2 Samuwel 16 - NABUWWA KEE MALIKWA

DAWUD KEE XIBA

¹ Dawud qaleh amook, qunxuum addah ooba waqdi, garciik Xibat yongoorowe. Xiba Mafibosetih taamita numuk ten. Xiba, namma boolih gaqamboyta kee, kafsen qinab-xaylok bool gaqamboyta kee, bool yakke caxâ-miru kee qinabak bicsen kamrik kiben saar, koori le danoonak nammayay cixut yabbixehiyyal eerra heeh baahe.

² Malik Dawud, «Ahak inkih maca abta'gidih bahte?» kaak iyye. Too waqdi Xiba kaal gacseemih, «A danoona ku buxah mari edde gexa'gidih baaheeh, gaqambo kee caxâ-miru labha takme'gidih keenih baahe. Qinabak bicsen kamri, bakarroytah tan baaxol gexok cawalan waqdi, yaaqubeeni'gidih keenih baahe» iyye.

³ Malik Dawud, «Ku abbah baxih baxi maca abe?» iyye. «Usuk Yarusalaamal elle raaqe. Akah raaqem, ‹Israayil mari yi kaxxa abbah dardaarinna yoh gacsele› 'yaanam niyal heeh, tohuh raaqe» kaak iyye.

⁴ Too waqdi malik, Xibak iyyemii, «Mafiboset luk suggu 'yem inkih kuumu» kaak iyye. Xiba too waqdi, «Anu ku naqasu kinniyok, koo ruffa haa num yoo abay» iyye.

SIMQI ABAARO DAWUDUT ABE

⁵ Malik Dawud Bacurim gufe waqdi, Simqi deqsita num kaah garaye. Simqi Saawuluh ramad luk yeneeh; kaak abba Gera deqsita numuk ten. Usuk Malik Dawud yuble waqdi kaa abaareh.

⁶ Kaa kee doolat maray kay gubal yanihiyyat xeet hee. Dacayrih tan qaskar kee kay mara Dawud maraasiyot abbaxuk tene'mmay, too num tohuk mameysitinnay, xeet keenit hee.

⁷ Tohul macabinnay, «Kee gex wonnah! Gex wonnah biileenaw, sarreenaw!

⁸ Saawul luk suge amoytiinu isih haysitteeh, kay buxah marak mangom qiddeeh; away YALLI koo akah digaalam wohu. YALLI atu luk sugte amoytiinu ku baxa Absalaamah yecee. Biileena kinnitok, a gibdaabini kot yekke» axcuk, xaafu kee abaaro inkih kaat abe.

⁹ Abiisay deqsita num ah yuble waqdi, Dawuduk, «Yi amoytaw, a kuta is xaafi macah haytaa? Gexeh moyya kaak kalay yoo m'inta?» kaak iyye. Abiisay-ina Xaruya deqsitta barrak ten.

¹⁰ Malik too waqdi Abiisay kee kay saqalah yan Yowabak iyyemii, «Xaruyâ-xayloy, ah sin wagitta qaada hinna. Usuk YALLI kaak yot aba iyye xaafu yot abbaasitaamah, YALLI ah macah kaak aba, intu talliilem miyyaay?» iyye.

¹¹ Tohuk lakal Dawud Abiisay kee kay gubal taamita doolat marak iyyemii, «Inni sammok xale baxi yoo qidam faxa way, isin a numih xaafu macah waagissan? A xaafu kay afat haytem YALLA. Tonna-leemik yanay kaa inxicaay, aba xaafu abitay kaa 'xica.

¹² YALLI yot tekke umaane yubleh, a umaaneh aftok maqaane yol oobisam takkeh» keenik iyye.

¹³ Tohuk lakal Dawud kee kay mara abak sugen gexoh gexen. Simqih tu gactek, oson gexan qalek ragidik iroh raqqa iyyeh ken katayak, xaafu kee abaaro keenit abakaay, xeet keenit haakaay bullaaqe keenit rifak suge.

¹⁴ Dawud kee kay mara Ordon weeqaytu gufte waqdi, kaxxam cawaleenih yeneeniih; tonna-leemik tokkel elle yoffoofen.

ABSALAAM YARUSALAAM ADDAL ABE TAAMA

¹⁵ Absalaam kee kaa'lih suge mara inkih Yarusalaam magaala culte. Acitoofal kaadu woo magaala ken lih cule.

¹⁶ Dawuduk kaxxa kataysah yen Cusaay deqsita num Absalaam yuble waqdi, anay fayya haak, «Ani hay malik. Ani haay malik» iyye.

¹⁷ Absalaam toh yoobbe waqdi, «Dawud kaxxam koo aamanuk yen way, kaal maktee? Kaa'lih macah gexe wayteeh?» kaak iyye.

¹⁸ Cusaay kaal gacsemii, «Woh mannal takkee? Anu YALLI dooreeh, a mara kee inkih tan Israayil-ummatta doorte num lih an. Anu ko'lih gaceyyo.

¹⁹ Yok amol suge numih baxa taamite week, wohoysa iyya taamitam takkalee? Ku abba taamitak akah suge'nnah, koo taamiteyyo» kaak iyye.

²⁰ Tohuk lakal Absalaam Acitoofal fan ufkunna 'yeh, «Away akkel maca abnam tayseeh? Macal nee fayissaah?» kaak iyye.

²¹ Too waqdi Acitoofal kaal gacsemii, «Gexay ku abba caggô gubih caggoh nikaacat yabbixe agabuy isi qarit dacayrih cabehiyyat fido fax. Tonnal Israayil baaxol eneyya 'ya mari inkih, ku abbak naqboyta isik abtem aaxigeloonuuh; koo kataya mari kaadu wonnal agiiritele» iyye.

²² Too fayu kaak yukkuqeeh; sarrak Absalaamah malik qarik amol siraq heeniih, kulli num kaa akak yable'kkel, Absalaam woo siraq culla 'yeh abbah caggot fido faxeh.

²³ Woo dabaanal sahda Acitoofal fayuh aba axcinnaanim Yalli afat kaak hee yab akkaluk yenen. Duma Dawud toh akkaluk yeneeh; Absalaam kaadu toh yekkele.