Aster 5 - NABUWWA KEE MALIKWA

ASTER MALIK KEE HAAMANAH XIGLA ABTE

¹ Sidooca ayroh too soomut sugga 'teh; gaba kalte saaku, ugutta 'teh malikwâ-sarat gacca 'teh gexxeeh, malik qarih daaratak adda le kabuk dardaarinni korsi addal akak tan qarik foocah temeete waqdi, sollu inte. Malik too waqdi dardaarinni-korsih amol daffeyak suge.

² Tet soolah yuble waqdi, tet yossokooteeh; too waqdi malik gabat-haa-dahab-caxxa tet fan fayya hee. Too waqdi kaal temeeteh, caxxak moyya gabah xagte.

³ Malik, «Asterey maca faxxaa? Faxxa haytam yoh waris; geettok. Anu malikih elle an baaxok inkih yan garab faxxa way geettok; maca faxxaa?» teetik iyye.

⁴ Too waqdi Aster kaak inteemih, «Malikow, atu raabittek, away koo kee Haamanah buxal afxago siinih bicsam faxak, buxah yol ama» kaak inte.

⁵ Malik toh yoobbe waqdi Haamanah, «Aster buxal afxago neh bicisseh tanik, xayuk am» 'yaanam farmoh ruube. Malik kee Haaman, Aster fan afxagoh gexen.

⁶ Tokkel qinabak bicsen kamri yaaquben waqdi, malik Asterik, «Faxxam yoh warisey; geettok. Atu faxxek, anu malikih amol akak an rasuk garab kinni way geettok; maca faxxa?» teetik iyye.

^7-8 Too waqdi Aster kaak inteemih, «Hayba le malikow, anu koo esseram yoh abtam faxxek, koo kee Haaman beera kaadu buxal siinih abu waa xiglak maraaqinay amaay, faxam tokkel koh warseyyo» kaak inte.

HAAMAN MORDAKAY QIDAAMAL MALSE

⁹ Haaman wokkek eweqqa 'yeh farcaanak isi buxah gexak suge waqdi, Mordakay malik qarih culmak foocal kaah suge. Kaal tatreh gexeeh, too waqdi Mordakay massakaxxah kaah masoolinnaay, baaqid kaat mahanna. Haaman toh kaak yuble waqdi, kaxxam yinqibe.

¹⁰ Takkay immay nabsiyya isik xabba heeh, isi buxa fan gexe. Buxa gufe waqdi kataysiisih buxah seeceeh, isi barrak kaadu «Amay ne'lih daffey» iyye. Kay barra migaaqah Dares deqsitak ten.

¹¹ Sarrak hidah gaddaliinok leh gide kee, xaylok xaleh gide kee, malik kaadu reedah kaa elle hee arac kee, tonnah kaadu, malik gersi marak fula kaa elle yossokoote inna keenih warse.

¹² Haaman tohut macabinnay, kaadu qagseh iyyeemih, «Malik-barra malik lih xiglah yok sarra numuh maseecinna. Beera kaadu gersi xiglah ama 'yaanam nek inteh tan.

¹³ Takkay immay Yahuuduh yooboke Mordakay malik qarih afal yanim fanah, tah inkih tu yot macelta» iyye.

¹⁴ Kay barra kee kay kataysis ta yab toobbe waqdi, «Sahda edde takran caxxay xexxaarah labaatanna kee namma mitri yakkehiyya macah bicse wayta? Beera malikik, ‹Mordakay a caxxat takram faxa› inteh takartaamak sah! Kaa takarsissa hayteh, isih farcaanak woo xiglah gexxaama» kaak iyyen. Haaman too fayu yoobbe waqdi, «Tah meqe malak tanih tan» 'yaanam isi bagul yucsubeeh, too waqdi sahda edde takran caxxa bicsiise.