2 Samuwel 23 - NABUWWA KEE MALIKWA

DAWUDUK ELLECABO QANGOORU

¹ Dawud ellecabol abe saare ah teeti. «Yiisá-Dawud iyya qangor ankacisey; Yalli kaxxa num abe numih qangor ankacisey. Yaqkuub doore Dageltay kulliimik nabahiyya, malik yakke'gidih doore numuy Israayil ummattah nabam meqe saare yeyyeeqehiyya iyyaamah:

² YALLIH *Roocaaniyya yot taniih; edde yaabam teetik gee yaaba. Yoo yaabissam, YALLI yoh yecee rooci.

³ Israayil doore Dagelti yaabeeh ken dacrisa Dagelti yok iyyeemih, ‹Qadaalat ummatta xiinisaah Yallih meysit xiinisa malik

⁴ qamburre sinni wallaqenti bis le; robti lakal tawqe ayroy baaxol qayso taysubukeh gide› 'yaanam iyye.

⁵ Yi buxa Yallih garil tonnah tanim yot celta. Macaay inteenik, Yalli yo'lih bica haysiteh, baye waa xagana yo'lih hee. Make waan xagana yo'lih heeh, akak kore waa qahdi yoh cule. Tonnal kulli waqdi yoo cateleeh, faxa axcem yoh abele. Yalli toh duuduselem digga le.

⁶ Yallal aamine waa mari baaxot qiden keenaanih gide. Gabah xageenik sahda mudda keenaanih gide.

⁷ Ken xageenik, birta kee macaxut ken xagan. Maraaqaanay cararak yambaxen» 'yaanam iyye.

DAWUDUK AGIIRAH TAN QASKARA

⁸ Dawud qaskarih addak agiirah ten qaskarih migaq ah kaana. Naharsi agirii, Yoseb-Basseebet deqsitak yeneeh; elle yoobokem, Tahkemon deqsita araca. ‹Yaaxigen Sidoc› deqsita marih abbah yen. Bacra bool yakke marat macaxut qeebi abeeh, inki saakih carbit too bacra boolih num selli hee.

⁹ Nammayhaytoh agiri Acowi-gulubuh yooboke Doodó-Alqedar deqsita numuk teneeh, Yaaxigen Sidocuk nammayhaytô numuh yen. Ayrok teena kaa kee Dawud Filistiin maray qeebih gaaboowehiyyat qeebi abeenih; too qeebil Israayil mari qeebik fanak keenik kude waqdi,

¹⁰ Alqedar isi aracak angayye'kal gaba kaak cawalah kaffa intam fan, Filistiin mara seefit selak suge. YALLI too saaku kaxxa nasri keenih yecee. Carbi gaba kale waqdi, Israayil mari Alqedar qeebit elle caben ikke yuduureeniih tokkel rabe marak silac kalen.

¹¹ Yaaxigen Sidocuk sidochaytuh tenem, Haraar rasul yooboke Aagâ-baxi Samma deqsita agiruk ten. Ayrok teena Laci deqsita rasul, missir elle yoobokeh yen buqreh garil, Filistiin mari qeebih mododeh suge. Israayil mari ken yuble waqdi yoowweh immay,

¹² Samma makudinnay buqreh addal elle yeede. Oson kaat aban atka isik waasak, afah-afah ken qide. Tonnal too ayro kaadu YALLI too qeebil kaa yiysiiseh.

¹³ «Yaaxigen Soddom» deqsita agiirak sidooca num daro edde orbisan uddurut Dawud fan yemeeten. Dawud too saaku Qadullam rasul tan gablah addal suge. Filistiin mari kaadu Refaayim Golo deqsitta golol addal yinfiddigeenih yenen.

¹⁴ Too saaku Dawud amô reebu le aracay uqurah meqehiyyal sugeeh; Filistiin mari Beetlacam magaala yibbixeh yen.

¹⁵ Sarrak Dawud isi baaxoh lee kassa heeh, too waqdi iyyeemih, «Beetlacam magaalah afal yan qeelih lee yoh baaha num genniyooy faxe raareh an» iyye.

¹⁶ Too waqdi too sidooca agiri Filistiin-mari elle yan aracak adda-adda gacca 'yeenih too qeelak lee qulla heenih Dawuduh baahen. Dawuduh tu gactek too leek maaqabinnay YALLIH sadgatah baaxot tet caxe.

¹⁷ Sarrak iyyemii, «YALLAW, a lee aaqubem yol matan. A lee a sidiica numuy isi roocih meysite'kah a marak adda gacca 'yeh a lee baahehiyyah qabala yaaqubeenimih bis le» iyye. Tohuk gexxaamah too lee maaqubinna. Woo sidooca agiruh tu gactek, ken abini wohuk wadir amixxiguk raaqe.

¹⁸ Yowabak toobokoytah yen Abiisay «Yaaxigen-Soddom» deqsita soddomuk abbah yen. Yowab kee Abiisay-ina Xaruya deqsitta barrak ten. Ayrok teena Abiisay inki macaxu luk sidooca bool yakke marat qeebi abeeh; too marak inkih yeyseh ken qideh.

¹⁹ Tonna-leemiik too Soddomih addat yimixxige agiruh raaqeeh, abba keenik yekke. Takkay immay «Yaaxigen Sidocih» inna migaq gexxoh luk mananna.

²⁰ Yoyadáq-Banaaya kaadu kaak kaxxih yamixxige agiruk ten. Banaaya elle yoobokem, Kabxaqel deqsitta magaalak ten. Banaaya abinnaan taamal qangik ten. Mooyab marak namma agiru qide. Ayrok teena arroqle le rob radak sugeeh; too ayro Banaaya boodoh adda cule waqdi, lubak kaah sugeeh; too lubak qideh.

²¹ Tohuk kalah kaadu kaxxam masu naba Masri-num qideeh, too num gabat macaxu luk yene'mmay, Banaaya naharak gabah caxxat kaa yoogoreeh, sarrak gabat luk suge macaxu gabak kaak bukkussa heeh, woo macaxut kaa qide.

^22-23 Toh agiruh yan Banaaya abe taama. Banaaya Yaaxigen Soddomih adoytak ten. A Soddomih addat migaaqat akak yabba yan numuk tene'mmay, Yaaxigen Sidoc gide migaq-gexxoh luk mananna. Dawud isit dacayrih tan qaskarak abba kaa abe.

²⁴ Yaaxigen Soddomuk Banaaya deqsita numuk kalih, adoytiitih migaq ah kaana. Yowab toobokoyta Qasahel kee, Doodó-Elcananay Beetlacamal yooboke kee,

²⁵ Samma kee Aliika deqsitta labhay Carodul tooboke kee,

²⁶ Feletil yooboke Celex kee, Qikkés-Qiira deqsita agiruy Takooqal yooboke kee,

²⁷ Qanatot magaalal yooboke Abiqeder kee, Cuusâ rasul yooboke Mabunnay kee,

²⁸ Ahowil yooboke Xalmon kee, Netoofal yooboke Mahray kee,

²⁹ Baqná-Celeb deqsita agiruy Netoofal yooboke kee, Riibáy-Ittay deqsita agiruy Benyam rasuk Gibqal yooboke kee,

³⁰ Banaaya deqsita agiruy Firqaton rasul yooboke kee, Gaqas goloh garil yooboke Hidday kee,

³¹ Arbatal yooboke Abiqalbon kee, Bacurim yooboke Qadmawet kee,

³² Saqalbonul yooboke Elyacba kee, Yaasen xaylo kee,

³³ Sammâ-Yonaatan deqsita agiruy Haraaral yooboke kee, Saarár-Aciyam deqsita agiruy Haraaral yooboke kee,

³⁴ Acasbúy-Elifalatay Maqkal yooboke kee, Acitoofál-Alyamay Gilô-rasul yooboke kee,

³⁵ Karmel rasul yooboke Cesro kee, Arbaq rasul yooboke Faqray kee,

³⁶ Xooba rasul yooboke Naatán-Yigal kee, Gaad rasul yooboke Baani kee,

³⁷ Qammon marah yooboke Xelek kee, Beerot rasul yooboke Nacarayay Yowab-macaxu akkuquk yenehiyya kee,

³⁸ Yitra deqsita gulubuh tooboke Qiira kee Gareeb deqsitta labhah nammey kee

³⁹ Ciitah yooboke Uriyya. Tittat soddom kee malcina agiru akkuk yenen.