Ayyuqel 1 - NABUWWA KEE MALIKWA

¹ YALLI Fatuwél-Ayyuqel deqsita nabil ruube farmo ah teeti.

DARO FINQITTEEH, UMMAT KAXXAM ROOKITTE

² Idoolay ankacisa. Yuudâ rasul yan maraw, a yaabah ayti ucuya. Axayyu tekkem, sin dabaanal duma tekkem hinnaay, sin abbobtih dabaanal tekkem hinna.

³ Taham isinni xayloh warisa. Sin xaylok kaadu isinni xayloh warisa inxica. Oson kaadu ken lakal tamaatu wayta adoh warsaanama.

⁴ Kaxxam mango qanaytuy titta lakleh yemeete tubqureenih sugteenim siinik seleeh; naharak yemeete qanaytuk raqtem, wohuk lakal yemeete qanayti selli hee. Woo qanaytuk raqtem, keenik lakal ciggiile qanayti yokme.

⁵ Hay sakaaray, ugutay weeqa. Qinabak bicsen kamrit yiskire maraw, takkeenimiik boogisa. Qusba kamri akak bicissan qinab xaylo bayteeh finqitteh.

⁶ Mangah loowo sinni qanayti baaxo nek warare. Kaxxa qande loonuuh; moddin keenik afah lubak moddiinih gideey; qangabbi keenik moltâ qangabbi gide.

⁷ Qinab xala coox sella nek heeh; sublâ-caxak tu macabinnaay, qalloh agaantah yokme. Coox kafinuk cabba hee'mmay weeqa.

⁸ Baqli akak rabe qibnah innah, boogisaay rookâ-sartan sarita.

⁹ YALLIH Qibaadah-Qarih addal sadgatah acayuk sugen qinabak bicsen kamri kee daro gaba kalteh. Seekay YALLIH naqoosah tanihiyya abak ten sadgat ahaysa mageytaay, tohih sabbatah rookitan.

¹⁰ Buqre elle abak yenen baaxol buqre matakkaay, baaxo foyyah raqta. Macaay inteenik, aabakuk ten daro bayteeh; qinab xaylo kaffa karacca inteeh; zeyti (saliid) akak bicsan xaylo xalak yen coox kafe.

¹¹ Buqre aba maraw, boogisa. Qinab xala coox aysubukuk yen maraw, rookita. Macaay inteenik, kamadi kee gabru deqsitta darooy, wohuk kalah tan daro inkih bayte.

¹² Qinab xala cooxuuy sublâ-coox kee rummaanat xala coox laqaymuumeh. Tamira xalak ten nakliita laqaymumte. Yakmen xaylo xala coox kee garbol yan coox inkih laqaymumma 'yeh kafe. Tohuk gexxaamah ummat abak sugte farcat gadaamat cabe.

¹³ Hay tonnal, isin seekay sadgat elle aban aracih foocal taamittahiyyak, *qabuudut gacca 'xicay rookita. YALLIH Qibaadah-Qarih addal inkih yan bar rookitak xiina. Ahaysa Yallih sadgatah baahak tenen daro kee kamri gaba kaleh.

¹⁴ «Takkeenimiik inki aracal qibaadah gaabowwa 'xicay sooma» 'yaanam inxica. Yuudah abbobti akak macabinay, Yuudâ marah inkih seecaay; Qibaadâ-Qaril sin Dageltal weeqa.

¹⁵ YALLIH cokmih-ayro xayiih; woyyow, woo ayrot takku wayta baati! Nabna le Dagelti too saaku bala ruubele.

¹⁶ Nubqure daro kee maaqo nek baatam nable. Yallih Qibaadah-Qaril akkuk yen farcat gaba kaleh.

¹⁷ Buqreh qiden dariyyi leê waytih kafe. Daanisen daro masugta. Daro edde daanisak yenen riigittet daro ane waytaamih sabbatah, riigitte finqitte.

¹⁸ Laahi qululuh gardaah; elle alooluk yen niqmatak tan baaxo kafte. Illi kee wadar takme qayso mageyta.

¹⁹ Qayso kee caxa elle aabakuk ten baaxo, gira edde gexxeh innah, kaffa karacca inteeh; tohuk gexxaamah, YALLAW, kol weeqa.

²⁰ Dubaali leê-waytih bakaarite. Lee akak aaqabuk yen buyyitte kafteh. Tohuk gexxaamah dubaali kinni way kol weeqa.