Aster 6 - NABUWWA KEE MALIKWA

MALIK, MORDAKAY YESSEKEXXE

¹ Too bar malikit xin yamaatu cineh. Sarrak malik, «Fursi-dardaarinni-aydaadi elle yan kitaabay elle dardaara baaxol duma tekkem elle yuktubeenihiyya yol baaha» iyyeh, bahsiise.

² Woo waraakit yikriyen waqdi, duma malik qidam faxak suge seelabu le namma numut Mordakay elle rade'nna elle yuktuben warkat gee. Too namma numuy malik qarit dacayrih yenehiyya, migaaqah Bigtaana kee Teres deqsitak ten.

³ Too waqdi malik, «Mordakayay ah abehiyyah galtoh abnem maay lino?» iyye. Kay taamat yan mari, «Tama numuh abeenim matan» kaak iyyen.

⁴ Too waqdi malik, «Daaratal iyyi yanii?» iyye. Haaman too way Mordakay edde takra'gidih bicsiise caxxih bagut, malik gabat kaa takkarsiisa'gidiiy, tohim malikih warsa'gidih wokke yemeeteh suge.

⁵ Malik taamat yan mari malikik, «Daaratal tanim Haamana» kaak iyye. Malik «Kaa culusa» iyye.

⁶ Too waqdi Haaman malikil cule. Cule waqdi malik kaak iyyeemih, «Saraf lem akah abam faxa num yanik, too numuh maca abam tayse?» iyye. Toh yoobbe waqdi, Haaman, «Toh yook tan kaay; yok kalih numuy saraf lem akah abam faxahiyya mali» 'yaanam isi bagul hayya hee.

^7-8 Malikik, «Tonnah yan numuh, malik-edde-gaca-sartanay atu isih xagaral haytahiyya kaat haanama. Malik farasay bila edde heeni bical kaah haanama.

⁹ Sarrak ku xintoh muddaqiyittek kaxxa numuk woo sartan kaat hayyaay, farasat kaa hayya hayteh farasak foocat gacca 'xicay, ‹Malik isih faxe numuh saraf lem elle aba'nna ubula› axcuk, magaalak gudel sahdah warisak gex iyyaanam inxic» iyye.

¹⁰ Too waqdi malik kaak iyyeemih, «Hay, tonnal isissikay gexay, woo warissa sartan kee faras bahha haay, tama massakaxxa Yahuuduh yooboke Mordakayah ab. Taway axcuk sugga 'tem inkih, elle inxicca inte innah, atu kaah ab. Yi qarik afal daffeyak koh sugelek, xayuk gexay, kok akah inxicca exce'nnah, ab» kaak iyye.

¹¹ Haaman gexeh sartan kaah baaheh xagarat kaak heeh, sarrak farasat kaa hayya heeh, isih foocat kaak gacca 'yeh, magaalak gudet foocat kaak elle gexaamal, «Malik isih faxe numuh saraf elle aba'nna ubulaay» axcuk gexe.

¹² Tohuk gaba kalen waqdi, Mordakay malik qarik afa fan gexeeh, Haaman wacarriyih namma gaba amol luk isi buxah arduk yuduure.

¹³ Kaat tikka 'tem isi barra kee kataysiisih warse. Too waqdi kay barra kee kay kataysis kas luk teneeh, «Ahaysa luk sugte assobbiyyi Mordakay gabal kok gacam faxa. Mordakay Yahuuduh yooboke numuuy; qeebih koh mayaabbaay, kok aysele» kaak iyyen.

HAAMANAL RABA YUCKUMEN

¹⁴ Oson too yaabat yanin waqdi, malik buxat yan seelabu-leelah yen mari, «Aster bicissa maaqoh koh seecaana» iyyeeh, Haaman gabat malik buxah been.