2 Samuwel 24 - NABUWWA KEE MALIKWA

DAWUD ISRAAYIL UMMATTAK ABE LOOWO.

¹ YALLI qagisak Israayil ummatta yinqibeeh, Dawud gabat ken biyaakam faxe. Kaak iyyeemih, «Gexay Israayil kee Yuudah ummattak loowo abaay yakkeenih gide wagit» iyye.

² Too waqdi Dawud qaskar abbah yen Yowabah amri yeceeh iyyemii, «Qaskar abbobti lih gacca 'xicay, inkih tan Israayil kedooda elle geytimma 'ta baaxok, woo qaxaay a qaxa fanat, yakkeenih gide keenik looway am. Qadad keenik aaxigem faxak» iyye.

³ Yowab kaak iyyeemih, «Atu addunyal elle anuk, YALLAY ku Dageltah yanihiyya Israayil mara away yakkeenih gidek bool adda ken yaymaggay. Tonna'mmay annah taniimit macah assa?» kaak iyye.

⁴ Takkay immay Malik Dawud, kaa kee kaa'lih tan qaskar-abbobtik, «Anu siinik axcem aba» iyyeeh, too waqdi Israayil-ummatta loowaana'gidih kay garik ugteenih gexen.

⁵ Ordon-weeqaytuk tabba 'yeenih, golô-gudel tan magaala kee Qarooqer deqsitta magaalal loowo qimbisen. Sarrak Gaad-rasuk tabeenih, kiblatat raqta Yaqder deqsita arac fan gexen.

⁶ Sarrak Gilqad-rasu kee Kaadis deqsitta magaalay Ciitâ-rasul tanihiyya fanah gexen. Tohuk lakal kaadu Daan-Yaqan rasu fan gexen. Tokkek Sayda deqsitta magaala fan gexen.

⁷ Too magaalak gabbi-qaxal geytimta Suur-magaalay gaso maroh edde tanihiyya yemeeten. Tokkek Ciiwi kee Kanqaan magaalooli inkih yemeeten. Ellecabol Yuudâ-rasuk gabbi-qaxat raqte Bersabaq deqsitta magaala yemeeten.

⁸ Tonnal sagla alsa kee labaatanni ayroh addat inkih tan baaxo gufeenik lakal, Yarusalaam yuduuren.

⁹ Sarrak malikik iyyeenimii, «Israayil-rasul qaskarat gacu duuda marih loowo bacra boolih alfih num tekkeeh; Yuudâ-rasuluuy koona boolih alfih num yekken» iyyen.

TOH ABEEMIH TEKKE DIGAALA

¹⁰ Dawud ta marih loowok gaba kale waqdi, umam abem kay xagar kaah warse. Too waqdi, «YALLAW, kaxxa dambi lem baaheh aniih, duqur abe waamat aseh anik, qafu yoh ab» iyye.

¹¹ Dawud saaku xiinik ugutak dumal, YALLI, Gaad deqsita nabiy Dawuduh Yallih farmo baahak yenehiyyak iyyeemih,

¹² «Gexay Dawuduk intaamahaa, ‹Sidoocaamak taysem dooritaay, atu doorittem abeyyo› kaak inxic» iyyeeh; a sidoocam a nabih warissa heeh kaa ruube.

¹³ Dawud xiinik ugte waqdi, Gaad kaal yemeeteeh, YALLI kaah ruube farmo kaah warse. Kaak iyyeemih, «YALLI, ‹Sidooca sanatih qulul kee, sidooca alsa naqboytit koo ayraradduk sugtam kee, sidooca ayro tabu le dalka siinit ruubaamak, kol aysinnaanim doorit› kok iyye. Taway intu waytam cubbus; axcinnaanim YALLA fan gacsam faxak» kaak iyye.

¹⁴ Too waqdi Dawud iyyeemih, «Anu taway tu edde ceda caalatat anih maana'mmay, sahda yoo digaaltaamak YALLI isi gabat yoo digalsitay. Toh akah axcem, kaxxa racmatta le Dagelta kinnim kaak aaxigeemih axce» iyye.

¹⁵ Tohuk wadir YALLI Israayil rasul dalka ruubeeh; too saakih maacak xabba haanamaay Yalli isih woo lakima eyseedeyya haam fanah, inkih yan Israayil rasul malcina-tabanih alfih num too dalkat rabe.

¹⁶ Too dalkat sahda qidak suge malaykatti, Yarusalaam magaalah mara kaadu edde qidam faxak suge. Too waqdi YALLI a mara digaalaamak qaadeeh; malaykattuk, «Ahaysa qidim eyseedey sinaamak qiddem duddak» iyye. Woo malaykatti woo waqdi Ornan deqsita numuy Yabuusa deqsita marah yoobokehiyyah aracay darok caffa elle kalaanahiyyah garil soolak suge.

¹⁷ Dawud woo malaykattuy ummatta qidahiyya yubleeh, too waqdi YALLAK iyyeemih, «Qellatat asseeh ceele-waytih tanim abtem yook, too qellatah, yoo kee yi buxah mara akah digaal. A masaakiina maca bahteeh macah digaalta?» iyye.

DAWUD SADGAT ELLE ABAN ARAC BICSE

¹⁸ Too ayrot Gaad Dawud fan yemeeteeh, iyyeemih, «Ugutay Ornan le aracay daro caffak elle baxsaanahiyyal, YALLAH sadgat elle abtu wayta arac bicis» kaak iyye.

¹⁹ Dawud YALLI ab kaak iyyem oggoleeh; Gaad kaak gexa iyye ikke gexeh.

²⁰ Ornan addah wagga hee waqdi, malik kee kay gubal taamita maray kay fanah yamaatehiyya yuble. Too waqdi Dawuduk foocal massakaxxah qansah baaxo xagam fan qununna 'yeeh,

²¹ iyyemii, «Yi malikow, akke yoo fan macah temeetee?» iyye. Dawud kaal gacseemih, «Ku aracay darok caffa elle kaltahiyyal a lakimay sahda selahiyya nek gexa'gidih, YALLIH migaaqal sadgat elle aban arac haam faxaah, too arac kok xaama'gidih emeete» iyye.

²² Ornan, «Meqeh hay! Elli hay. Yallih migaaqal sadgatah isih faxxa haytam yok beetto. Sadgat elle aban aracal sadgatah qiddu wayta awurwa, ah kaanak, bey. Darok caffa edde kalan coox kee *madmad kaadu, ah kaanaay; sadgatah tasguudu wayta saqih cado elle alaysetto.

²³ Amoytaw, anu tohim inkih koh aceeh an» kaak iyye. Sarrak, «YALLAY ku Dagelta kinnihiyya atu abta sadgat koh oggolay» kaak iyye.

²⁴ Too tiyak malik kaal gacseemih, «Aleey, foyyah kok mabeyaay, kok xaameyyo. Tu edde ecee wee duyyet, sadgat inni Dageltah maaba» iyye. Sarrak too arac kee awurwa too numuh lakqok kontom garsi elle yecee.

²⁵ Limok gaba kale waqdi, YALLAH sadgat elle aban arac bicseeh; tohuk lakal woo aracal cado akak carrisan laa sadgatah elle qide. Tonnah kaadu, amaanah xiinaanamih astah aban sadgat abe. Too waqdi YALLI kay sadgat oggoleeh, lakimi Israayil baaxok inkih yeerreh.