digaalan qande keenit hayte.

¹³ YALLAW, ku inti taahirik tan inti kinnuk, umam tablem maqansissa. Umaane aba mara xiqa Dagelta hinnito. Hay ta uma-qamal-leela abta umaane mannal qansissa? Keenik fula cakki gital yan mara baysah ken table waqdi, tibba mannal inta?

¹⁴ «Sinam, baddi kullunta kee cerriy axcuk gexxa alluwway abba sinnihiyya abte.

¹⁵ Baabelon mari, sinam kullunti innah gillaabat yabbixen. Sabak addat ken hayya haanah hirriigisak ken beyan. Keeniy beyaanahiyyah bagul wadir ruffa iyyan.

¹⁶ Wohut mayaadiyaanaay, woo sabooka yaqbudeeniih, sadgat akah aban. Toh akah abaanam, too sabookat isinnih faxxa haan maaqo geyaanaah, farcitak xiinan.

¹⁷ Annal magid fanah mara foyyaysak, sugoonu waanah yanin! Baaxooxa racmatta maleh bayisak ma gide sugelon?» iyye.