2 Samuwel 19 - NABUWWA KEE MALIKWA

YOWAB DAWUD SAHTE

¹ Malik Dawud, Absalaam rabih weeqa kee rookah addat yan waqdi, Yowab toh yoobbeh.

² Too ayro kaadu Dawud-qaskar, Dawud isi baxih rookat yani 'yaanam yoobben. Tohuk gexxaamah abe raaren farci-maysoh aftok cisabbootak asen.

³ Qeebil boolatte qaskaray qaybi yibbixeh innah, magaala culen waqdi, tibbat culen.

⁴ Malik Dawud foocal gaba hayya heeh boogiseeh, «Yi baxaw, yi Absalaamow, woyyow, yi baxaw, woyyow, yi baxaw» iyye.

⁵ Too waqdi Yowab malikil gexxa 'yeh kaak iyyeemih, «A saaku isi qaskaray rooci kot catteeh, xaylo kee agabu koh catehiyya qaybik qidde.

⁶ Isi niqba mara kicnaah, isi kicna mara niqba numuk tantoh tan. A qaskar kee qaskar abbobti tuh alle waytam kok geyneh. Nanu nakkeemiik rabnaah, Absalaam koh raaqaamal, ruffa axce rartem, kamba kok ableh an.

⁷ Meqehik, away ugutaay, a qaskarak aytikuma inxic. Toh abe waytek, ta'kkel beera num ko'lih raaqe wayu waamah, YALLIH migaaqal xiibita. Tahak gacta balay koo tabbixehiyya matan. Qunxaaneey takke kot tikka 'teemik inkih, tah koo lafele» kaak iyye.

⁸ Toh kaak iyye waqdi, Malik Dawud ugutta 'yeh magaalah afa fan gexeh tokkel daffee. «Malik magaalah afal daffeyak yen» 'yaanam yoobben waqdi, kay qaskar kaal temeeteeh, maraasiyot kaa hayte. Oson tohut yanin waqdi, Israayil mari yakkeemik mariiy isi buxah keenik kudeh yen.

DAWUDUH MALAAKINNI GACE

⁹ Takkay immay tohuk lakal Israayil mari kaxxam agaaradeeh, «Maca tayse hay labhay?» tittak iyyen. «Malik Dawud naqboytiitik nee cateeh, Filistiin marak nee cateh immay, qusbih Absalaamak kudeh, baaxo cabeh suge.

¹⁰ Nanu Absalaam malik yakke'gidih nuskuteh sugne. Takkay immay usuk carbit rabeh. Tonna-leemiik away numuk teeni gexeh, Malik Dawud macah gace waah?» 'yaanamih mala baahen.

¹¹ Israayil mari sittak iyyeemih xaagi Malik Dawud gufe. Too waqdi Saaduk kee Abiyataar deqsitta seeka farmoh ruubeeh, keenik iyyemii, «Yuudah abbobtik intaanamah, ‹Isin kullim gaba kaltek sarra yoo cata mara macah tekken?

¹² Ramadah yok taniinih, yi cadoyta kinniton way, yoo gacsaanamih tiyal kulli marak ellecabot macah gactan?› keenik inxica» iyye.

¹³ Kaadu qagseh iyyeemih, «Qamaasak intaanamah, ‹Atu ramad yok kinnito. Ahak wadir Yowab le qaskar-abbootanna koh aceeyyo. Tah abe week, Yallih-bala yol obtay› iyye kaak inxica» keenik iyye.

¹⁴ Dawud-qangara Yuudâ-baaxol yan marak inkih kalbi xabbacosse. Oson too waqdi, is kee isi gubal taamita doolat mara lih, «Uduur» 'yaanamih farmo kaah ruuben.

¹⁵ Malik Dawud yaduure'gidih Ordon weeqaytu gufe. Yuudâ-mari Gilgal deqsita aracal gaaboowe. Weeqaytuk tabissi kaa haana'gidih, woo qaxa fan kaa'lih gexen.

¹⁶ Tonnah kaadu Benyaamah yooboke Gerá-Simqi deqsita numuy Bacurim deqsita aracal sugehiyya Malik Dawudut garaya'gidih, Ordon fan sissikuk gexe.

¹⁷ Usuk alfi yakke maray Benyaamah yooboke is luk abbaxuk yen. Saawul buxah marih taamat yen Xiba deqsita num kaadu, xaylok taban kee konooy kee, labaatanna yakke taama mara lih yemeeteeh, Ordonul malikik naharat gufe.

¹⁸ Tokkel malik lih yan mara lih wakalih gacca 'yeenih, malik keenik aba iyyem abaana'gidih, Ordon-weeqaytuuk taturra kaa'lih iyyen. Malik woo weeqaytuk tabam faxa waqdi, Simqi malikik foocal gulubuh radeh iyyemii,

¹⁹ «Yi amoytaw, woo Yarusalaamak gexxe saaku baahe umaanek, ku maganak, qafu yoh ab. Ahak wadir tohih naqabu bagut yoh mahaanay tuh maallin.

²⁰ Yi amoytaw, dambi lem baahem innik eexegeeh; a saaku kilbat le kabut raqta kedooday Yuusuf xaqut tanihiyyak naharat kot matra'gidih akah emeetem, tohu» iyye.

²¹ Too waqdi Xaruyá-Abiisay yaabeeh, iyyeemih, «Simqi YALLI malikih doore num xaafeemih sabbatah, rabi kaal yamaate» iyye.

²² Dawud, Abiisay kee kay saqalah yan Yowabak iyyemii, «Xaruyâ-xayloy, ah sin wagitta qaada hinna. Isin umaanet yoo culussaanam maay faxxan? Away Israayil-malik yoo kinniimih sabbatah, a saaku Israayil-marak numul rabi cokmi magaca» iyye.

²³ Too waqdi Simqik iyyeemih, «Koo qide waamah koh xiibitah» kaak iyye.

²⁴ Tohuk lakal Saawuluk baxi baxah yen Mafiboset kaadu malikit yangoorowe'gidih yemeete. Mafiboset malik gexxa 'yeemiiy amaanah uduurra 'yam fanah, iba kaqliseh manannaay deben isik mooleh mananna. Xagaral le sara kaadu kaqliseh mananna.

²⁵ Yarusalaamak yemeeteeh malik fan gexeeh kaat yongoorowe waqdi, malik kaak iyyemii, «Mafibosetow, yo'lih magexinnitok, maca geytee?» iyye.

^26-27 Mafiboset too waqdi kaal gacseemih, «Atu akah table'nnah, anu namma ibak aymite numuh aniih; yoh taamita Xiba deqsita numuk, ‹Malik lih gexam faxak, dananal koori yoh hay› exce waqdi, woo num yoo ganeeh; ku garil kaadu anu edde ane waam yol hee. Tonna'mmay atu Yallih malaykattih bis litok, cakki kot ceelinnaanim ab.

²⁸ Yi marah inkih, rabak sah taguudem matan. Takkay immay yooy, isih akminnaanim is lih adoobisak sugte. Tahaysa yok raqteemiy yoh ab axcuk koo essera mayyu» iyye.

²⁹ Malik kaal gacseemih, «Ahaysa yabti-mangah faxxintam matanak, Saawuluk raqte buqreh baaxo koo kee Xibak kurraasita» kaak iyye.

³⁰ Mafiboset tohul gacseemih, «Wohim Xiba inkih haysitay; yoh atu muquk tuduurem yoo xiqtah» iyye.

³¹ Gilqad rasul yooboke Bardillay deqsita num, Rogalim deqsita aracak yemeete. Akah yemeetem, wakalih kaa'lih gacca 'yeh Ordon weeqaytuuk taturra kaa'lih iyya'gidi.

³² Bardillay kaxxam bar naba numuk teneeh bacra-tabanih sanat luk suge. Kaadu kaxxa gaddalik teneeh, malik Macanaayim rasul yen saaku maaqo kaah baahak suge.

³³ Malik kaak iyyemii, «Yarusalaam fan yo'lih gexaay; wokkel amo kok wagteyyok» iyye.

³⁴ Bardillay iyyemii, «Ahaksa mangoomuh sugu waam mayyuuy, tohoysa Yarusalaam fan ko'lih akah gexam mayyu.

³⁵ Qumrik bacra-tabanat aniih, meqem kee umam maceda. Akme maaqok tamu mabla. Aaqubeemik tamu mabla. Gad abaanamah ayti yok mataabba. Tohuk gexxaamah, ko'lih gexaamah quuka kol akkeemik sa, koh xiqam mayyu.

³⁶ Anu kaadu koh xiqeemiy galtoh kot akah qaaga mayyu. Away dagoh gide Ordon weeqaytuk bisoh tabissa koo heeh cabeyyooh,

³⁷ tohuk wadir inni buxah aduurem tayse. Raba inni buxal abah, magaqah inni xaleenah *kabrit gacam yoh tayse. Yi aftok Kimham yaniih, yi aftok kaa gabat beetaay, buxa guftan waqdi isit ceelinnaanim kaah abetto» iyye.

³⁸ Malik kaak iyyeemih, «Meqeh hay, inni lih kaa beeyyooh, atu axcinnaanim kaah abeyyo. Koh kaadu atu ah faxa akak intam koh abeyyo» iyye.

³⁹ Tohuk lakal Dawud kee Dawud mara Ordonuk tabteh. Too waqdi Dawud, Bardillay fugga heeh sarrak dooqa kaah abe. Bardillay isi buxah yuduure.

⁴⁰ Malik Dawud Gilgal fan gexe. Kimham kaadu kaa'lih gexe. Yuudâ-qaskar takkeemiik Ordon weeqaytuk tabissa kaa hayteh, Israayil qaskarak garab kaa'lih tabte. Tonnal, Gilgal yemeeten.

⁴¹ Sarrak Israayil-mari yakkeenimiik kaal yemeeteenih kaak iyyeenimih, «Malikow, Yuudah ummattay nek toobokoh tanihiyya koo kee ku buxah mara kee ku mara akah nek beyaanam macaay? Ordon weeqaytuk koo baahaanamih cakki, dibuk isinnih loonum akah ceelaanam macaay?» iyyen.

⁴² Too waqdi Yuudâ-mari tohul keenil gacsemii, «Nanu woh akah abnem, malik neh xayi ramad lem aaxaguk neneeh, tohuh abne. Tohoysa malikik nokmem mannuuy, gabak neh abem mali. Hay labhay, siinit toomem macaa?» keenik iyyen.

⁴³ Too yaabal Israayil mari kaadu keenil gacseemih, «Malik Dawud siinih yoobokem numma'mmay, siinik tabna afa lino. Too tiyal nee burutteeniih, woo tiya siinik wayna. Geerak kaadu, ‹Malik neh yaduuray!› 'yaanam naharat intem, neey; a saaku mangom luk nene'mmay, woh neh teexegeenih matan» 'yaanam iyyen. Too yaabal Yuudâ-mari gibdi qangara keenil gacse.