2 Samuwel 20 - NABUWWA KEE MALIKWA

SABAQ DAWUDUT UGTEH

¹ Too waqdi umaanek abbah yan numuy migaaqah Bikrí-Sabaq deqsitaah kedok Benyaamah yoobokehiyya Gilgal magaalal suge. Too num baanta yoogoreeh anay fayya haak, «Israayil maraw, Dawud neh yakkem mali. Yiisâ-baxi Dawud ni num hinnak, kulli num isi buxah siinik yaduuray» iyye.

² Too waqdi Israayil mari yakkeemiik Dawud cabeh Sabaq lih gexen. Yuudâ-marah tu gactek elle raaqeeh; Ordonuk xabba haanamaay Yarusalaam magaalah amma 'yaanam kaa'lih yemeeten.

³ Dawud isi qariy Yarusalaamal yanihiyya gufe waqdi, caggô-gubih caggoh nikaacat abbaxuk yen tabna barray qarit dacayrih cabeh sugehiyyat dacayrih sinam hee. Faxxa haanam tokkeek keenih abak yene'mmay, fido keenit faxak manannaay; dibuk tani ikket ken abbaxuk yen. Too agbi rabba 'yam fanah gubun gurrah sugen.

⁴ Malik Dawud, Qamaasa deqsita numuk iyyemii, «Yuudâ qaskarah inkih seecaay, sidiica ayrok naharat gabat ken bah» iyye.

⁵ Qamaasa keenih seeca'gidih gexe'mmay, malik uduura kaak elle iyye waktil maaduurinna.

⁶ Too waqdi Dawud Abiisayak iyyemii, «Away Absalaam nel baaheh sugeemik, Sabaq nel baahu waam lafitta. Awayiik yi qaskar gabat hayya haay lakat kaak gex. Toh abe waynek, gaso maroh edde tan magaaloolit culla 'yeh ambooqorele» iyye.

⁷ Tohuk lakal Abiisay, Yowab-mara kee malikit dacayrih tan qaskar kee celeemah tan qaskar gabat hayya heeh, Yarusalaam magaalak Sabaq lakat gexe.

⁸ Gibqon magaalak ‹Kaxxa Boolo› deqsitta ikke gufen waqdi, Qamaasa geen. Too waqdi Yowab qeebih tikiyal sugeeh, sibat yan seefiy bagi qarumut axawah yani, bagul tikiyal luk suge. Bisoh kaa fan gexak suge waqdi, too seef sibak kaak rade.

⁹ Yowab Qamaasa gee waqdi, afak, «Yi kataysaw, mannah tan?» kaak inxicca 'yeh, kaa fugutam cella heeh, migdi gabah deben kaak yibbixe.

¹⁰ Qamaasa, Yowab guri gabat le seef yubleh masuginnaay; tohuk gexxaamah, cubbi kaak maabitinna. Yowab gabat abbaxuk suge seef bagut kaak hee. Too waqdi ulqi baaxol kaak rade. Too waqdiik rooci kaak yewqem yublek wadir, kaat qagtam mafaxinna. Tohuk lakal Yowab kee kay toobokoyta Abiisay, Sabaq elle yani ikke oysitak gexen.

¹¹ Yowab qaskarak numuk teeni, Qamasâ-raysak garil sollu 'yeh, Yowab kee Dawud kataata marak, «Yowab lakat gexa» 'yaanam axcuk anay fayya haak yaabe.

¹² Qamaasâ-raysay qabalat tutlukehiyya tokkel elle qangalaylut teneeh; ama qaskariiti kulli num a raysa yasseleeleqem yuble waqdi, giti addak hirriigisak deebol eyyeqqa heeh xagaral saro akak hee.

¹³ Too raysa gitak kaleenik wadir, kulli num Yowab lih gacca 'yeh, Sabaq lakat gexe.

¹⁴ Sabaq Israayilih ubukka 'te kedoodah baaxok adda gacca 'yeh, Aabil-Beet-Maqka deqsitta magaala fanah yemeete. Bikri-gulub inkih magaalak irol gaabowwa 'yeenih, sarra magaala sitta lih culen.

¹⁵ Sarrak Yowab mari, «Sabaq kee kay mara too magaalal tani» 'yaanam yoobben waqdi, tokke fanah gexeeniih, magaala marot heen. Too magaalat maroh tan gasot xakabih ballaaqe tittak bagul heen. Gaso edde yaggilen gutqeenat magaalat maroh tan gasoosi yaggileenim faxen waqdi,

¹⁶ woo magaalah addak kasloytah tan barra, magaalat maroh tan gasok afal yan marah secteeh, «Afal yan maraw! Ama'kkel Yowab yenek, kaa'lih yaabam faxak, ‹Akke am› kaak inxica» inte.

¹⁷ Yowab teetil gexeeh, too waqdi, «Yowab akak 'yaanam koo kinnii?» kaak inte. Yowab, «Yoo kinnih» teetik iyye. «Hay, kok axcem yok oobbey» kaak inte. Yowab, «Meqek, maca intam faxxa?» teetik iyye.

¹⁸ Too waqdi kaak inteemih, «Dumî dabaanal, ‹Waagisseenimih af Aabil-magaalal geyan› axcuk neh sugeeniih, tu waagise mari a magaala amaatuk suge.

¹⁹ A magaalah mari Israayil addal amaan kee digga le mara. Ni magaala Israayil addal kaxxa tuxxiq le magaala. Hay, tonnal, nee akah bayissam faxxam macaa? YALLIH magaala bayissam akah faxxam macaa?» kaak inte.

²⁰ «Aleey, toh inkinnah acsubem hinna. Anu sin magaala baysa num hinniyo.

²¹ Toh niyat mayyu. Bikrí-Sabaq deqsita numuy qaleela le Efrayim rasul yaabukehiyya Malik Dawuduk saduh gace. Too num fanxaah; kaa gabal nek hayteenik, magaalak siinik awqenno» teetik iyye. Too waqdi woo barra kaal gacissemii, «Moyya kaak a gasook siinih qidenno» inte.

²² Sarrak magaalal yan mara fan gexxeeh, a mala keenil bahte. Too mari Sabaqak moyya irgiqqa heenih gasoh amook Yowabah qiden. Too waqdi Yowab is marah, ahaysa a magaalak nee beya 'yaanamih astah baanta heeh; too baantah anay yoobben waqdi, isinni buxa fan yuduuren. Yowab Malik-Dawuduy Yarusalaamal yanihiyya fan gexe.

DAWUDUK DOOLAT ABBOBTI

²³ Yowab, Israayil qaskarah abbah yen. Yoyadáq-Banaaya kaadu Dawudut dacayrih tan qaskarak abbah yen. Woo qaskar marin marak ten.

²⁴ Adoniiram dirkih-tamsiisan-xooquh-xiinah abbah yen. Aciilúd-Yacoosafat kaadu tikka intem yaktube numuk ten.

²⁵ Sawa kutbe-abeenah yen. Saaduk kee Abiyataar diini abbobtik ten.

²⁶ Yaaqir magaalal yooboke Qiira kaadu Dawud garil daffeya seekik ten.