Aster 3 - NABUWWA KEE MALIKWA

HAAMAN YAHUUD SELAAMAL MALISE

¹ Ayrok teena Malik-Ekserkas, Haaman deqsita num reedah inkih tan muddaqiyittek daga raaqa aracal hee. Haaman Hammadaata deqsita numih baxak yen. Oson Agag deqsita numuk rade marak yenen.

² Malik kay gubal taamitta 'ya marak inkih, «Haaman yamaate waqdi, massakaxxah gulubuh gacca 'teenih gommoh kaah rada» 'yaanam iyye. Mordakayak kalih mari, malik keenik akah iyye innah, kaa ubulla haan waqdi, gommoh kaah radak yenen.

³ Malik buxal yan doolat mari Mordakayak, «Sugay, malik amri akah cintam macaay?» kaak iyyen.

⁴ Ta mari kulli ayro kaa kallaceeh, «Maabinay sahda kok intam oobbey» kaak iyyen. Usuk keenik iyyeemih, «Anu Yahuuduh ooboke ikkal, Haamanah gulubuh magacaay, gommoh marada» keenik iyye. Sarrak too mari, Yahuuduh yoobokem kaak yoobbe waqdi, tu kaat takku waytam keh yaaxigeeni'gidih, keenik iyyem Haamanah warsen.

⁵ Haaman, Mordakay kaah gulubuh rade waah, gommoh rade waam yeexege waqdi, kaxxam bagcarrite.

⁶ Sarrak kaadu Mordakay Yahuuduh yoobokem yoobbe waqdi, Mordakay dibuk digaalam hinna'mmay, digaala wohuk tatrusam faxe. Inkih yan rasul enna 'ya Yahuuduh ubukka 'ya mara qidaamal malse.

⁷ Malik Ekserkas edde reede taban kee nammeyhaytô-sanatak inikhaytoh alsay migaaqah Niisan deqsitahiyyah addat, woo-elle-malsem edde-abeh-meqe-ayro yaaxige'gidih, ramli qide. Too ramlik migaaqah ken afat Fuurim axcuk yenen. Sarrak Yahuud mara edde qiduh, ramlih sanatak taban kee nammayhaytoh alsay Adar deqsitahiyya tewqe.

⁸ Too waqdi Haaman malikik iyyeemih, «Akkel atu malikih elle tan baaxoh addal fixixih yan mari yaniih, too mari elle ane wayya haa rakaakay maloonuuy, akkel keenik sah num alle waa qaada loonuuh, atu malikih elle tan baaxol amrissam moggolan. Tonna leemiik tibba keenik intam mafaxxinta.

⁹ Tonna'mmay hayba le malikow, kot bictek, a maral rabi elle yamaate madqa tayyaaqem tayse. Anu kaadu sidiica boolih alfih kiilo takke lakqo ku kadnat culsaana'gidih, ku doolat-abbobtih aceeyyo» iyye.

¹⁰ Toh iyye waqdi, malik feerat luk suge ferranto eyyeqqa heeh; Yahuud marih naqboytah yan Hammadaatá-Haaman gabal hee.

¹¹ Sarrak kaak iyyeemih, «Too lakqo isih daanis; ahaysa too mara kuumuk, isih faxxem keenik ab» kaak iyye.

¹² Tohuk wadir sanatak naharsi alsak taban kee sidochaytoh ayro, Haaman kutbe-abeenitih inkih seeceeh; yemeeten waqdi amri gurrah keenik iyyeemih, «Malik amol akak enna 'ya rasul yan marih af kee feerat, malik amri elle yan warkat uktubaay; too warkat xintoh-abbobti kee doolat-taamak-fayya-inta-exxal-yan-mara kee doolat-gubal-rasi-abbobtih-yan-marah inkih ruuba. Ta amri rubtam, Malik-Ekserkas kinnuk, usuk ruubeemih astah kay ferranto bagul astah akak haa» iyye.

¹³ Kutbe-abeenit toh uktubba heenih gaba kalen waqdi, a farmoy yuktubeenihiyya gabat le mari, farmo-elle-tan-waraakit gabat luk, rakaakayitte fan arduk gexen. Too yuktuben farmoy too mari gabat beehiyyal tenemii, «Sanatak inikhaytoh alsay migaaqah Adar deqsitahiyyak taban kee sidochaytoh ayroh addat Yahuuduh ubukka 'ye marak furrayna takkuu, baxuw takkuu, idoola takkuu, agabu takkuu, urru takku num keenik macabinay yakkeenimiik ken qida» 'yaanam elle ten. «Oson edderra heenim keenik buuba» 'yaanam kaadu elle ten.

¹⁴ Tohim edde takku wayta ayroh bical akah gacan innah, too kutbe kulli rakaakayal enna 'ya maray mango rasuh yaabukehiyyah amri kinnim yeexegeh akah suga innah, kulli ikke ruuben.

¹⁵ Woo amri kaadu Suusâ magaalay inaytah tanihiyyal yan marah malik amrisem ascassuk, kay gubal yan mari yiysixxige. Arduk farmo beya mari kaadu kulli rakaakay fanah gexak taham yiysixxigen. Suusâ magaalah mari tah yoobbe waqdi, kinni inna waagiseh. Takkay immay malik kee Haaman too ayro titta lih daffa iyyeenih, maqab aaqabuk yenen.