Ayyuqel 3 - NABUWWA KEE MALIKWA

YALLIH COKMIH AYRO

¹ YALLI iyyaamah, «Too ayroorah addat, Israayil kee Yuudâ marah luk sugen gaddaliino gacseyyo.

² Too waqdi, baadal tan ummat inkih gaabossa heeh, YALLIH Cokmih-Daqar baaheyyo. Tokkel Israayiliy yi mara kinnihiyyal bahha heenimih keenik malkiteyyo. Israayil mara marin baaxo fixixisen. Israayil rasuy yim kinnihiyya kurraasiteenih.

³ Yi maray seewah orbiseenihiyyal saami caxxa qiden. Lih xiinen xiiqareh xiina kee yooqoben kamrih, meklah, yi marih xaylok say urru kee lab urru racmatta sinnuk yeceen» iyye.

⁴ YALLI kaadu iyyeemih, «Suur kee Sayda kee *Filistiin maraw, maca yok abtaanam faxxan? Siinil baaheemih caneh yol gacissaanam faxxaanam maay liton? Faxxeenik, yi mogoy tammoysetton.

⁵ Yi dahab kee lakqo kee limo gibdi duyye beyya hayteenih isinni qibaadah qarwah addal hayten.

⁶ Yuuda kee Yarusalaam mara le baaxok xer baaxo fan ken ruubaana'gidih, Giriik maral ken teylemmen.

⁷ Ta saaku isin ken edde teylemmen marih gabak beyya ken heeh, ken baaxo fan ken gacseyyooh, keenil bahha hayteenim siinil baaheyyo!

⁸ Xaylo Yuudâ-marat siinik aylammeyyo. Oson kaadu Saaba deqsita xer baaxoh marat ken aylammelon. Tahat yabtam yoo YALLA» iyye.

⁹ Kaadu qagseh iyyemii, «Taham baadal tan ummatah warisa. ‹Qeebih bical gaca. Qeebi abta gaadileh seeca. Qaskar gaaboosaay gaaduh uguta.

¹⁰ Buqre edde abtan biriitak seefwa bicisa. Cooxuk luudwa edde argaquk sugten gileelak, macaxu bicisa. Boola le mari kinni way qeebik raaqe waay.

¹¹ Dariifal yan maraw, takkeenimiik sissikuk cokmi elle yakke golo fanah amay gaaboowa› inxica» 'yaanam iyye. YALLAW, maysattaka keenit abta'gidih ku qaskar rub!

¹² YALLI iyyeemih, «Baaxooxal yan mari inkih bical gacay. YALLIH Cokmih-Daqar fan yamaatoonay. Tokkel yooy YALLAH yani daffa exceh dariifal enna ta baaxooxah maral cokmi abeyyo.

¹³ A mari kaxxa makri-leela kinnon. Orbisan daroh innah maaytat ken irgiqa. Qinabak axmuumiyyat lee akah yayyaaqen innah, ken xagarak qabal yawqe'gidih keenit iqita» iyye.

¹⁴ Loowo sinni mari Cokmi-Goloh addal yan. YALLIH cokmih ayroy xayihiyya elle takku waytam tokke.

¹⁵ Ayro kee alsa dattooweleeh; cutuuka ifak maraqta.

YALLI ISI MARAT BARKAT ELLE HEE'NNA

¹⁶ YALLI Siyon qaleh amok lubak innah xongolele. Kay xongolo Yarusalaamak antaabbele. Qaran kee baaxo axaxitele. Too saaku YALLI isi ummat dacriseleeh; reebu keenih akkele.

¹⁷ «Too saaku Israayil maraw, anu YALLAY sin Dageltah yani kinniyom yoh aaxigetton. Anu elle anim, Siyon qaley taahirik tani kinnim aaxigetton. Yarusalaam taahirik tan magaala akkeleeh; afak temeete qaskarih gabat maradda.

¹⁸ Too ayrooral qaleeli qinab cooxuk amaggele; laahi kulli qaleelal aloolele; Yuudâ baaxol inkih yan sanat buyitte racele. Yallih Qibaadah-Qarik obta lee Tikible Golol darah oobele.

¹⁹ Masri bacarih tan baaxo akkeleeh; Edom tu elle aabuke wayta foyyah tan baaxo akkele. Toh akah takku waytam, oson Yuudâ rasu yibbixeenih, teetil sugte masaakiinah yan mara qiden.

^20-21 Rabe marih cane gacseyyo. Umaane abe marat macaba. Takkay immay, Yuuda kee Yarusalaam mari, adok ado fanah isi dabaq macaba. Yoo YALLAH tu gactekiiy Siyon Qalel gaceyyo» iyye.