2 Samuwel 22 - NABUWWA KEE MALIKWA

DAWUDUK MAYSO SAARE

¹ YALLII, Saawul kee Saawuluk kalah Dawuduk naqboytiitih yen marak, Dawud cateh; tohuk gexxaamah Dawud YALLA saarise.

^2-3 Saareh iyyeemih, Qaley wadbitaana, yoh tekkem, YALLAK ten. Reebuh liyom YALLA; usuk yi wadeena. Yi Goyti yi reebu; amaan akak geya. Gob innah yoo gamsa. Umaanek dacayriiy, wadeenah liyom kaa. YALLAW, umaane kee qeebik yoo waddam koo. Yi Goyti yi reebu.

⁴ YALLAH seeca waqdi, naqboytak yoo wada. Candi kaah yaguude.

⁵ Rabi yot xayyooweh, maraasiyot yoo hee; baati yoo raarisse.

⁶ Rabi yot xayyoowe, rabi oflot yoo qide. «Akeera oobah» exce.

⁷ Gadaamal kaah seece; «YALLAW! YALLAW!» exce. Kay Qibaadah-Qarik, yi kallaci yoobbe.

⁸ Yalli bagcarriteeh; baaxo dillibitteh. Qaranwak makroori tengeyyeh axaxxeh.

⁹ Yalli bagcarrite. Habug inta gira awaqih kaak tumbulle. Sahda takme xibcin kay afak tewqeh ten. Kay sanak yewqe qer gayran ceelak yewqe.

¹⁰ Qaran baxissa heeh, dagaak addah oobe. Ibak xibqih addat, qamburre kaak teneeh; kaxxa gaanib gace.

¹¹ Galwa leemih amol, ken xoxbisak gexe. Caacayat yumbulleh; caacay galwat kaa bee; sissikaanet kaa bee.

¹² Qamburre dariifa, Yalla maraasiyte. Tembegge qamburrey addat quukah rob le, Yalla maraasiyte.

¹³ Cankaxay bixiq 'ya Yallih foocat yanik, bolok iyya xibcin habugga iffa iyyeh yen.

¹⁴ Dagelti-xongolo qaraanak tontoobbe. Kakkaqô-xaw xaawe.

¹⁵ Ruube gaysê-baxi, naqboytiitit radeeh, fixixissa ken hee. Yalli ruube cankax, baaxok ken xiiriye.

¹⁶ YALLI bagcarriteeh, naqboytit yinqibe. Bad elle suge'kke, booxa tekkeh raqte. Baaxo korte waqdi, makra gubbil raqte.

¹⁷ Qaraanak yoo eleele, gabal yoo yibbixeeh, badak yoo yeyyeeqe.

¹⁸ Naqboytak yoo cateeh, ken gabak yoo wade. Anu effere marak, yi Goyti yoo cate.

¹⁹ Gadaamite saaku sahda yoo dadahte. Too way kay cato gee.

²⁰ Yi Goyti yoo wade. Yot abe kacanut naqboytak yoo wade. Kaxxa amaan yoh yeceeh, meqe aracal yoo hee.

²¹ Cakkik tanim abaah, tohul galto geya. Umaanet maasiyyooy tohul barkat yot hee.

²² YALLI aba iyyem abe; kay yab maciniyyo; Yalla mamakiyyo.

²³ Kay yab essekexxeeh, aba iyyem oggole; cine saaku mayyu.

²⁴ Qellatak tu mayyum, usuk yok yaaxigeh. Qellatak waasimaah; tohum yok yaaxigeh.

²⁵ Cakkik tanim abaah, tohuh galto geya. Galto YALLAK geya. Umaane sinniyom YALLI yok yaaxigeh.

²⁶ Kol digga 'ye marah, digga litoh, Yallaw. Qellat sinni marah, kaxxam miqto, YALLAW.

²⁷ Baguuk koh qaddoowaah gita gexa marah bagi-xabca lito. Mako leh yan mara, mako gacissa atu.

²⁸ Kaxxiinita mara, ramma hayta'gidih wagga hayta, YALLAW. Is rammisa marak rooci waddah, Yallaw.

²⁹ Ifu yok kinnito. YALLAW, yi Dageltaw, dite ifu yoh abte.

³⁰ Naqboytit aatakuh, cayla atu yoh tecee. Yot koysitaanamak, cayla atu yoh tecee.

³¹ Ku giti, ni Goytaw, manxu qaxa meqeeh, qellat sinni gita. YALLIH yab digga le. Goobuh kaa le mari reebuh kaa haysitan. Kay dacayrit yanin.

³² Naamine YALLAK sah gersi Yalli mayan. Nee dacrissam Yalla; kaak sa reebu mannu.

³³ Qande yoh taceem kaa. Edde gexa gita yol taymaaqem Yalla.

³⁴ Mandafoofola anu. Qarkumuddoh innal qaleeli amol an way, yoo dacrissam Yalla.

³⁵ Gaadu elle aban inna, yoo barissam Yalla. Gayset aba qeebi, yoo barissem Yalla.

³⁶ YALLAW, yoo dacrissah, umaane yok waassah. Yoh abte dacayrih, kaxxa num ekke anu.

³⁷ Andafoofaleemik, gita yoh missosse. Maftucinniyo anu.

³⁸ Naqboytiitik eyseh, yi gabat ken selte. Bayissa ken hee'kal aadem maduudiyyo.

³⁹ Keenit abe niksoh, muugutan; masoolan. Anu sella ken hee. Qangalaylut raaqen; yi ibih gubat raden.

⁴⁰ Gaaduh gexe saaku, qande yot haytem koo. Naqboytiitik eyseeh; yoo tiysiisem Yalla.

⁴¹ Naqboytit yok kuddeh; ken kudussem Yalla. Yoo yinqiben saaku, yi gabat ken sele.

⁴² Cato gorriseeniih, isinni cattam weenih. YALLAL cato esseren; keenik moggolinna.

⁴³ Bututtukka ken heeh; siisa ken celsiise. Giti-kallah innah, taqqa keenit exce.

⁴⁴ Yi maray yoo cinek yoo waddem koo, Yallaw. Mangoh tan baaxooxak amoytah yoo hayte; uxih ken abbah an. Anu ken maaxigaay, yoo yeexege mari yi xintoh gubat yan.

⁴⁵ Marin-baaxoh mari yi xaagu yoobbe way, foocal yoh rammiten. Aba axcem oggolan; yi yaabah rammitan.

⁴⁶ Niya keenik raddeeh; elle yenen gasok, cunxitak yamaaten.

⁴⁷ YALLI waara Goyta. Qaley wadbitaana, yoh tekkem yi Goyta. Fayla kaah taguude; Yallah fayla taafay. Umaanek yoo waddeh yoo dacrissam Yalla. Ummatey, warisa.

⁴⁸ Yoo niqbah yan marak, yoo tiysiisem YALLA; YALLAY yoo dacrisa, ummat yi gubat hee.

⁴⁹ Yoo niqbah yan marak, yoo tiysiiseh, Yallaw. Ken amol yoo hayte. Umaane aba marak atu isih yoo wadde.

⁵⁰ Tonnal koo faylisa; marin marih foocal, YALLAW, koo saarisa. Ku migaq saarisa.

⁵¹ Yoo Dawud dooritteeh, malikih yoo haytem, koo kinni, yi Rabbow. Kaxxa-iisa yoh tecee; kaxxa nasri kok gee. Yoo kee yok raddeemih, waartah tan maqaaney baye sinni tecee.