2 Samuwel 3 - NABUWWA KEE MALIKWA

¹ Saawuluk raaqe buxah marih kabu yan mara kee, Dawud kabu yan marih fanat yakke qeebi mango sanootah akkuk suge. Dawud caylah aysuk yeyseeh; kay naqboytit boolaatak boolatte.

DAWUD LAB-XAYLO

² Dawud Cebroonul lab-xaylok leceey xale. Naharsi-baxi kaak migaaqah Amnon deqsitak yen. Too awki inak Acinooqam deqsitta barrah baxak ten. Kay ina elle toobokem, Yidraqel deqsitta magaalak ten.

³ Nammeyhaak xale baxi kaak migaaqah Kilab deqsitak yen. Too awkih ina kaadu Abiigal deqsitta barrak ten. Ta barra kaak dumal Nabal deqsita numuy Karmel deqsita aracal dabqah yenehiyya abbaxuk yen. Usuk rabe saaku gubnah elle raqte ikkel Dawud tet abite. Sidochaytô-baxi kaak migaaqah Absalaam deqsitak yen. Ta awkih ina kaadu Maqka deqsitta barrak ten. Tet abba Gasur deqsitta baaxoh malikik yeneeh; migaaqah Talmayi kaak axcuk yenen.

⁴ Fereyhaytô-baxi migaaqah Qadoona deqsitak yen. Kay ina migaaqah Caggit deqsitak ten. Konoyhaytô-baxi kaak Safatya deqsitak yen. Ta awkih ina Abiital deqsitta barrak ten.

⁵ Laceyhaytô-baxi kaadu Yitraqam deqsitak yen. Too awkih ina Qegla deqsitta barrak ten. Ta lica awki inkih elle yoobokem, Cebron deqsitta magaalak ten.

ABNER DAWUD QAXAT GACE

⁶ Saawul kee Dawud marih fanal qeebi bisoh gexak elle gexaamal, Saawul marih addat Abner qandeh aysuk yeyse.

⁷ Saawuluk raqte gubnay migaaqah Ayyá-Rixfa deqsittahiyyak ten. Too barra Saawul caggoh gubih caggoytak ten. Ayrok teena, Isboset deqsita Saawuluk raaqe baxi Abnerik malkite. Iyyemii, «Yi abbak raqte barra akah caraamissam macaay?» kaak iyye.

⁸ Abner toh yoobbe waqdi bagcarriteeh iyyeemih, «Kutay waqdiiy numut taba yoo maay takkale?» iyye. Kaadu qagseh iyyemii, «Ta saaku fanah ku abbak raaqe buxah mara kee kay ahli kee kay kataysis lih baguuk an. Dawud marak taham fanah gaci sin mahanniyo. Yooy tohut yanik atu a saaku, ‹Abner yi abbak raqte barrat fido faxe› 'yaanam yol haytaa?

^9-10 YALLI duma Dawuduk, ‹Saawul kee Saawul-xaylok dardaarinna beyya heeh ku gabal heeyyo. Israayil kee Yuudâ rasuk inkih malik koo abeyyo› 'yaanam iyyeh yen. Anu taham inni gabal duudussa hee week, Yalli yoo bayisay» iyye.

¹¹ Tohuk lakal Isboset qangara kaal magacsinnaay kaak meysiteh raaqe.

¹² Sarrak Abner Dawuduy woo saaku Cebron deqsita aracal guubuh yenehiyya fanah farmo ruube. Iyyeemih, «A baaxo xiinisu waa abba tanim iyya takkale? Yo'lih bica haysitaay, tonnal inkih yan Israayil rasih marak koo aysiiseyyooh, ku qaxat ken raaqiseyyo» 'yaanamih farmo kaah ruube.

¹³ Too farmol Dawud kaak iyyeemih, «Meqeh, bica ko'lih abeyyo'mmay, naharak inki tiyal titta geynaama. Toh maa tiyaay intek, yi fan tamaate saaku Saawul baxá Miikal gabat yoh bahtaama» 'yaanam kaal gacse.

¹⁴ Isboset kaadu farmo ruubeeh iyyeemih, «Rihimih Filistiin marak bool numih komborih arab elle ecee Miikal yoh gacis. Miikal yi barrak, yoh gacis» kaak iyye.

¹⁵ Toh yoobbe waqdi Isboset tet abbaxuk suge numuy migaaqah Laysá-Faltiyel deqsitak yenehiyyah farmo rubbu heeh bahsiise.

¹⁶ Faltiyel, barra kaak Bacurim deqsitta magaala guffa haytam fanah weeqak tet katayak suge. Sarrak Abner, «Gexay, isi buxah uduur» kaak iyye waqdi yuduure.

¹⁷ Abner Israayil-abbobti fanah gexeeh keenik iyyeemih, «Dawud malik siinik yakkem mango sanootah faxxeenih sugteenik,

¹⁸ taway too nasiib geyteenihik, isinnik maruubina. YALLI duma Dawuduk iyyemii, ‹Dawuduy yi naqasuh yanih gabat Israayil ummattay yi ummattah tanihiyya Filistiin-mara kee kalah tan naqboytiitik ayyaaqeyyo› iyyeh yenek, ta saaku kaa doorita» keenik iyye.

¹⁹ Abner kaadu Benyam kedo lih too qaadat yaabeh. Sarrak Israayil marak tu cabe'kal, Benyam kedoh agantah edde cabtem, Dawuduh warsa'gidih, Cebron fanah gexe.

²⁰ Abner labaatanni num wakalih is lih hayya heeh yemeete. Too saaku Dawud kaxxa qibnaytiino kaah abe.

²¹ Abner kaak iyyemii, «Taway Israayil mara ku gabah gacsa'gidih gexu waa. Oson ko'lih bica haysiteloonuh isinni malik koo abelon. Too waqdi faxak sugtem geettooh inkih tan baaxoh amoyta akketto» kaak iyye. Too waqdi Dawud num kaa xage waamih digga kaah warseh muquk kaa ruube.

YOWAB, ABNER QIDE

²² Tohuk lakal Yowab kee gersi qaskar abbobti akah gexxeh sugte gaaduk tuduureeh, mango duyye dannabah gabat baahen. Cebron fan yemeeten waqdi, Dawud amaanah kaa ruubeemih sabbatah, Abner Cebroonul masuginna.

²³ Yowab kee kaa'lih gexxe qaskar temeete waqdi, Abner malikil yemeeteeh malik amaanah kaa ruube 'yaanam yoobben.

^24-25 Too waqdi Yowab malikil gexeeh iyyemii, «A abtem macaa? Abner kol yemeete waqdi, Gexay, kaa intee? Akke akah yemeetem, koo duquurusa'gidiiy atu gexxa'kke kee atu abtam wagta'gidi. Atu isih kinni num kaak taaxige way, anni'nnal gexay kaa inte?» iyye.

²⁶ Yowab sarrak Dawud garik gexeeh, Abner lakat farmo ruube. Farmoh ruuben mari Abner Siira deqsita qeelih garik baahen. Dawuduh tu gactek, toh maabbinna.

²⁷ Abner Cebron-magaalah-culmeyna gufe waqdi, Yowab giti qaxa garayah kaa beyam cella heeh gile bagut kaak hee. Abner, duma Yowab toobokoytay Qasahel deqsita qideh sugeemih sabbatah, tonnal rabe.

²⁸ Dawud woh yoobbe waqdi, «Yoo kee yi mara Abner rabat gaba alle waynam YALLI neh yaaxigeh.

²⁹ Abner-biili Yowab kee kay buxah mara yabbaxay. Boda kee baras kay durruyyat cabe waytay, caxxal rekitak gexa num keenit waytime waay. Carbi kee qulul ken cabe waytay» iyye.

³⁰ Yowab kee kay toobokoyta Abiisay, Abner qiddeeh; akah kaa qideenim, Gibqon rasul yekke carbit toobokoyta keenik qideh sugeemih sabbata.

³¹ Tohuk lakal Dawud Yowab kee raqqa 'ye maray kaa'lih sugehiyyak, «Sara isinnik qanxisaay qabuudut gacaay Abner rabah rookita» iyye. Too saaku Malik Dawud isih ginaadak lakat gacca 'yeh gexe.

³² Sarrak lafa Cebron-magaalal yoogoqeeniih; too waqdi malik kaxxam weeqeeh; kay lakat ummatta inkih weqte.

^33-34 Dawud weeqe waqdi, weeqah iyyeemih, «Abner siftayti'nnah rabeh yan. Too umaane faxxiimak mananna. Gaboobi kaak toxeem manannaay; iba kaak toxeem mananna'mmay, umeynit qidde numih innal, kaa qideenih; rooci kaak yewqe. Usuk siftayti gurral rabe» xarraqitak iyye. Too waqdi tokkel suge mari kaadu weeqeh.

³⁵ Tohuk lakal tokkel suggu 'ye mari Dawudul yemeeteeh, «Ayro tan way maaqo ukumey» 'yeenih kaa kallacen. Takkay immay Dawud, «Yalli yoo qiday, bari yakkeemik naharat maaqo akme waamah» axcuk xiibite.

³⁶ Toh keenik iyye waqdi, kaak yossokooteeniih; usuk abinnaan taama yikcineenih yenen.

³⁷ Tohuk gexxaamah Dawud mara kee Israayil rasul suggu 'ye mari inkih Dawud Abner-rabat gaba aalle waam yeexegeenih.

³⁸ Sarrak Dawud isi ummattak iyyemii, «A saaku Israayil rasul rabe num misliiy kaxxa num kinnim mataaxigaanaa?

³⁹ Anu a saaku Yalli doore malik kinniyoh immay, boolaatem innik ableh an. Xaruyâ-xaylo yab yok taabbu cinteh; umam abe numul YALLI umam baahay» iyye.