2 Samuwel 8 - NABUWWA KEE MALIKWA

DAWUD DARIIFAL YAN MARAK QEEBIT YEYSE

¹ Waqla suggu 'yeenik lakal, Malik-Dawud Filistiin-marat qeebih qagteeh keenik yeyseh. Elle sugen baaxo keenik raaqiseh, abbootan keenik kale.

² Tohuk lakal kaadu Mooyab marak yeyseh. Sarrak carbit yibbixe mara baaxok bagul deerih ken hayya heeh, akatal ken kiyassa heeh, sidoc-sidoc yakke marih addak namma-namma num keenik beyak ken qide. Tohuk wadir Mooyab-mari kay gabat gaceh, gabbara kaah acayuk yenen.

³ Sarrak kaadu Suuriyah rasuk Xooba deqsita aracal malikih suge Hadad-Qeder deqsita numuy Racob deqsita numih baxak yenehiyyat qeebi abeeh kaak yeyseh. Hadad-Qeder, Furaat weeqaytuk daga raqta exxat raqta baaxo gacsa'gidih, gexak suge waqdi,

⁴ Dawud alfi kee malcina boolih qaskaritay faras amok qeebi aba kee, ibi qaskarak labaatanni alfih num kaak yibbixe. Woo faarisik bool takkem gaari edde beyaana'gidih raaqiseeh, raqqa 'te faariisak xukcuunul yiggileeh iba waysiise.

⁵ Dabaaqah Damaskol yen Suuriyah mari, Malik Hadad-Qeder catoh qaskar ruubeeniih; Dawud qeebil labaatanna kee namma alfih takke qaskar keenik qide.

⁶ Sarrak Damaskoh-rasih addal isi qaskar hee. Tohuk wadir too mari kay gubat gaceeh gabbara kaah agdayuk raaqe. Dawud qeebi elle abinnaan ikkel YALLI nasri kaah yecee.

⁷ Malik Hadad-Qeder gubal ten doolat abbobti luk sugte mango goobuy dahabak bicseenihiyya carbit keenik raaqiseeh, too gooba Yarusalaam magaala fan guure.

⁸ Kalah kaadu, Hadad-Qeder abbah elle suge namma magaalay Betac kee Berootay deqsittahiyyak mango nacaas bee.

⁹ Sarrak Hamat-rasul yen malikiy Tooqi deqsitahiyya, Dawud, Hadad-Qeder qaskarak inkih yeyseh 'yaanam yoobbe waqdi,

¹⁰ isi baxay migaaqah Yooram deqsitahiyya kaal ruube. Too baxak iyyeemih, «Naharak, ‹Salaamata kok iyye› kaak inxicaay, sarrak ‹Unkaq kok iyyeh, Hadad-Qederik qeebil teyseemi kok iyye› kaak inxic. A duyyey dahab kee lakqo kee nacaasak bicseenihiyya gabat kaah beyaay, ‹Mattacoh koh ruube› kaak inxic» iyye. Hadad-Qeder mango waqdi Tooqi deqsita malikit qeebi abak suge.

^11-12 Malik Dawud too duyyey too malik kaah ruubehiyya YALLIH qibaadah tuxxiiqit elle assa innah abe. Tohuk kalah Edom kee Mooyab kee Qammon kee Filistiin kee Qamaalek deqsita maray qeebil akak yeysehiyyak dannabah orbise dahab kee lakqo, ta duyye lih hayya heeh, YALLIH qibaadah tuxxiqit elle assa innah abe.

¹³ Qasbô-Golo deqsita aracal Edom marak taban kee bacra alfih num qidda heeh yuduurek wadir, migaq kaak antaabbuk yontoobbe.

¹⁴ Sarrak inkih yan Edom rasul isi qaskar hee. Tokkel suggu 'ye mari kay gubat gace. Dawud elle gexinnaan ikkel abinnaan qeebil, YALLI nasri kaah acayuk yen.

¹⁵ Tonnal Dawud inkih yan Israayil rasuk amoyta yekkeeh, abbah akak yan mara inkih cakki kee qadaalatat xiinisak suge.

¹⁶ Yowabay Xaruya deqsitta barrah baxak yenehiyya qaskarak inkih abbah yen. Aciilúd-Yacoosafat deqsita num tikka intem yaktube numuk ten.

¹⁷ Aciitúb-Saaduk deqsita num kee Abiyatáar-Acimalek diini abbootan luk yenen. Seraaya deqsita num kaadu malikik kutbe-abeenah yen.

¹⁸ Yoyadáq-Banaaya Dawudut dacayrih tan qaskarih abbah yen. Dawud xaylo seekâ-taama luk sugen.