Aster 2 - NABUWWA KEE MALIKWA

ASTER MALIK-BARRA TEKKE

¹ Malik bagcarra cabba heek sarra, kay barra kaal bahtem kee usuk tet giddinaamak iyyem cisab kaal tekke.

² Malikih fayu acayuk yen maray kaak baxsime waak yenehiyya iyyeemih, «Qax meqe baxuwway bikrit tanihiyya macah gorrise waytaah?

³ Atu abbah akak tan baaxol, kulli rakaakayal abbobtih yan mara dooritaay, qax-meqe baxuwwa atu dabaaqah elle tan inaytâ-magaala fanah baaha keenik inxic. Too agabu inkih seelabu-le numuy migaaqah Hegay deqsitaah ku agbih dacayrit yanihiyyah gabal hoonay. Tokkel oson qax elle yamqen diwa keenih heelon.

⁴ Sarrak too baxuuwuk atu isih faxxa hannaan baxuwwa maliká abetto» kaak iyyen. Toh yoobbe waqdi malik, «Taham way meqe fayuk tanih tan» 'yaanam isi bagul yucsube. Sarrak oggoleh.

⁵ Inaytâ-magaalah addal Yahuud numuy Yaaqír-Mordakay deqsitahiyya yen. Too num akah aabakuk yenem, Benyam kedok teneeh; Kees kee Simqi deqsita marak rade numuk yen.

⁶ Malik-Nabkadnessar deqsite Baabelon-malik, Yuudâ-malikiy Yahoyaasin deqsitehiyya carbit yibbixe mara lih hayya heeh Baabelon rasu fan seewah bee saaku, Mordakay woo seewah been marak numuk teenah yen.

⁷ Too num nabam qax-meqe qammih baxáy migaaqah Aster deqsittahiyya luk yen. Qibraan qaadal migaaqah Hadassa teetih axcuk yenen. Tet xaleena rabte saaku, Mordakay is fan tet baaheeh isi baxáh innal tet yeynebe.

⁸ Malik yecee amrih, baxuw inkih Suusa deqsitta magaalay inaytah tenehiyya fanah beeniih, tokke been baxuuwut Aster edde ten. Baahen baxuw malik qarih addal agabu elle haan aracal heeniih, tokkel Hegay deqsita seelabu-li ken dacayrit gace.

⁹ Hegay, Aster kaxxam yikcineeh, is abba hannaanim kaat muquk ten. Tohuk wadir nagay qaxa tamqe'gidih, xagar edde dugta sukuti kee rikeek tan maaqo teetih acayuk yen. Agabuh heen aracal malcina baxuwway dibuk tet taama abtahiyya teetih hee. Agabu elle haan aracal, inkih yayse aracal tet hee.

¹⁰ Mordakay, «Yahuuduh toobokem numuh mawarsin» teetik iyyeh yeneeh, tohuk gexxaamah kinni sahdayto numuh mawarsinna.

¹¹ Mordakay kulli saaku, agbi elle yan qarih daaratak foocal, is akah tan innah wagittoh wonnak annah gexak yen.

¹² Baxuw qaxa edde yamqen diwa-haytit inkih yan sanat suge. Too sanatak laca alsih gide coofaalik bicsen sukutit xagar keenik duugak sugen. Aki laca alsa kaadu, qatri kee arab xabbacoysaah qaxa yaymaaqe caxâ-sifat ken askatuk sugen. Tohuk gaba kalen saaku kulli baxuwwa midu-miduh malik fanah gexak ten.

¹³ Kulli baxuwwa agbi elle yan aracak malik buxah fan gexxa waqdi, isih faxxa hayte sara kee bilqah haan duyyet gacca teh gexak ten.

¹⁴ Magrib malik qari fan gexak teneeh, aki saaku aki aracay malik caggô-gubih caggoh nikaacat yabbixe agbi elle yanihiyya tet beyak yenen. Wokkel seelabu luk yen numuy migaaqah Sagasgad deqsitak yeneeh, malik agbih dacayrit yenel tet cabak yenen. Tohuk lakal malik tet ikcinna heeh migaaqal teetih seecam fanah, kaa fan gexak mananna.

¹⁵ Ayrok teena, malik fan gexaanam Asteril miduh temeete. Abicayil baxá Aster, Mordakayak qammih baxák ten. Tet teynebem, tet qammih yen Mordakay deqsita numuk ten. Aster yuble mari inkih tet yossokooteh. Is malik fan gexxe waqdi, Hegay deqsita seelabu-liy malik qarih addal agabu dacayrit yenehiyya teetik edde gaca iyye sartanat gacteh gexxe.

¹⁶ Ekserkas malik edde yekke malcinhaytô-sanatak taban haytoh alsay migaaqah Teebet deqsitahiyyat, Aster malikiy isi gasoh addal yanihiyyah fan baahen.

¹⁷ Malik tet yuble waqdi tet yikcineeh, gersi agabuk fula tet yossokoote. Gersi agabu kee baxuuwuk inkih teetih lafte. Sarrak malik-barrat haan dardaarinni-kalabta tet amot hee. Duma barrah luk suge Wastih aftok, tet malikáh haysite.

¹⁸ Tohuk lakal Aster-migaaqal, malik isi gubal taamita mara kee xintoh abbobtih kaxxa xigla abe. Inkih tan ummatay usuk amol malikih akak raaqahiyyah too ayro qaffayda abeeh, ummattah mango mattaco yecee.

MORDAKAY MALIKIK ROOCI CATE

¹⁹ Baxuw nammayhaak gaaboysen saaku, Mordakay malik qarih taamah abbootan luk suge.

²⁰ Aster Yahuuduh toobokem teetik yaaxigeenimik kaxxam cubbi abitak ten. Mordakay, «Yahuuduh toobokem sahdah mawarsin» teetik iyyeh sugeeh, is qunxuk ten saaku kay yab akah oggolak tene'nnah, kay yab oggolte.

²¹ Mordakay malik qarih taamah abbootan gee dabaanal, Bigtaana kee Teres deqsita namma numuy seelabu lehiyya malik addal akak xiina golit dacayrih yenen. Too namma num Malik-Ekserkasat kaxxam bagcarritteeh, tonna leemiik nammayak kaa qidaanamal malsen.

²² Mordakay ah keenik yuble waqdi, Asterih warse. Aster kaadu malikih warisseeh; ahamat raddeeh teetih warissem, Mordakay kinnim malikih warisse.

²³ Malik too waqdi taham numma kinnim kee akke waytam yasmite mara hee. Too mari Mordakay iyyem numma kinnim yismiteeniih; too waqdi too namma num takayrut qiden. Sarrak malik, «Taham elle tekke inna Fursi-Dardaarinni-Aydaada deqsita kitaabih addal uktuba» 'yaanam iyye.