Aster 8 - NABUWWA KEE MALIKWA

YAHUUD MARAH KOYSITAAMIH AMRI ELLE YEWQE'NNA

¹ Too ayrot edde, Malik-Ekserkas Yahuuduk-qaduwwih-suge Haaman buxal luk suggu 'ye duyye inkih Asterih yecee. Sarrak Aster, Mordakay teetih ramad lem kaah warisseeh; tohuk wadir Mordakay malik elle yan ikke culaamih ruksat malikik geeh raaqe.

² Malik sarrak isi ferrantoy duma Haamanah yeceeh sugehiyyay malik asta elle tanihiyya Mordakayah yecee. Aster kaadu Haamanak raqte duyyeh abbah Mordakay hayte.

³ Tohuk lakal Aster malikik ibak gubal raddeeh, weeqah sinkibitak kaak inteemih, «Agag deqsita malikik rade Haaman, Yahuud marah looweh suge umaane akah raaqisinnaan innah ab» kaak inte.

⁴ Too waqdi malik gabat abbaxuk suge dahabak bicsen malik caxxa tet fan fayya heeh, too waqdi ugutteh.

⁵ Sarrak inteemih, «Atu raabitteeh, yot maqal telleeh, anu kaadu away koo esserah anim, tanim kinnim cubbussa hayta waqdi, Agag deqsita malikik rade Hammadaatá-Haaman yeceeh cabe amri abinal akah ase waa innah ab. Usuk, ‹Yahuuduh ubukka 'ye maray atu malikih elle tan rasul enna 'yahiyya inkih qida› 'yaanam iyyeh yan.

⁶ Tannah tanim inni intih abalih yi mara kee yi ramadat takkeeh, ken qidaanam abalih tibba axcem yoh matakka» inte.

⁷ Toh yoobbe waqdi Malik-Ekserkas, Aster kee Yahuuduh yooboke Mordakayak iyyeemih, «Asterih, Haaman buxal luk suggu 'ye duyye eceeh, usuk Yahuud marah looweh suge umaaneh sabbatah kaa takkarsiiseh.

⁸ Awayah tu gactek, malik migaaqal yewqe amri kee kay asta elle tan warkat korsaanam mabicta. Tonna'mmay away isinnih elle faxxa haytan gurral, Yahuud marah waraakit aktubaay, taktuben waqdi, yi migaaqal uktubay malik asta edde haa» iyye.

⁹ Aham edde tekkem sanatak sidochaytoh alsay Siiwan deqsitahiyyak labaatanna kee sidochaytoh ayrok ten. Mordakay malik kutbe-abeenitih secca yeeh, malik gubat xinta baaxoy Hindi-rasuk xabba haanamaay, Kuus-rasuh amma 'yaanam takkehiyyah addal tan bool kee labaatanna kee malciin takke rakaakayittel tan xintoh-abbobti kee doolat-saqolti kee doolatat-kaxxa-arac-le-marah yaktuboonu waanam keenih warse. Too mari too baaxol enna 'ya marak kulli marah le marih af kee feerat yuktuben waraakit ruuben. Yahuud marah kaadu isi af kee feerat too waraakit ruuben.

¹⁰ Mordakay woo yab malik-migaaqal yuskutubeeh, sarrak malik-asta kay migaaqal elle hee. Ta waraakit gabat le mari sissik-faarisiy malik qaril faarisih aben dagget yanihiyyat xoxbisak gexen.

¹¹ A waraakitiy yuktubeenil tenemii, Yahuud mari elle aninnaan ikkel umam keenil baaha marat koysitaanah bical gacaanamih ruksat malik keenih yeceeh 'yaanamak ten. Faxe rasukuuy yanoonay, gabat silac le mari Yahuud marat qeebi aben ken tekkek, lon silaacat qeebi keenit abinnaan mara seloonay, hinnay kaadu ken xaylo kee agabu qidoonay, ken duyye isinnih haysitoonay.

¹² Ta amri Adar deqsita taban kee nammeyhaytoh alsak taban kee sidochaytoh ayroy duma Yahuud mara edde qida iyyeenihiyya abinat asay» 'yaanamak ten.

¹³ Taham, ahak wadir, inkih yan rasul timixxige xinto akkele. Yahuud mari too ayro qeebi keenit abu waa marah bical sugelon 'yaanam elle ten.

¹⁴ Malik elle amrissa hee innal, too waraakit elle ruuben mari malik-buxah-faarisil koori hayya heenih amot akak gacca 'yeenih kaxxam xoxbisak gexen. Too amri kaadu inaytâ-magaalah ten Suusal inkih yontoobbe.

¹⁵ Sarrak Mordakay kuclinan kee qidik yan ibak lifiq gufa kameesit gacca 'yeh, xagar meqe *baftak bicsen saroy qasdiiminan bis lehiyyak bicsen koot haysitta heeh, dahabak bicsen kalabtay kaxxahiyya amot luk, malikwa elle saritta'nnal saritta heeh, malik qarik yewqe. Suusâ gitittel kaa yublen waqdi, sahda kaxxam tifriceeh, qililiseenih.

¹⁶ Yahuud mari kaadu kaxxam yifriceeh, duma luk sugen meysik yoffoofeenih, nasri geenim yeexegeenih.

¹⁷ Kulli rakaakay kee kulli magaalah addal suggu 'ye Yahuud-mari, baahen-waraakitil-tanim keenih yikriyen waqdi, farcatah kaxxa xigla aben. Ummatta mangih Yahuuduk meysitteemih sabbatah, akah aabuke ween Yahuud yekken.