2 Samuwel 17 - NABUWWA KEE MALIKWA

CUSAAY ABSALAAM GARCISE

¹ Tohuk lakal Acitoofal Absalaamak iyyemii, «Kot bictek, taban kee namma alfih num doorru heeh, a bar Dawud lakat gexeyyo.

² Usuk yecleh niya kaak radda waqdi, qeebi kaat abeyyo. Too waqdi meysi kaa abbixeleeh; kay mari yakkeenimiik kudele. Tonnal malik qideyyooh,

³ kay mara inkih ku gubal heeyyo. Woo num rabam yablen waqdi, tonnal raqqa 'ye mari inkih ku fan yaduurem elle aaxigetto. Keenik num biyaakite'kal aduurele» iyye.

⁴ Ta fayi Absalaam kee Israayil abbobtit inkih meqe-fayu ceele.

⁵ Too waqdi Absalaam iyyemii, «Away Cusaayah seecay, usuk iyyam kaadu ankacisnu waynak» iyye.

⁶ Cusaay yemeete waqdi Absalaam kaak iyyemii, «Acitoofal fayuh tamah nek iyyek, usuk aba iyyem abnu innaa cinnuu? Kay fayu maabbina intek, kaadu abeh meqem neh waris» kaak iyye.

⁷ Cusaay kaal gacsemii, «Acitoofal ta saaku koh yecee fayi meqe fayuk tanih matan.

⁸ Macaay intek, ku abba kee kay mara qeebil celeema kinnoonum atu isih taaxigeeh; qeebit culla 'yeenik wadir baxa akak been say-kabqih (wacroh) bis lon. Eddeey edde ku abba qeebi elle aban inna nagay yaaxigeeh; tonna kinnuk a baraa, qaskar elle tani'kkel maxiina.

⁹ Away kinni-way gabla akke kee, hinnay kaadu, aracak teenat yombooqoreh yan kaana. Dawud ku mara qeebit yabbaxu waah, keenik dago mara qidu waa waqdi, sahda woo xaagu taabbu wayta waqdi, ku mari gaceh 'yaanam axcelon.

¹⁰ Ku abba kaxxa qaskariitaay, kay mari celeema kinnim, Israayil mari inkih yaaxigeeh; tonna-leemiik, a xaagu yaabboonu waan waqdii, woo kaxxa agiiray lubak innah cunxo sinni kinni-way meysitele.

¹¹ Tonna leemiik, anu innih kasah kok axceemih: Israayil maray mangah qiddeyti inna lehiyya Israayil baaxok woo exxaay a exxak inki'kkel gaabossu haysay, gaaduh isih foocat keenik gacca 'xicaay ken bey.

¹² Tonnal too gide yakke mara luk, Dawud riket macabnaay; kaat takku waytaamih xaagu aalle'kal, garciik kaa abbixenno. Kaa kee kay marak num maraaqay keenik aysenno.

¹³ Magaala fan kudu waam nublek, ni mari akoota baaheleeh, woo akootat woo magaala hirigak ragidiik siibba hayneh goloh addat tet qidenno. Woo magaala elle tan qaleh amol inki xaa kinni-way maraaqa» kaak iyye.

¹⁴ Too waqdi Absalaam kee Israayil mari yakkeemiik, «Acitoofal-fayuk, Cusaay-fayi yayseh yan» iyyen. YALLI woh akah abemii, Acitoofal baahe meqe-fayu kataate waana'gidiiy Absalaamal bala obta'gidi.

CUSAAY FARMO DAWUDUH RUUBE

¹⁵ Tohuk lakal Cusaay, sek-Saaduk kee sek-Abiyataar fan gexeeh; tokkelii, Acitoofal Absalaamah yeceeh suge fayu keenih warseeh, usuk kaadu is le kabuk kaah yecee fayu kaadu keenih warse.

¹⁶ Sarrak keenik iyyeemih, «Taway xayuk sissikuk Dawuduh farmo ruuba. ‹Ama Ordon weeqaytu akak taban tabeenal ta bar maxiininay, ta barat edde Ordonuk tabay maacisa. Tonnal koo kee ku mara mabbux kee rabak cattiimettoonu› 'yaanam farmoh keenih ruuba» iyye.

¹⁷ Abiyataar-baxay migaaqah Yonaatan deqsitak yenehiyya kee Saaduk-baxay migaaqah Acimqax deqsitak yenehiyya Qenrogel deqsita buyyiy Yarusalaam-magaalak dago xexxar baxa le ikkel yanihiyyah garil gaceenih yenen. Wokkel akah gaceenim, woo magaala sahda ken abalih culaanamih meysik ten. Buxah addal taamitta baxuwwa keenil amma 'taah tikki 'tam kulli waqdi keenih warisak ten. Oson kaadu tohim kulli waqdi Malik Dawud fanah gexak kaah warisak yenen.

¹⁸ Tah iyyan saaku, awki ken yubleeh; too awki ken yublem Absalaamah warse. Toh yeexegen waqdi, sissikuk gexeeniih, Bacurim deqsita aracal uli numih buxat yombooqoren. Woo numih buxah daaratal qeeli yeneeh; woo qeelih addat yombooqoren.

¹⁹ Qari luk yen numih barra alfenta bahha hayteeh woo qeelak afa edde alifte. Sarrak woo alifih bagul, num akah edde rade waa'nnah, daro caxxeh cabte.

²⁰ Tohuk lakal Absalaam gubal taamita mari woo buxah yemeeteeh, buxal sugte barrak, «Acimqax kee Yonaatan maca abteeh?» iyyen. Isiiy, «Darak tabba iyyen» keenik inte. Tokke ken goranah gexeeniih immay magennoonuuy; tonna-leemik Yarusalaam fan yuduuren.

²¹ Oson gexxa iyyen waqdi, Acimqax kee Yonaatan qeeli addak yewqeenih Dawud fanah gexen. Tokkel tekkem kaah warsen. Acitoofal kaah malse mala Dawuduh warseeniih, kaak iyyeenimih, «Isissikay ugutaay weeqaytuk taba» kaak iyyen.

²² Dawud kee kay mara gexoh bical gaceenih sarrak fooreenih. Maaci ifu ruube waqdi, yakkeenimiik inkih Ordon weeqaytuk tabeenih sugen.

²³ Acitoofal kay fayu oggole weenim yuble waqdi, isi dananal koori hayya heeh, isi magaala yuduure. Isi buxal, buxah addah caagid bicseek lakal, ogot is qide. Sarrak magaqah kay buxah mara edde haak sugen aracat kaa heen.

²⁴ Absalaam kee Israayil-mara Ordon-weeqaytuk tabte waqdi, Dawud Macanaayim deqsitta magaala gufeh suge.

²⁵ Absalaam, qaskar-abbootan Yowab aftok, Qamaasa deqsita numuh yeceeh yen. Qamaasa, Yeter deqsita numih baxak ten. Kedok, Ismaaqilto deqsita marah aabakuk yen. Kay ina Abiigal deqsitta barrak ten. Abiigal Nacas deqsita numih baxák teneeh, Yowabak ina-maqanxák ten.

²⁶ Absalaam kee kay mara Gilqad deqsita aracal tinfiddige.

²⁷ Dawud Macanaayim gufe waqdi, Qammon rasul tan Rabba deqsitta magaalal yooboke Soobi deqsita numut yongoorowe. Soobi Nacas deqsita numih baxak ten. Kalah kaadu, Makir deqsita numuy Qammiyel deqsita num xalehiyyay Lodabar deqsitta magaalal yooboke kee, Bardillay deqsita numuy Gilqad deqsitta rasuk Rogalim magaalal yoobokehiyyat yongoorowe.

^28-29 Too mari sacnitte kee kallak bicsen buutiiy, xiinih elle xiinan duyye kee maaqo Dawud kee Dawud marah baahen. Maaqok keenih baaheenim: kamadiiy gabru deqsitta darooy riyen darooy, alooy missiriiy fuuluuy malabaay lab-qittaay, hobbo kee illik ten. A mari, Dawud kee Dawud mara safarah akak yemeeteenim bakarroytah tan baaxo kinnuk, bakaraay qulul kee cawal luk yemeeteenim yeexegeenih.