Ayyuqel 2 - NABUWWA KEE MALIKWA

QANAYTI MANGA YALLIH-COKMIH-AYROH ASTA

¹ Baanta ugura. Taahirik tan Siyon Qaleh amook turumba kaayisa. Israayil ummatey, YALLIH cokmih-ayro xayih immay cunxita.

² Too ayro baaxol data qamburreey gaanibiy kaxxa dite le radele. Casri sinni qanaytuy baaxol oobehiyyak gexxaamah, qaleeli amballayuk maraaqa. Tah duma akke wayteeh, sarra akke waytu waytam kinni.

³ Ta qanayti, cafit gexxa gira kafin caxa elle selta innal, baaxol tanim sela. Foocat keenik tan baaxo Qadan bustaanih inna le. Salafat keenik raqta baaxo, caxa elle aabuke wayte bakarroyta celta. Tu matasillima.

⁴ Too qanayti faaris weelo leeh; carbih xoxbisan faaris gurral yamaate.

⁵ Qaleelah amol ooba waqdi, kafin bocot gexxa girah xaw xaawaah; xoxbisan faras gaariirah xaw xaawa. Carbih gaadda qaskarih innah rooruh yamaate.

⁶ Ta qanay amaatih yable marat warigga radda. Fooci sinaamak dattoowa. Garih akak yemeete marat axaxo hayta.

⁷ Ta qanay qeebih qaskar bis leeh; gidaarwah amo, qaskar elle korta'nnal, kora. Missowwa 'yeenih inki kabuk titta waklisak yamaaten.

⁸ Tuuy kabul keenik magexxay titta waklisak yamaate. Faxem kaa waasu maduuda. Bisoh elle gexaamal,

⁹ magaalah adda warara. Gidaarwak amo korak, qarwak amo gacca 'yeh taagataak garqi innah qarwah adda cula.

¹⁰ Ta qanayti yamaate way, baaxo axaxittaah qaran yangayye. Ayro kee alsal dite radda; cutuuka bar ifak maraqta.

¹¹ YALLI kakkaqô-xaw xaawak isi qaskar amrisaah; kay qaskaray kay amri oggolta kaxxa manga kee qande le. YALLIH cokmih-ayro takku waytam nummaak gibdiimi. Tahak iyyi nuwwuk raaqa?

YALLI UMMATAK TOOBITA IYYE

¹² YALLI iyyaamah, «Away kinni way baguuk toobitaay sooma. Abteenimih weeqay yol uduura.

¹³ Qaadiyyah sara isinnik qanxissaanam xiqtam mali. Abten umaaneh nadaamitta 'xicay qado baguuk yol uduura» yaanam iyye YALLI. YALLAY sin Dagelta kinnihiyyal uduura. YALLI maqaane leeh, racmatta le Dagelta. Kaxxa kacanu yaybulle Dagelta kinni. YALLI dagoomut mabagcarrita; digaalat mayasissikaay sahda abta umaaneh sahdah qafu aba Dagelta.

¹⁴ YALLAY sin Dagelta kinnihiyya siinih loowe digaalak yaduurem takkeh. Orbissan murtit barkat heeh, yaymaggem takkeh. Too saaku kamadi kee qinabak bicsen kamri sadgatah YALLAH aceetton.

¹⁵ Siyon qaleh amol *baanta ugura. Sahdak, «Qibaadah gaabooway soomuh gaca» inxica.

¹⁶ Inkih tan ummatak idoolaay, qunxa urru kee angu taaxe salaadah agantah, gaaboysay taahirik tan gaabowna keenih aba. Malcino qaril sugte qarus kee qibna takke way, too gaabownak raaqe waanama.

¹⁷ Yallih Qibaadah-Qarih adda akak culan culma kee sadgat elle aban aracak fanal, seekay YALLIH naqoosah-tani YALLAL weeqak dooqa abtaama. «YALLAW, isi marah xuwaw. Sahda nel asuule kalaay, sahda, ‹Sin Dagelti ankel yan?› axcuk elle qangaasalta mara nee maabin» axcuk dooqa abaanama.

YALLI BAAXO LUK SUGTE NIQMAT BAAXOH GACSE

¹⁸ Ellecabol YALLI isi baaxo kee isi mara akcinuk keenih xuwaaweeh keenih racmateh.

¹⁹ Ken dooqa oggoleeh keenik iyyeemih, «Tahak wadir, darooy, qinabak bicsen kamri kee caxâ xaylok bicsen *zeytik (saliidik) sin cayiseyyo. Tahaysa sahda sin mabursutta.

²⁰ Kilbatak yamaate naqboyta siinik waaseyyo. Too macaxuk garab bacarih tan baaxo fanah siinik xiiriyeyyo. Foocat yan macaxu Rabe Badat qideyyooh, salafti macaxu Maditraaniyah badat qideyyooh; barugi keenik baaxo abcisele. Macaxi gibdim siinil baaheemih sabbatah, anu ken bayseyyo» iyye.

²¹ Baqurê-baaxoy, YALLI nabam koh abem ubulaay, ahaysa mameysitinaay ruffu 'xic.

²² Lac kee dubalway! Ahaysa mameysitinaay ruffu inxica. Qayso siinih aabukeleeh; caxa xaylo siinih xalelek. Mango sublah-xaylo kee mango qinab aabukele.

²³ Siyon maraw, YALLAY sin Dagelta kinnihiyya siinih abem ubulay, ruffa 'xica. Duma elle ruubak suge'nnal, dabayba kee karmaay sugumul, dudda le rob siinih ruubeh yan.

²⁴ Daro elle orbisak yenen aracal mango daro orbele. Mango qinab kee zeyti (saliid) akak bicsen cooxih xaylo orbiseloonuuh; qusba kamri kee zeytik tanooka amaggele.

²⁵ YALLI siinik iyyaamah, «Qanayti siinik selli heem, wadir siinih gacseyyo. A qanaytih macaxu siinit rubtem, yoo YALLA.

²⁶ Ahaysa maaqoh takmeenim mawaytaanaay cayyetton. YALLAY sin Dagelta kinnihiyyay a axxul le maqaane siinih abe faylisetton. Yi mari ahaysa bursuten mara mayakka.

²⁷ Too saaku Israayil maraw, sin lih aniyom yok aaxigetton. Anu YALLA kinniyooh, sin Dagelta kinniyom aaxigetton. Yok sa Yalla alle waytaanam aaxigetton. Ahaysa sinam sin mabursutta.

YALLIH AYRO

²⁸ «Sarrak kulli maral inni Roocaaniyya oobiseyyo. Siinik lab-xaylo kee say-xaylo yi farmo sinaamah warsele. Idoola siinik soono sooniteleeh; furrayna siinik sirri innah tanim ablele.

²⁹ Naqoosak labim kee sayimih agantah, woo ayroora yi Roocaaniyya keenil oobiseyyo.

³⁰ Daga yan qaraanaay baaxô-bagul ablewaynu aybulleeyyooh; wohimiiy qabalaay gira kee mango qeeri.

³¹ YALLIH ayroy sahda akak meysitta kaxxa ayro kinnihiyya tamaateemik naharal, ayro dattooweleeh alsi qisih qabal innah gacele» iyye.

³² YALLAH seecinnaanih num waddiimele. YALLI akah iyye'nnah, «Yarusalaamal sugu waa marak tu takkem asillimele. Anu dooreh akah seece mari cattiimele» iyye.