Aster 4 - NABUWWA KEE MALIKWA

MORDAKAY, ASTERIK, «NEE CAT» YAANAM IYYE

¹ Mordakay tekkem yoobbe waqdi, sara isik qanxise. Sarrak sartanah *qabuddat gaceeh, amol gombod isik caxe. Tohuk lakal boogisak magaalak adda gacca 'yeh gexe.

² Sarrak malik qarih afa yemeete. Takkay immay addah maculinnay afal elle yeede. Addah akah cule weem, sartanah qabudda xagaral le num malik qari culam bictaamak manannaay, tohuk gexxaamah maculinna.

³ Inkih tan rakaakayitteh adday aham amrih elle oobiseenihiyyal yan Yahuuduh ubukka 'ye mari inkih tah yoobbe waqdi, kaxxa rookah rookiten. Yakkeenimiik soomeeniih, weeqeeniih, boogiseenih. Mango mari keenik sartanah qabuudut gacca 'yeh, gomboduk bagul deerih gacen.

⁴ Aster taamat ten baxuwwa kee seelabu le maray tet lih sugehiyya Mordakay elle yan inna teetih warsen waqdi, abtam aaxige cinteh. Sara xagaral haa'gidih, sartan kaah rubte. Takkay immay Mordakay woo sara xagaral hayu cineh.

⁵ Sarrak Hatak deqsita seelabu luk yen numuy malik tet farmoyta yakke'gidih doorehiyya Mordakay fanah rubteeh, « ‹Geytem macaay? A ceelot akah gactem maca kot tekke?› kaak inxica» inte.

⁶ Hatak, Mordakayay magaalak maglallah yan aracay malik qarih afa akak culan aracak foocal yanihiyya fan gexxa 'yeh, Aster intem kaah warse.

⁷ Mordakay too waqdi Haaman Yahuud mara elle qidam faxa inna kee, Yahuud mara qideenik malikih lakqok culsam faxah gide kee, tohuk kalah tu elle tikka itte'nna inkih kaah warse.

⁸ «Yahuud mara qida» 'yaanamih amriy Suusâ magaalal yewqehiyya kutbeh elle tan warkat kaa yuybulle. Sarrak woo numuk iyyeemih, «Gexay a warkat Asteril beyaay, ta way anu kok excem inkih teetih waris. Teetik intaamah, ku marah nacruura'gidih malik kallacaay,

⁹ Too num gexeeh, Asterih toh inkih warse.

¹⁰ Aster too farmo toobbe waqdi, kaadu farmo kaah rubteeh, inteemih,

¹¹ «Malik akah seece'kah, gasoh adda cule num labhaytu takkuu, barra takkuu, rabi keenil yamaate. Xinto toh inta. Taham malikih fayu yecee mara kee, inkih yan rasul yan mari inkih yaaxige qaada. Takkay immay toh taniimih malik gabat-haa-dahab-caxxa dagah fayya hee kaa tekkek, too num rabak cattiimah. Tonna'mmay malik away alsi gide farmo yoh maruubinnaay, yol ama yok maxaccinna» 'yaanam farmoh too numul kaah rubte.

¹² Mordakay ta farmo kaa gufte waqdi,

¹³ Asterih kaadu gersi farmo ruubeeh iyyemii, «Away malik buxah addal taniimih, Yahuudut tekkeemik nagay raaqettom makkalin.

¹⁴ Annah taniimik tibba 'tek, Yahuud ummattah cato gersi ikkek amaateleeh, cattiimeloonu'mmay, koo kee ku abbak raaqe mari inkih ambaxele. Kaadu malik barra akah tekkem, tannah yan waktit tuk teena abta'gidi takkem bictah» 'yaanam farmoh teetih ruube.

¹⁵ Aster too farmo toobbe waqdi, kaadu too yaabal yab kaah rubte.

¹⁶ Inteemih, «Suusâ magaalal yan Yahuud marak inkih mododa inxic. Soomaay yoh kaadu dooqa aba inxic. Sidooca bar kee laqoh tu maaqabinaay makmina keenik inxic. Yoo kee yi taamat yan baxuw kaadu toh abenno. Tohuk lakal xintol umam kinnim aaxigeh immay, tohuh, malik fanah gexeyyo. Tohuh, rabi yol yemeetek, yamaatay» 'yaanam kaah rubte.

¹⁷ Too farmo kaa gufte waqdi Mordakay gexeeh, Aster kaak inxicca 'tem abe.