2 Samuwel 6 - NABUWWA KEE MALIKWA

QAHDI-SANDUG YARUSALAAM BEEN

¹ Dawud kaadu qagseh Israayil rasul tan qaskarih addak soddom alfih qaskariitay doorehiyyak

² foocat gacca 'yeh, Yallih Qahdi addat akak yan Sandug, Baqla deqsita aracay Yuudâ rasul yanihiyyak baaha'gidih, gexe. Woo Sandug migaq akak lem, Nabaamak Naba YALLAY dardaarinni-korsi akak galwa leemik daga le kabu raqtahiyya.

^3-4 Woo Sandug, Abinadab deqsita numuy qaleh amol buxa luk yenehiyyah qarih addal suge. Tokkek beyya heenih qusba gaariy awurwa giitak beytahiyyal hayya heenih been. Abinadab xayloy migaaqah Qudda kee Acyo deqsitak tenehiyya woo gaari miraacisak teneeh; Acyo keenik foocat gacca 'yeh gexe.

⁵ Too waqdi Dawud kee Israayil ummattak wokkel sugga 'tem inkih, gital YALLIH massakaxxah kaa saarisakaay argaduk gexxe. *Begena kee kiraraay karambo kee giyaagib kee kakac inta duyye aagarukuuy YALLA saarisak yirgiden.

⁶ Nakon deqsita num luk suge aracay darok caffa elle baxsaanahiyya gufen waqdi, Yallih Qahdi addat akak yan Sandug elle yan gaari beyak sugte awurwa tondofoofoleh. Too waqdi Qudda deqsita num Sandug radaamak gabah yibbixeeh rade kaleh.

⁷ YALLI too waqdi bagcarriteeh; toh Quddah raba xalte. Ta rabi kaa akah yibbixem, Yallat luk suge baaqid sinna. Qudda tokkel elle, Yallih Qahdi addat akak yan Sanduguk garit rabe.

⁸ Dawud, YALLI bagcarriteh Qudda digaalem yuble waqdi, yinqibeh. Tohuk wadir too aracak Fares-Qudda axcuk raaqen.

⁹ Too ayro Dawud YALLAK meysitak raaqeeh; «Ahaysa, YALLIH Qahdi addat akak yan Sandug yi magaala fan beyam matakka» iyye.

¹⁰ Woo Sandug Yarusalaam magaala beyam mafaxinnaay, sarrak gexak suge gitak wadir enkeleelebba 'yeh, Yoobad-Edom deqsita numuy Gat deqsitta magaalal yoobokehiyyah buxa fan bee.

¹¹ Too numih buxal too Sandug sidiica alsa suge. YALLI Yoobad-Edom kee kay buxah marat inkih barkat hee.

¹² Malik Dawud Yallih Qahdi addat akak yan Sanduguk gexxaamah, YALLI Yoobad-Edom kee kay buxah marat barkat hee 'yaanam yoobbe waqdi, gexeh, woo Sandug Yarusalaam fan baahe. Gital too Sandugih-bahti kaxxam assakaxxayuk africuk yemeeten.

¹³ YALLIH Qahdi addat akak yan Sandug quukah yabbixe mari, lica maaqattah gide foocah gexxa iyyen waqdi, Dawud, «Idiya» keenik iyyeeh, yeeden. Too waqdi Yallih migaaqal sadgatah awur kee nagay mulkuqusen rugaytu yusguude.

¹⁴ Sarrak Dawud, *baftak bicsen footay rikek tanihiyya ittikiyya heeh, YALLIH massakaxxah quuruk leemik yirgide.

¹⁵ Tonnal kaa kee Israayil ummat YALLIH Qahdi addat akak yan Sandug qililisakaay *baanta aagaruk farcatat Yarusalaam fan baahen.

¹⁶ Sandug Yarusalaam magaala culsan waqdi, Saawuluk raqte baxáy, migaaqah Miikal deqsitak teneeh Dawud abbaxuk yenehiyya, taagatak afah wagga hayte. Too waqdi tet baqalay YALLIH massakaxxah wonnak annah kaqitaah, taahirik tan rigdoh yargidehiyya tuble. Toh tuble waqdi, «Ah tu'numuk tanih matan» 'yaanam niyal hayteeh kaa burutteh.

¹⁷ Sarrak Sandug baaheeniih, Dawud dumaak Sandug elle hoonuh sooliseh suge siraqih addat heen. Tohuk wadir Dawud YALLIH sadgatah cado akak carrisan saq qideeh, kaadu amaanah xiinaanamih asta takke'gidih YALLAH sadgat abe.

¹⁸ Dawud sadgatak gaba kalla hee waqdi, YALLAY Nabaamak Nabahiyyah migaaqal, tokkel suge marah inkih dooqa abe.

¹⁹ Sarrak Israayil marak lab-mara kee say marah inkih, gaqamboh ikke kee solal alaysen cadoh ikke kee, kafsen qinab-xaylok tu'baxa takkem keenih keefe. Tohuk gaba kaleenik lakal, kulli num isi buxah keenik gexe.

²⁰ Sarrak Dawud isi buxah marah dooqa aba'gidih yemeete waqdi, Miikal qari afal kaah garayteeh, too waqdi kaak intemii, «Kamba a saaku Israayil amoytaw, kaxxam migaq is teymeeqe! Isi gubal taamita marih baxuuwuy ken naqoosah yanihiyyah foocal, duqur innah qasunuk is hayya hayteeh; kamba migaq is teymeeqeh!» kaak inte.

²¹ Dawud teetil gacseemih, «YALLAY ku abba kee ku tooboko kalla heeh Israayil malikih yoo heehiyyah massakaxxah argaduk sugem numma. YALLIH massakaxxah uxih argideyyo.

²² Anu wohuk muxxi abeyyooh, inni migaq aysammeyyo'mmay, ta baxuuwih intit kaxxa numuk loowimeyyo» teetik iyye.

²³ Saawul-baxá Miikal maxalayto tekke.