2 Samuwel 5 - NABUWWA KEE MALIKWA

DAWUD INKIH YAN ISRAAYILIK MALIK YEKKE

¹ Tohuk lakal inkih tan Israayil kedooda Dawudul temeeteeh, kaak iyyeenimih, «Nanu ku lafaay, ku cadoyta kinninooh;

² duma Saawul suge saaku carbi yakke way, ni marih foocat sugtem kook ten. YALLI kaadu isi mara miraacisah dacrisa abba koo abeleemih qahdi koh culeh yen» kaak iyyen.

³ Israayilik saqoltih yan mari toh axcuk Cebroonul kaal yemeeten saaku, Dawud kee Israayil ummatak saqoltih yen mari YALLIH foocal xagana tittah culen. Sarrak kaa yuskuteeniih; usuk tohuk wadir Israayil malik yekke.

⁴ Dawud malik yekke saaku qumrik soddomut yen. Sarrak malikih morootom sanat suge.

⁵ Cebron-magaalal suge saaku, Yuudâ-marak malcina sanat kee lica alsa malikih suge. Yarusalaam magaalal Israayil kee Yuudak inkih, soddom kee sidooca sanat malikih suge. Toh tittat morootom sanatah tamaate.

DAWUD YARUSALAAM IS MAGAALA ABE

⁶ Dawud naharak Yarusalaam magaalal yabbaxu waa saaku, wokkel guubuh suge Yabuusa deqsita mari woo magaala qeebil keenik raaqiselem makkalinnoonuuy; tohuk gexxaamah kaak iyyeenimih, «A magaala cultu madudda. A magaalal taniimik dibuk inti-maleela kee iba-maleela kinni way koo culi mahayta» kaak iyyen.

⁷ Dawuduh tu gactek, Siyon qalel sugte megdebwa keenik raaqiseeh; tohuk wadir migaaqah Dawud-Magaala deqsitte.

⁸ Yarusalaam magaalah adda culta lee elle bicseenim, boolok addak boohaysen gablah innah yan aracay lee adda akak darah obtahiyya bicseenih yeneeniih; too lee magaalat maroh tan gasoh guba gacca 'teh too gablah addaak edde taade qeela fanah darah oobak ten. Dawud Yarusalaam magaala yibbixe saaku iyyeemih, «Yabuusâ maray inti maleela kee iba maleela akak iyyaanahiyya yi gide yanqibe num siinit yenek, woo leek adda gacca 'xicay gexay, woo maray yi naqboytiitih yanihiyya qida» iyye. Too ayrok wadir, «Inti-maleela kee iba-maleela qari cultu madudda» 'yaanam yaabah raqte.

⁹ Megdebwa teetik yibbixeenik wadir, Dawud dabqah teetil gaceeh, «Dawud-Magaala» 'yaanam migaaqah teetih yeyyeeqen. Naharak ayrô-mawqa le kabut raqta baaxoy ramma luk sugte missoysak baahak, tet dariifal magaala xisen.

¹⁰ YALLAY Nabaamak Naba Dagelta kinnihiyya Dawud lih yeneeh; tonna-leemik Dawud qandeh ayrook ayro aysuk yeyse.

¹¹ Suur malikih yen Curam, doolat-abbobti Dawud fan ruube. Woo mara luk, sariidâ-coox kee, naggaarinnah cooxuk duyye bicsa mara kee, xeet-qarwah-xiso yaaxige mara, Dawuduh malik elle gaca qari xisaana'gidih, ruube. Too mari too qari kaah xise.

¹² Dawuduuy, YALLI Israayil malik kaa abeeh, kay dardaarinna Israayil marih taagah fayya heem yeexegeh.

¹³ Cebron magaalak Yarusalaam fanah buxa yeyseerrek wadir, Dawud mango agabu caggoh luk yeneeh, tonnah kaadu, caggô-gubbih caggoh nikaacat le agabuk mangom luk yen. Lab-xaylok kee say-xaylok mangom xale.

¹⁴ Yarusalaam magaalal lab-xaylok xalem, Sammuqa kee Soobab kee Naatan kee Suleeman kee

¹⁵ Yibcar kee Alisuwaq kee Nefeg kee Yafiyaq kee

¹⁶ Alisamaq kee Elyadaq kee Elifalatak ten.

*FILISTIIN MARAK QEEBIT YEYSEN

¹⁷ *Filistiin-mari Dawud malik yekke 'yaanam yoobben waqdi, mango qaskar haysitta heenih kay mabbuuxuh gexen. Dawud toh yoobbe waqdi, sasoh meqe arac elle geya'kke fan gexe.

¹⁸ Filistiin-mari Refaayim Golo deqsitta golo gufen waqdi elle yinfiddigen.

¹⁹ Dawud YALLAK fayu essereeh, «YALLAW, Filistiin-marat qeebi maay aboo? Qeebi keenit abek, nasri yoh maay acee litoo?» axcuk Yallal essero essere. YALLI kaal gacseemih, «Yeeyik, keenik koo aysiiseyyok, gexay qeebi keenit ab» 'yaanam kaal gacse.

²⁰ Too waqdi Dawud Baqal-Faraadim fan gexeeh, qeebi keenit abeeh, tokkel keenik yeyseh. Sarrak iyyemii, «YALLI yi naqboytit weeqi innah duufut bee» iyye. Tohuk gexxaamah too aracak migaaqah Baqal-Faraadim iyyen.

²¹ Filistiin-mari kude waqdi, Yallih aftok aqbuduk sugen duyye elle cabeenih kuden. Sarra too duyye Dawud mari gabat luk gexen.

²² Filistiin-mari kaadu qagteh yemeeteeh Refaayim-Golol yinfiddigen.

²³ Too waqdi Dawud kaadu qagseh YALLAK, «Maca aboo?» iyye. YALLI kaak iyyeemih, «Away elle tani'kkeek qeebi keenit maabinay; darre le kabuk maro keenit hayya haay, woo coox elle yani'kkeek qeebi abta'gidih bical gac.

²⁴ Tokkek coox amook ibi maaqattah anay kol radu waa waqdi, qeebih gaba qid. Macaay intek, Filistiin-marak tayse'gidih, foocat anu kok gaceyyo» iyye.

²⁵ Too waqdi Dawud YALLI kaak ab elle inxicca 'ye innal abe. Tohuk gexxaamah, Filistiin-mara Gabaq-rasuk xabba haanamaay Geser-rasuh amma 'yaanam salafak xiiriyak been.