2 Samuwel 4 - NABUWWA KEE MALIKWA

ISBOSET ELLE RABE'NNA

¹ Saawul baxi Isboset, Abner Cebron magaalal qideeni 'yaanam yoobbe waqdi, meysi kaat hayteeh, inkih yan Israayil mari kaadu wariggiteh.

² Saawuluk raaqe baxi, kay gaadile warar abte waqdi, naqboytiitik midir buubte qaskar-abbobtik nammay luk yen. Ta qaskar abbobtih nammay migaaqah Baqna kee Rekab deqsitak yenen. Namma toobokoytak yeneenih; akah yoobokeenim, Benyam kedok ten. Ken abba Rimmon deqsita numuk teneeh, Beerot deqsitta magaalal dabqah yen. Beerot, Benyam kedo dabaaqah elle sugte magaalak ten.

³ Dumah teetil dabaaqah suge mari tet cabeh, Gittayim deqsitta magaala fan kuden. Tohuk wadir tokkel elle guubuh gacen.

⁴ Yonaatanak baxi raaqeeh, too awki namma ibak qelela luk yen. Abba kee kaxxa abba Saawul raba Yidraqel magaalak baahen saaku, barak koona karmat suge. Ibak elle biyaakitem, a xaagu toobbe waqdi, kaa abbaxuk sugte barra kaa tukkuqeh kudak sugte waqdi gabak teetik yuftuceeh, baaxol rade. Tohuk wadir namma ibak qelela luk raaqe. Migaaqah Mafiboset deqsitak yen.

⁵ Ayrok teena taaxige gaadileh abbobtih yen toobokoh nammay Isboset buxah gexen. Isboset laqo buxal silaalita waqdi yemeeten.

^6-7 Qari afal kamadi faxak yemeete mara cella heenih Isboset elle yan qarik addal raden. Qari adda culen waqdi, Isboset qarkaytok bagul xiinit keenih suge. Too waqdi gile bagut kaak heenih kaa qideenih, isinnih salakka 'yeenih gexen. Moyya kaak kalla heenih gabat luk gexen. Inkih yan bar Ordon golok adda gacca 'yeenih kuulak xiinen.

⁸ Sarrak yirgiqen moyyay gabat baaheenihiyya Malik Dawuduy Cebron magaalal sugehiyyal yeceen. Too waqdi kaak iyyeenimih, «Saawuluy kok naqboytah sugeeh koo qidam faxak sugehiyyah baxih moyya bahneh, amah teetiiy; tonna'mmay ni amoytaw, YALLI, Saawul kee Saawul buxah marak cane koh gacsem ta saaku!» iyyen.

^9-11 Too waqdi Dawud keenik iyyemii, «Duma Xiklag-magaalal suge saaku, Saawul-raba baahe num meqe xaagu yoh baahem akkaluk yemeete'mmay, too num xabba heeh, ‹Kaa qida› exceeh kaa qideenih. Usuk baahem yekkele meqe xaagih galtoh toh kaah abe. Hay, isin tu baahe wee numuy isi buxah addal xiinit yanil culla 'teenih kaa qiden. Annah tan umaane abten waqdi, siinil baahu waam mannah tanim siinit celtaa? Ta numut abten rabih caneh addunyâ bagul sin cabe waamah, waara YALLAY mango umaanek yoo catehiyyah migaaqal siinih xiibita» keenik iyye.

¹² Tohuk lakal isi qaskarak, «A namma num qida» 'yaanamih amri yecee. Too qaskar Rekab kee Baqna qiddeeh, iba kee gaba keenik kalla heenih raaqe xagar magaalah addal yen dorih garil keenik takaren. Isboset-moyyaay beyya heenih too magaalal yen Abner-kabrih addat yoogoqen.