2 Samuwel 18 - NABUWWA KEE MALIKWA

ABSALAAM RABA

¹ Dawud isi mara gaaboyseeh, alfitteh abbobti kee boolitteh abbobti ken amol hee.

² Tohuk lakal sidiica gexoh ken kurra heeh, naharsi gexok qaskar abbah Yowab heeh, gersi gexok qaskar abbah kay toobokoyta Abiisay heeh, sidochaytô gexok qaskar abbah Ittay heek lakal, «Anu sin lih gexeyyo» keenik iyye.

³ Osonuuy, «Atu ne'lih gexxam mafaxxinta. Nanu inkih wadir naduureh, nek garab raba way, naqboytiitil tu hinna. Koh tu gactekiiy, nek tabna alfih numih gide kot taniimih sabbatah, atu a magaalal elle raqteh, ama'kkek cato neh rubtam tayse» kaak iyye.

⁴ «Hay, siinit aysinnaanim abeyyo» keenik iyye. Tohuk lakal kay mari alfi-alfi kee bool-boolul buttâ-buttal gacca 'yeenih fooren waqdi, woo magaalah gasok afat tattabak teenaak sollu 'yeh,

⁵ Yowab kee Abiisay kee Ittayah inkih amri yeceeh, keenik iyyemii, «Yi taagah qunxa-Absalaamal tu mabaahina» iyye. Qaskar tikki 'taamak Dawud a amri acayih toobbeh.

⁶ Tohuk lakal Dawud-qaskar Israayil-marih qeebih, qeebi-booxa fan gexxeeh; Efrayim deqsitta garbol qeebi keenit aben.

⁷ Dawud-mari Israayil-marak qeebih yayseh. Kaxxa nasri keenil geen. Woo ayroh addal labaatanna alfih num keenik rabe.

⁸ Woo qeebi barri baaxol inkih yekke. Too saaku garboh addat rabe mari, seefit rabe marak manguk yen.

⁹ Absalaam garciik Dawud marat matre waqdi, bakil amot sugeeh; woo bakil arduk kaxxa caxah guba kaa culusse. Too waqdi amo kaak woo caxak fallakka le aracat culte. Amot akak suge bakil isih kaak gexxeeh; usuk woo caxah fallakkat edde wanxexxeelak raaqe.

¹⁰ Dawud marih num kaa yubleeh, too waqdi gexxa 'yeh, Yowabak, «Absalaam kaxxa caxat wanxexxeelah uble» iyye.

¹¹ Yowab too waqdi kaal gacsemii, «Kaa tublek, macah kaa qide wayteeh? Kaa qiddaamal lakqok tabna garsi kee bagi-qarum koh acayuk en» iyye.

¹² Takkay immay woo num kaak iyyemii, «Lakqok alfi garsi yoh teceemih, anu malik baxa feerah xagak mananniyo. Malikii, nanu inkih elle nan ikkel, koo kee Abiisay kee Ittayak, ‹Yi taagah qunxa-Absalaamal tu mabaahina› 'yaanam siinik axcih noobbe.

¹³ Hay, tonnal anu malik yab cinna heeh, Absalaam qidek, malikik tu qellitak manannaay, woh aabbe'kal maraaqa. Sarrak kaak atu yoo macatta» kaak iyye.

¹⁴ Yowab too waqdi iyyemii, «Anu ku yaabat wakti akah ruubam mayyu» inxicca 'yeh, sidiica macaxu luk foore. Too waqdi Absalaamay rooci edde yaniy caxat wanxexxeelih yanit, itta katassa heeh, woo sidiica macaxu afqadot kaak hee.

¹⁵ Too waqdi taban takke qaskaray Yowab silac akkuquk tenehiyya Absalaamat woo macaxwa tikiq-tikiq heenih kaa qiden.

¹⁶ Tohuk lakal Yowab, qeebi gaba kalem elle tamixxige'gidih, «*Baanta ugura» iyye. Too baanta tumuggure waqdi, kay qaskar Israayil mara yayraddeenim cabeenih, kaal yuduuren.

¹⁷ Sarrak Absalaam raysa beeniih, garboh addal tan kaxxa boodot qiden. Tohuk lakal woo boodo xeetik kibeenih, waydal gurral bicsen. Toh tekke waqdi Israayil mari yakkeemik mariiy isi buxa fanah kude.

¹⁸ Absalaam migaq kaak elle xagan baxa luk masuginnaay; tohuk gexxaamah addunyâ bagul yan saaku, ‹Malik Golo› deqsita aracal kaa elle kassitan qamiddu bicsiise. Too qamidduk migaaqah ‹Absalaam qamiddu› iyye. A saaku fanah too qamiddu Absalaam kassitih qamiddul yaaxigen.

DAWUD ABSALAAM RABEEMIH XAAGU GEE

¹⁹ Saaduk baxi Acimqax Yowabak iyyeemih, «Malik fanah arduk gexxa exceh, YALLI naqboytiitik kaa catem kaah warisu waak, gexu yoo cab» iyye.

²⁰ Yowab too waqdi kaal gacseemih, «Atu xaagu warissu waytam a saaku hinnay, gersi saaku. A saaku malikik baxi rabe ikkal, atu kaah mawarissa» kaak iyye.

²¹ Tohuk lakal Yowab Kuusuh yooboke numuk iyyemii, «Gexay malikih isi intih tublem waris» kaak iyye. Too waqdi woo num kay massakaxxah qununna yeeh, sarrak kaa akah ruuben farmo warsa'gidih arduk gexe.

²² Acimqax qagisak Yowabak iyyemii, «Faxem edde takkeemih a xaagu anu beyam taysek, beyay yoo inxic» iyye. Yowab kaak iyyemii, «Yi baxaw, atu a xaagu beytam akah faxxam macaay, galtoh edde geytu waytam mantuk» kaak iyye.

²³ Acimqax iyyemii, «Faxem edde takkeemih, xaagu warsa'gidih gexam faxa» kaak iyye. Yowab, «Woysa gex hay» kaak iyye. Too waqdi arduk Ordon-golok adda gacca 'yeh Kuusuh yooboke numuk yookomeh Dawudul yemeete.

²⁴ Dawud, magaala akak culan afa kee, magaalak akak yawqen afak fanal yan aracal, daffeynat suge. Dacayrih yan numuy magaalak gasoh culmeynah amol yewqeh sugehiyya wonna wagga hee waqdi, dibuk yarde numuy kaa fanah yamaatehiyya yuble.

²⁵ Too waqdi addah bossa 'yeh malikih seeceh, «Dibuk yan numuy nee fanah yarde ableh an» iyye. Malik iyyeemih, «Dibuk yan num tekkek, meqe-farmo gabat baaha kaana» iyye. Taaxige num xayyoowak xayyoowe.

²⁶ Sarrak dacayrih yan num kaadu gersi numuy dibuk arduk yamaatehiyya yuble. Gasoh afat dacayrih yan numuk iyyemii, «Gersi numuy yarde yamaatem maay tablee?» iyye. Malik kaadu iyyemii, «Tama num kaadu meqe-xaagu baaha numu» iyye.

²⁷ Dacayrih yan num iyyemii, «Naharat yan num, Acimqad arda leh yan» iyye. Too waqdi malik iyyeemih, «Usuk meqe numuuy; meqe xaagu baaha kaana» iyye.

²⁸ Acimqax anay fayya haak, «Malikow, keenik neyseh» iyyeeh; kaak foocal kay massakaxxah qansah baaxo xagam fan qununna 'yeeh, sarrak iyyeemih, «YALLAY ku Dagelta kinnihiyyay qeebi kot abak suge marak koo yiysiisehiyya fayla taafay, yi malikow» iyye.

²⁹ Too waqdi malik, «Qunxa Absalaam nagay raaqee?» iyye. «Ku qaskarak abbah yan Yowab yoo ruube waqdi, mango waxxaqa kee deero radak yok raqte'mmay, kinnim aaxige'kal emeete» kaak iyye.

³⁰ Too waqdi malik, «Meqek, woo kabuk sol» kaak iyye.

³¹ Sarrak Kuusuh aabakuk yen num yemeeteeh, malik Dawuduk, «Yi amoytaw, meqe xaagu koh abbixe. YALLI a saaku qeebi kot abam faxak suge marak koo yiysiiseh, umaane abe waytem kok qaddoyseh» kaak iyye.

³² Too waqdi Malik Dawud, «Qunxa Absalaam hay nagay raaqee?» kaak iyye. Kuusuh yooboke numuuy, «Kaat tekkem ku naqboytit kee kot qeebi abam faxe marat takkeemil maquk ten» kaak iyye.

DAWUD ABSALAAM ARKA TIBBIXE

³³ Too waqdi malik wariggiteeh, woo magaalak akak yawqen gasok amol yan qaril eweqqa 'yeh weeqe. «Yi Absalaamow! Yi Absalaamow! Woyyow, ku aftok anu rabiyyoy! Woyyow ku aftok anu rabiyyoy! Yi Absalaamow!» iyye.