Aster 7 - NABUWWA KEE MALIKWA

¹ Malik kee Haaman qagisseh, Aster bicisse maaqo xagaana'gidih tokke gexen.

² Tokkel kaadu qinabak bicsen kamri yaaquben waqdi malik, «Asterey, faxxam yoh warisey; geettok. Atu faxxek, anu malikih amol akak an rasuk garab kinni way geettok; maca faxxaa?» teetik iyye.

³ Too waqdi is kaal gacisseemih, «Anu koo esserah anim gibdim kinni way, kok faxam yoo kee yi mara qide waytaama.

⁴ Yoo kee yi marih qidimil gaba kaleeniih; naqoosannuh ken xaamaanamal tibba axcuk eneeh, koo akah taqbisak mananniyo'mmay, ah woh hinna. Nee qidaanaah, ragid nee cabsiisaanamal, gaba nek kaleenih» inte.

⁵ Too waqdi Malik-Ekserkas, «Woh abtu talliilem iyyaay? Woh aba iyye num ankel yaniih?» iyye.

⁶ Too waqdi Aster inteemih, «Ni naqboytay nee qidsiisam faxahiyya amah kaa; ama umeeni, Haamana» kaak inte. Haaman too waqdi hagga yeeh, way malikik intik adda waggaay, way Aster fan wagga hee.

⁷ Malik toh yoobbe waqdi kaxxam bagcarriteeh, edde ugteh, qarik afah bustaan elle yan ikke fan gexe. Haaman toh yuble waqdi, malik kaa digaalu waam yeexegeeh; tonna-leemiik Aster rooci kaak wadda'gidih, tet kallacuh qari addal tet lih raaqe.

⁸ Malik yemeete waqdi, rooci kaak wadda'gidih, kallacih is elle tan qarkaytô-bagul gommoh radda 'yeh tet kallacak suge. Malik toh yuble waqdi, «A num yi buxah addal yi barra caylisam faxa kunna!» axcuk kaat kaaye. Tonna-luk wokkel suge mari Haamanak foocal saro heen.

⁹ Tokkel suge marih numuy migaaqah Carboona deqsitak yenehiyya, «Ah Haaman hinnaa! Inkinnah yi amoytaw, Mordakayay ku rooci catehiyya edde takaruh isi buxal takayrih arac bicsiiseh yan. Kaa edde takaruh bicsiise arac xexxaarah labaatanna kee koona mitri yakke» iyye. Malik toh yoobbe waqdi, «Too aracat beyay Haaman takara» iyye.

¹⁰ Sarrak Haaman, Mordakay edde takaruh bicsiiseh suge aracat takaren. Tohuk wadir malik bagcarrak xamceh.