2 Samuwel 7 - NABUWWA KEE MALIKWA

YALLI DAWUDU LIH HEE QAHDI

¹ Malik Dawud buxah isi qaril yeneeh; YALLI kaadu naqboytiitik inkih amaanah kaa abbaxuk yen.

² Ayrok teena Dawud, Nabi Naatanak iyyeemih, «Anu akkel, akah table'nnah, innih sariidâ-cooxuk bicsen qarih addal ani'mmay, Yallih Qahdih Sandug uxih siraq addat yanik; ahak maca abam taysee?» iyye.

³ Too waqdi Naatan kaal gacsemii, «YALLI lih yanim kook; kot ceelinnaanim ab» kaak iyye.

⁴ Takkay immay too bar YALLI Naatan lih yaabeeh iyyeemih,

⁵ «Gexay yi naqasu Dawuduk intaamah, ‹YALLI, «Anu addat akak gacu waa qari yoh xissu waytam koo hinna» kok iyyah yan› kaak inxic.

⁶ ‹Israayil mara Masrik eyyeeqeemiiy akke fanah qarit magaciyyo. Kulli way siraq addat sugeeh, aracaak arac too siraaqat gexak suge.

⁷ Israayil mara lih mango safar abe'mmay, ahaydumah Israayil abbobtiy innih reedisehiyyak, «Qibaadâ-Qariy sariidak bicseenihiyya macah yoh bicise waytan?» akak exce abba mayyu›.

⁸ «Tonna'mmay taway yi naqasu Dawuduk intaamah, ‹YALLAY Nabaamak Nabahiyya kok iyyaamah, Edde sugte illi duwak kalla koo heeh, Israayil ummattak inkih abba koo abe.

⁹ Atu gexinnaan ikke ko'lih gexak suge. Atu fooca fanah akah gutuqta'nnah, naqboytiitik qeebil koo aysiisuk suge. Uxih a addunyah bagul kaxxa migaq-gexxo le marak kaxxihii, kaxxa migaq kot heeyyo.

^10-11 Israayil ummattay inni mara abehiyya, sinam keenit xukkute'kal, elle gacoonu waan aracal ken nookiseh an. A baaxo culeenim kee akke fan umeynit qeebi keenit abak sugte'mmay, ahak wadir woh gaba kalele. Koo kaadu naqboytiitik amaanah raaqiseyyooh, buxa innih koh xiseyyooh, ramad kok aymaggeyyo. Tohuh qahdi koh cula.

¹² Atu rabtaah isi kaxxa abbobti lih tamoogoqu wayta saaku, ku xaylok numuk teena malikih heeyyooh, kay reeda qande bahsiiseyyo.

¹³ Qibaadâ-Qari yoh xissu waytam, ku xaylok too numu. Kay reeda baxak baxal akah raqta'nnah abeyyo.

¹⁴ Anu innih abba kaah akkeyyooh; usuk kaadu baxi gideh yok gacele. Umam abah kaa ublek, abba baxa elle digaala'nnal kaa digaaleyyo ikkal,

¹⁵ Saawuluy atu arac akak raaqissehiyyak akah abe'nnah, abak suge cato kaak margiqa.

¹⁶ Ramad kok mabayaay, ku ramad kee ku doolat elle raaqeleeh, kulli way waarele› kaak inxic» iyye.

¹⁷ Sarrak Naatan amma 'yeh Dawuduh YALLI ta wacyil kaak iyyem warse.

DAWUD ABE CANDU-GACSIYYA

¹⁸ Tohuk lakal Malik Dawud siraq adday YALLA-elle-yaqbudeenihiyya culla 'yeeh, tokkel daffa 'yeh fayla kee dooqa abe. Iyyeemih, «YALLAW, Mulki le Dageltaw, anu a axxul le maqaaney yoh abtehiyya geyam caddik le num hinniyo. Yoo kee yi buxah marak atu neh abteh tan maqaane, ni caddik fulta maqaane.

¹⁹ YALLAW, Mulki le Dageltaw, a saaku inkinnah duma neh abteh sugte maqaanek giffa 'ta maqaane neh abte. Yi ramadah kaadu sarrî dabaanal abtu waytaamat yabteh. Sahdaytu luk haysitta angaaraw tama'nnak tanih tan!

²⁰ Yooy ku naqasuh yanihiyya isih taaxigehik, anu maca axco!

²¹ Aham, atu xagnisseeh isih yoh faxxeemiy yoh abtu waytaama. Tah inkih yoh akah abtam, ku gita yoo barissa'gidi.

²² YALLAW, Mulki le Dageltaw, ku nabna celtam matan. Ku bis lem matan. Yalli dibuk koo kinnim dumaak aaxaguk sugne. Yalli dibuk kooy; kok sah Yalli mayana.

²³ Israayil ummattay isi mara abta'gidih naqoosinnak teyyeeqehiyyah bis le doolat addunyâ-bagul matan. Atu keenih abte kaxxa taama ku migaq addunyâ-bagul fayya hayte. Ku maray duma Masril edde suge naqoosinnak teyyeeqehiyya, qeebil bisoh gutuqak elle yamaateenimil, ken taagah wokkel suge mara baaxok teyyeeqeeh, Yalla 'yeenih aqbuduk sugen duyye baaxok kalteh.

²⁴ YALLAW, Israayil mara isi maray way ayxeere waytahiyya abteeh; atu isih Dagelta keenih tekke.

²⁵ «Dagelta kinni YALLAW, yooy ku naqasu kinni kee yi marah culte xagana xagur. Abeyyo intem neh ab.

²⁶ Tonnal ku migaq antaabbeleeh; sahda inkih, ‹YALLAY Nabaamak Nabahiyya Israayil ummatak amol yan› 'yaanam axcele. Yi dardaarinna kaadu baxak baxal ku foocal raaqa dardaarinnay baye waahiyya abetto.

²⁷ YALLAW, Israayil dooreh, Nabaamak Naba Dageltaw, ‹Buxa innih koh xiseyyooh, ramad kok aymaggeyyo› 'yaanam yok inte. Tonna-leemiik a dooqa edde aba niya yot gacte.

²⁸ «YALLAW, Mulki le Dageltaw, atu Yalla kinnito. Yooy ku naqasu kinnihiyyah muxxo le xagana culteh tani'mmay, ku qangara digga le qangara kinnim aaxigeh.

²⁹ Yok radda inteemih reeda baxak baxal akah raqta innah, isi barkat keenit hay. YALLAW, Mulki le Dageltaw, tah kaadu atu isih xagana akah culteemi. Tonna-leemiik, atu elle inte innal, yooy ku naqasuh yanik radda 'ya marat barkat kulli way heettom aaxigeh» 'yaanam iyye.