2 Samuwel 21 - NABUWWA KEE MALIKWA

SAAWULUK RADE MARAT TEKKEEMI

¹ Dawud malikih suge dabaanal qulul radeeh, woo qulul sidooca sanat suge. Too qululih sabbatah Malik Dawud YALLAL fayu essere. YALLI kaak iyyeemih, «Saawul kee kay buxah marat biili yan. Sahday qideeni biili uxih keenit yan. Qideenim Gibqon mara. Rob siinih akah rade waam tohu» kaak iyye.

² Gibqon mari Israayilih yooboke mara hinnoonuuy, Amoorah yooboke dago maray Israayil mari duma, ‹Sin maxagnay amo siinik dacrisenno› axcuk qahdi akah culeenihiyyak ten. Saawuluuy Israayil kee Yuudâ-marih taagah inkitanuuk ken bayisam faxeh yen.

³ Too waqdi Dawud Gibqon marah seeceeh keenik iyyemii, «YALLI doore marah dooqa abtaana'gidih, Saawul siinil baahe baatilik sin aymaaqem faxak, macal sin aymaaqooh?» keenik iyye.

⁴ Oson kaal gacseenimih, «Saawul kee kay buxah mara nel bahtem dahab kee lakqoh akak yamqeenim hinnaay, baatam hinna. Takkay immay toh net tekke inneh, Israayil mara qidnam niyat mannu» iyyen. Dawud, «Hay labhay, tonnal elle tamqeenim yoh warisay» keenik iyye.

⁵ Oson iyyeenimih, «Saawul nakkeemik sella nee heeh saabo nee cabsiisam faxe.

⁶ Taway nanu kaadu fanxam, Saawuluk rade marak labhâ-malciin gabal nek haytaama. Too mara, Gibqâ-magaalay duma YALLI malikih dooreh suge Saawul buxa elle luk sugehiyyak addal, YALLIH foocal takayrit ken qidnam fanxa» iyyen. Malik Dawud, «Too malcina num siinil aceeyyo, hay» keenik iyye.

⁷ Takkay immay kaa kee Yonaatan luk ten Yalla-kee-xaganih sabbatah, Yonaatanak raaqe baxay Mafiboset deqsitahiyya keenil maacannaay raaqiseh.

⁸ Armooni kee Mafiboset deqsitta labhay Saawul Ayyâ-baxá Rixfa deqsitta barrat xalehiyya kee, Saawul baxáy Meerab deqsitak tenehiyyah koona baxa beyya heeh gabal keenik hee. Meerab a koona baxa akah xaltem, Bardilláy-Qadriyel deqsita numuk ten. Woo num elle yoobokem, Macoola deqsita araca.

⁹ Dawud ta mara Gibqon marih gabal heeh; too mari qaleh amo beyya ken heeniih, tokkel YALLIH foocal ogot ken qiden. Ta malcina num titta lih qiden. Ken qideenim, yubqureenim edde orbisan waktil gabru deqsitta daro edde orobtam faxxa udduruk ten.

¹⁰ Saawuluk raqte gubnay Rixfa deqsitta, rabe marih ginaada takayruh elle tani ikkel, xixxaq amol qabudda fidissa hayteh elle gacteeh, daro edde orbisan waktik xabba haanamaay rob edde yamaate wakti guffa haam fanah, elle sugte. Laqo-laqo woo raysa qambil kee guma takmeemik dacrisak teneeh, bar-bar alluwwa takmeemik dacrisak ten.

¹¹ Dawud Rixfa abtam yoobbe waqdi,

¹² Gilqad rasul tan Yaabes-magaalal yan mara fan gexxa 'yeh, Saawul kee Saawul baxa Yonaatan lafa baaheh. Gilqad mari Saawul kee baxi lafa akak baaheenim, Filistiin-mari Gilbowaq-qaleh amol ken qide saaku, elle ken takareh suge Beet-San deqsitta magaalak gudek teneeh; tokkek garqeenih baahen. Filistiin-mari Saawul kee kay baxa Yonaatan qidda heenik lakal, lafa keenik too magaalal takreenih yenen.

¹³ Sarrak Dawuduu, Saawul kee Yonaatan lafa kee woo malcina numuy takayrut sugtehiyyah lafa bahha heeh, inki aracal gaaboyse.

¹⁴ Sarrak Dawud mari, Saawul kee kay baxih lafa beyya heenih, Malik Dawud keenik aba elle inxicca 'ye innal, Saawul abbay Kees deqsitak yene edde yoogoqen *kabrit yoogoqen. Too kabri Xelaq deqsita rasuy Benyam kedo guubuh elle tenehiyyal geytima. Tohuk gaba kaleenik wadirii, oson isinni baaxoh aban dooqa Yalli keenik oggolak raaqe.

DAWUD MARI ABE QEEBI

¹⁵ Filistiin kee Israayil marih fanal kaadu qeebi qagteeh, Dawud kee kay mara too qeebih gexxe. Sarrak Filistiin marat qeebi abeenih; qeebi addat Dawud yecleh.

¹⁶ Too qeebit Yisbebanob deqsita numuy kaxxam masu lehiyya yen. Too num sidooca kiilo kee garab yakke macaxuy nacaasak bicseeni gabat abbaxuk sugeeh, qusba seef kaadu bagul luk sugeeh, qeebi addat Dawud qidam faxe.

¹⁷ Takkay immay Xaruyá-Abiisay Dawud catoh yemeeteeh, taaxige masu naba numut atka abeeh edde kaa qide. Tahak wadir Dawuduk, «Qeebih ne'lih gexe waytaamah neh xiibit» iyyeeniih kaa xibsiisen. Sarrak kaak iyyeenimih, «Kibaal elle linom, kooy; koo waynam mafanxak, gaaduh genxa waqdi buxal elle raq» kaak iyyen.

¹⁸ Tohuk lakal Goob deqsita aracal, Filistiin mara kee ken fanal kaadu qeebi rade. Too qeebil Cuusâ-magaalal yooboke Sibkay deqsita num, Saf deqsita masu nabin num qide.

¹⁹ Tonnah kaadu, ken kee Filistiin marih fanal Goob deqsita aracal gersi qeebi radeeh, Yaaqír-Elcanan deqsita numuy Beetlacam magaalal yoobokehiyya Golyaad deqsita numuy Gat-magaalal yoobokehiyya qide. Too numih macaxi kaxxa masu luk yen.

²⁰ Gat-magaalal kaadu gersi qeebi radeeh; too qeebit kaxxam masu le numuy qeebi kicna suge. Gabak kulli gabat laca feera luk yeneeh, namma ibak kulli ibat laca feera luk yen.

²¹ Too num Israayil ummatta kaxxam bursute. Sarra Dawuduk saqalah yen Samma baxaay Yonaatan akak axcuk yeneenihiyya kaa qide.

²² Ta affara numuy Dawud kee Dawud qaskarih gabat rabtehiyya, Gat deqsitta magaalal yooboke marak teneeh; masi nabna lagok luk yenen.