Aster 1 - NABUWWA KEE MALIKWA

MALIKÁH TEN WASTI BAQLI AMRI CINTE

^1-2 Malik Ekserkas deqsita malik, dardaarinni korsi elle luk yen Fursi-rasuk inaytah-ten-magaalay Suusa-deqsitak-tenehiyyal gacca 'yeh Hindi-rasuk xabba haanamaay, Kuus-rasuh amma 'yaanam tan baaxoy bool kee labaatanna kee malcina rakaakay takkehiyyal ackamuk yen.

³ Too malik edde dardaare sidochaytô sanatat, qaffaydah kay gubal doolat-taamak-saqoltih yan mara kee, xintoh-abbobtih yan marah inkih kaxxa xigla abe. Too xiglah Fursi-rasu kee Meediyah-rasul tan qaskar kee, rakaakayittel xintok abbobti kee muddaqiyitte inkih temeete.

⁴ Lica alsih gide, usuk dardaarah elle enna 'ya rasul gaddaliinok leh gide kee, kay nabna kee misliino takkeh gide, xiglah yemeete mara ayballayuk suge.

⁵ Tohuk gaba kale saaku, gaddaleela kee masaakiinah inkih, inaytâ-magaalay migaaqah Suusa deqsitak tenehiyyal, kaxxa xigla abe. Too xigla ayyaamah malik qarih gasok bustaan elle yen aracal akkuk sugte.

⁶ Kay qarih daaratal qidi kee kuclinan bisu le sara, qado *baftak bicsen tafulwa kee qasdiimin bisu le tafulwat, lakqok bicsen ferranway qadoo-xaluq bicsen qamidwal edde tanihiyyat oobak caben. Too sari too ayro daarat kaxxam qaxa yeymeeqe. Tonnah kaadu too daaratih bagul, qisiiy qidii kee walqin bisu le xeetiy qax-meqeeh liliq iyyahiyya heen. Tohuk bagul elle daffeyan duyyey dahab kee lakqok bicseenihiyya heen.

⁷ Qinabak-bicsen-kamri dahabak-bicsen-kobboyaayil sinaamah yeceeniih, too kobboyaayi tii tiyak qaxah akak lafitak yen. Malik, «Kamrik kulli numuh faxeh gide acuya» 'yaanam iyye.

⁸ Malik, xiglah akah seece marah faxxa haanah gide maqabak keenih ucuya 'yaanam axcuk, malik-gasot-taamita-akdaamah amri yecee. Tohuk gexxaamah yemeete marah caddo sinni maqab yeceen.

⁹ Kay barray migaaqah Wasti deqsitak tenehiyya kaadu is le kabuk, malik qarih addal, agabuh xigla abte.

¹⁰ Malcinhaytoh ayro malik qinabak bicsen kamri yooqobeeh, sarrak xagar kaak dagoom laqte waqdi, seelabu le marih malciiniy dibuk kay farmot yenehiyyah seece. Too mari migaaqah Mahuman kee Bidta kee Carboona kee Bigta kee Abagta kee Deetar kee Karkas deqsitak yenen.

¹¹ Too malcina num yemeete waqdi, «Gexay Maliká-Wastik, ‹Dardaarinni-kalabta amot hayya haay akke am› teetik inxica» iyye. Is kaxxa qax-maqaane luk teneeh, malik tet qax-maqaane kay gubal tan doolat abbobti kee yemeete qibini kaah yableenim faxe.

¹² Ta farmo teetih warsen waqdi, kay barra, «Maamaata» yaanam kaal gacisse. Malik taham yoobbe waqdi, kaxxam bagcarrite.

¹³ Malik, xinto intam kee qadaalatah tanim aba'gidih, tu-yaaxigil fayu esseraanam qaadah luk yeneeh, tonna-leemiik tahak abeh meqeemih fayu kaah yacayu waa marah seece.

¹⁴ Mango waqdi fayu elle esserak yenem, Karsena kee Sesar kee Admaata kee Tarsis kee Mares kee Marsana kee Mamukan deqsita marak ten. Ta malcina num, Fursi kee Meediyah rasul doolat taamak kaxxa aracal yan marak yenen; malik xaqu yamaatoonuh idni luk yenen.

¹⁵ Ta mari yemeete waqdi, malik keenik iyyeemih, «Anu inni barrah, inni-taamat-liyoh-an-maral ‹Yol am› 'yaanamih farmo teetih ruube'mmay, too farmo yok cintek, ahak maca abnam taysee? Xinto tannah taniimik maca abaanam tayse intaah? keenik iyye.

¹⁶ Too waqdi Mamukan, malik kee malik gubal taamita doolat marak iyyeemih, «Ku barra xaaftem dibuk koo hinnay, ku gubal taamita doolat mara kee, atu dardaarinnah amol akak enna 'ta labha inkih xaafte.

¹⁷ Ahak wadir ku barra ah abtem agbi yoobbek, kulli barra isi baqala buruttam baahele. ‹Malik isi barrak am iyyeh farmo ruube waqdi, kay barra kay amri cinteh› 'yaanam axcelon.

¹⁸ Doolat taamat kaxxa arac le marih agbi, a saakuk wadir, isinni baqoltik toh iyyoonu waanama. Ahaysa kulli ikkel agbi baqolti-yab yaabbem raaqeleeh; baqolti isi agabu lih qaduwwuttam qaada akkele.

¹⁹ <

²⁰ Atu amoytah elle tan baaxoy nabnah a gid takkehiyyal, a madqay atu teyyeeqehiyya yaabboonu waan waqdi, nikaacat yan agbi isi baqala assakaxxele. Baacoyta yakkay, gaddaali yakkay, barra baqala assakaxxele» 'yaanam kaak iyye.

²¹ Malik kee kay gubal taamita doolat mari tah yoobbe waqdi, ta fayu kaak yossokooteeniih; tonna leemik malik too usuk inxicca 'yem abe.

²² Kay dardaarinnih gubat enna 'ta rakaakayitteh inkih farmo ruubeeh, ruube farmol kulli mari le af kee kulli rasih le kutbet yuktubeh ruube. Farmoh ruubeemih, «Barra isi baqlih milkih gactay, buxah-amri baqli-gabat gacay» 'yaanam iyye.