2 Samuwel 2 - NABUWWA KEE MALIKWA

DAWUD YUUDÂ-RASIH MALIK YEKKE

¹ Waqlak wadir Dawud YALLAK, «YALLAW, Yuudâ-rasul tan magaaloolik tiyak teena fan maay gexo?» iyye. YALLI, «Gexay daffey» kaak iyye. Dawud, «Anni magaala fan gexo?» iyye. YALLI «Cebron-magaala fan gex» kaak iyye.

² Too waqdi Dawud Cebron-magaala fan gexeeh ginnaaqot le namma barra gabat bee. Gabat beem, Acinooqamay Yidraqelil tooboke kee, Nabalay Karmelil dabqah yenehiyyak raqte Abiigalak ten.

³ Tonnah kaadu, kaa'lih yen mara kee woo marih buxah mara gabat bee. Sarrak dabaaqah Cebron-magaalah xaqul tan magaaloolil gacen.

⁴ Yuudâ-mari Cebron kaal yemeeteeh, Dawud yuskuteenih isinni malik kaa aben. Gilqad rasul ten Yaabes deqsitta magaalah mari Saawul yoogoqeh 'yaanam yoobbe waqdi,

⁵ Dawud tokke farmoh sinam ruube. Iyyeemih, «Isinni malik toogoqeeniih, digga le mara tekken. Tohuh YALLI barkat siinit haay.

⁶ YALLIH maqaane sin taafay; YALLI wakali siinih yakkay. Isin abten meqe taamak gexxaamah anu kaadu siinih amqeyyo.

⁷ Malikih siinik suge Saawul rabeh; yoh tu gactek, Yuudak rade mari isinni malik yoo abe. Taway siinik axceemih, agiira takkeeniih meysi cabtaanam siinil tan» inta farmo keenih ruube.

ISBOSET ISRAAYIL MALIK YEKKE

⁸ Dawud too farmo ruube saaku, Ner deqsita numih-baxay migaaqah Abner deqsitak yeneeh Saawul qaskarak abbah yenehiyya, Malik-Saawul xale Isboset deqsita num Ordon Weeqaytuk tabissi kaa heeh, Macnaayim deqsitta magaala fan kaa baahe.

⁹ Tokkel Abner, Gilqad kee Aaser kee Yidraqel kee Efrayim kee Benyam rasu kee inkih yan Israayilik malik kaa abe.

¹⁰ Isboset malik yekke saaku, qumrik morootumut yeneeh; malikih sugem namma sanatih gidek ten. Yuudak rade mari, kaa hinna'mmay Dawud lih gace.

¹¹ Dawud Cebron deqsitta magaalal malcina sanat kee garab malikih keenik suge.

GIBQOONUL YEKKE QEEBI

¹² Ayrok teena Abner kee Isboset gubal taamitak yen mari Macnaayim deqsitta magaalak, Gibqon deqsitta magaala fan gexen.

¹³ Xaruya deqsitta barrah baxay migaaqah Yowab deqsitahiyya kee, wohuk kalah tan labhay Dawud qaskarih abbobtih tenehiyya kaadu Gibqon fan gexen. Yowab, Dawud qaxat yen. Tokkel yan doral yongoorowen. Too dorak mariiy qaxal daffee.

¹⁴ Sarrak Abner Yowabak iyyeemih, «Sin mara kee ni marih addak furraynah tan qaskar doorru hayneh qeebih yayse mara nable'gidih tittat ken rubnay» iyye. Yowab, «Meqeh hay» kaak iyye.

¹⁵ Too waqdii Isboset kee Benyam kedoh afak taban kee namma num dooreeniih, too taban kee namma num Dawud marak taban kee namma numut qeebih ruuben.

¹⁶ Kulli num isi numuk moyya xabba heeh, gileh salcet hee. Dawud mara kee gersi mari inkih baaxok bagul afah radeenih, edde raben. Tohuk gexxaamah too arac migaaqah «Gileela-Booxa» deqsitak raaqe.

¹⁷ Tohuk lakal kaxxa qeebi ken fanal yekkeeh; too qeebil Abner kee Israayil mari, Dawud marak gaceh.

¹⁸ Xaruyâ-xayloh sidoocuk Yowab kee Abiisay kee Qasahel tokkel sugte. Qasahel ardah segeeri gidek teneeh,

¹⁹ Abner yaybeebexe'gidih lakat kaak arduk gexe.

²⁰ Abner wadir wagga hee waqdi, Qasahel kaa yabbixe'gidih lakak kaa yayraddem yuble. Too waqdi, «Ah koo Qasahelow?» kaak iyye. «Yeey, Abnerow, yoo kinnih» kaak iyye.

²¹ «Kat, maabin. Lakak yoo mayraddin. Qaskarak numuk teena lakat eredaay faxxam kaak beet» iyye. Qasahel kay yab cineh lakak kaa yeyredde.

²² Abner kaadu qagseh, «Maabinay, yok raq! Gabat yok marabin. Koo qidda heeh ku toobokoyta Yowab fooca elle able inna luk maraaqak, yok raq» iyye.

²³ Qasahel lakak kaak raaqu cineeh; too waqdi Abner gabat abbaxuk suge macaxih-dibaaro bagut kaak hee. Too macaxi darre le kabuk kaak yewqe. Qasahel baaxok bagul radeh edde rabe. Kay raysi qangalaylut elle yani'kke gufe mari tokkel elle sooleeh elle yeede.

²⁴ Yowab kee Abiisay Abner lakat gexxe. Bari yekke waqdi, Amma deqsitta qale fan yemeeten. Amma deqsitta qale, Giyac deqsita aracak xaqut raqta qaley Gibqon rasuk sinam elle dago baaxo fan beya gitih xaqul geytinta.

²⁵ Benyam-kedoh qallalle Abner hawah temeeteeh, qaleh amok qeebih bical gacte.

²⁶ Abner Yowabah seeceeh iyyeemih, «A qeebik aade waynay inte inna? Aham ellecabol maqaanet macabta'mmay, ahaysa ku marak yoo makatayinay uduura intam aysuk manannaa? Maabinay yok raaqa. Kee yaalo! Akah nanim inki baaxoh marak» iyye.

²⁷ Yowab too waqdi kaal gacseemih, «Yallay waara yok yaaxigeeh away yaabe wannitoy, yi mari maaci maacissa 'yam fanah lakak sin ayradduk suge raare» iyye.

²⁸ Sarrak Yowab isi marak, «Ahaysa soola» 'yaanamih astah *baanta yoogore. Qeebi tohuk wadir sooleh.

²⁹ Too bar Abner kee kay mara Macnaayim magaala gufaana'gidih kuulak xiinen. Ordon weeqaytuk qaxa gexeeniih, barat edde too weeqaytuk tabeeniih, saaku gexak maaciseeniih, sarrak too ayrot edde Macnaayim magaala gufen.

³⁰ Qeebi yeedeek wadir Yowab isi mara inki ikkel gaaboyse waqdi, Qasahel sinnuk taban kee sagla num keenik waytimak suge.

³¹ Abner-maray Benyaamah yoobokehiyyak sidiica bool kee lactam num qideenih sugen.

³² Yowab kee kay mara Qasahel-lafa Beetlacam fan beeniih, tokkel kay buxah marih *kabrit kaa yoogoqen. Isinnihiiy inkih yan bar kuulak xinna 'yeenih, saaku maaci maacisam faxa waqdi, Cebron-magaala yimbiden.