2 Samuwel 15 - NABUWWA KEE MALIKWA

ABSALAAM ISI ABBAH MALSE

¹ Tohuk lakal Absalaam faariisa kee faariisat giitak beyan gaari bicsiteeh, toh lih kaadu kontom yakke maray dacayrih kaat gacu waahiyya haysite.

^2-3 Saaku-saaku dibroh ugutta 'yah, magaalak akak yawqen giti afal soolak suggu 'yah, wokke malikil cokmi goranah amaatinnaan marah seecak yen. «Mankek temeeteenih? Maa kedoh toobokeenih?» keenik axcuk yen. Woo mari akak yemeete'kke kaah warsa waqdi, «Tableeni labhay! Yab siinih iyyah yani'mmay, malik isi aftok hee maray yab siinih gitat abu waahiyya mayan» keenik axcuk yen.

⁴ Yab tohut aysaadayuk manannaay, axcuk yeneemih, «A saaku anu cokmaabak sugiyyoy, abaluk tenen. Sarrak tu waa num yanuu, tu edde tekke num yanuu, yi fanah siinik yamaatay, anu yab qadlit keenih kureyyok» 'yaanam keenik axcuk yen.

⁵ Sahda kaal tamaateeh, assakaxxiyyah amo ramma kaah haanam faxan waqdi, keenik yookomeh matarra keenih iyyah aliilit ken xabba haak ken fugutak yen.

⁶ Absalaam kulli Israayilih yooboke numuy malik yab keenih kura'gidih malikil yemeetehiyyak tonnah abak yen. Tonnal mango mara isi qaxat hee.

^7-8 Absalaam affara sanatih gide wonnah abak sugeek lakal, malikik annah iyye. «Anu Suuriyal Gasur deqsitta magaalal en saaku YALLAK, «YALLAW, Yarusalaam yoo gacissek, Cebron-magaalal koo aqbudeyyo 'yaanamal YALLAH nadri culeh en. Tonna leemik YALLAH cule nadri aba'gidih gexam faxak, yoo rub» kaak iyye.

⁹ Malik Dawud, «Wagri ko'lih yanayik, gex» kaak iyye. Too waqdi Absalaam Cebron fan gexe.

¹⁰ Takkay immay wokke gufe waqdi, Israayilih ubukka 'ye marah inkih farmo ruubeh iyyemii, «Baantah anay taabben waqdi, anay fayya haay, ‹Absalaam Cebron-magaalal malik yekke› inxica» keenik iyye.

¹¹ Absalaam, yo'lih gexa akak iyye maray Yarusalaamak Cebron magaala fan kaa'lih gexehiyya namma boolih gide akkuk yen. A mari usuk isi bagul malsem aaxaguk manannaay, tu aaxige'kal kaa'lih gexen.

¹² Usuk sadgat kabuk teenak abeeh, kabuk teenak kaadu Giilô-magaalal yan Acitoofal deqsita numuy Malik Dawuduh fayu acayuk yenehiyyah farmo ruube. Waqlak wadir malikil malsen mala digga baahak bahteeh; Absalaam kataata mari amagguk yemegge.

DAWUD YARUSALAAMAK KUDE

¹³ Num Dawuduh farmo baaheeh, kaak iyyemii, «Israayil mari Absalaamak, ‹Ku kabut gacennooh ko'lih rabenno› 'yaanam axcuk yenen» iyye.

¹⁴ Too xaagu gee waqdi, Dawud, kay gubal taamita maray Yarusalaam addal yanik iyyemii, «Absalaamak nasillimeemi. Xayuk ugutay nee beya. Woh abe waynek, kaa kee kay mari amaateleeh, num macabaanaay, magaalal sugu waa mara inkih selelon» keenik iyye.

¹⁵ Too mari, «Amoytaw, atu nek aba intem abenno. Meqeh» kaak iyyen.

¹⁶ Too waqdi malik, kay gubal taamita doolat mara kee isi buxah mara gabat hayya heeh, daqaarime. Kay caggoh gubih caggoh nikaacat yabbixe agabuk taban buxa dacrisa'gidih elle cabe.

¹⁷ Malik kee kay mara magaalak eweqqa 'yeenih ellecabot yen qari gufen waqdi sollu iyyen.

¹⁸ Kay gubal taamita mari kaadu sollu 'ye. Too waqdi kaat dacayrih tan qaskar kaal taturteh foorte. Sarrak laca boolih numuy duma Gat-magaalak kaa'lih temeeteh sugtehiyya kaadu kaal taturteh gexxe.

^19-20 Malik Dawuduu, Ittay deqsita numuy Gatak yemeete marih abbah yenehiyyak iyyemii, «Atu ne'lih magexinay uduur. Kimal yemeete qibnaytu kinnito ikkal, anu innih gexa'kke maaxigak, inni lih koo mameekisa. Qusba malik lih baaxol elle raq. Isi mara gabat beyaay uduur. YALLIH maqaane koo taafay; YALLI wakali koh yakkay» kaak iyye.

²¹ Ittay kaal gacseemih, «Gexinnaan ikke ko'lih gexeyyooh, rabtek ko'lih rabeyyoomuh, YALLAY waarahiyyah migaq kee ku manol xiibita» iyye.

²² Too waqdi malik kaak iyyemii, «Meqeh hay, wohoysa titta lih gexenno» kaak iyye. Too waqdi Ittay is kee isi mara kee buxâ-mara luk foore.

²³ Dawud kataata mari foore waqdi, ummatta weqteh. Sarrak Dawud kee Dawud-mara Kidroon deqsita buyyik sinam elle dago baaxo fanah haysiten.

²⁴ Sek-Saaduk kee Leewih yooboke maray Yallih Qahdih Sandug akkuquk baaheenihiyya kaadu yemeeten. Woo Sandug daffessi heeniih, magaalak sahda inkih taturtam fanah akkuqe'kal sugen. Sek-Abiyataar kaadu wokkel ken lih suge.

²⁵ Tohuk lakal malik Saadukuk iyyemii, «Qahdi-Sandug magaala fan gacis. YALLI meqem yoh faxek, tet able'gidih is elle yok raqta arac ayrok teena yoo gacsele.

²⁶ Usuk yoo faxe week, isih faxem yok abbaasitu waa kaak; Qahdih-Sandug gacis» kaak iyye.

²⁷ Tohut macabinnay kaadu qagseh Saadukuk, «Koo kee Abiyataar, ku baxa Acimqax kee Abiyataar baxa Yonaatan gabat beyay uduura. Amaan sin lih yanay.

²⁸ Yi tiyah tu gactek, isin tu elle tani'nnih farmo yoh rubtaanam fanah, bacarih tan baaxol Ordon weeqaytu akak taban tabeenah garil sugeyyo» iyye.

²⁹ Too waqdi Saaduk kee Abiyataar, Qahdih-Sandug wadir Yarusalaam fan gacisseeh, tokkel elle yeeden.

³⁰ Dawud ‹Madeera-li Qale› deqsitak ten qale boogisak yewqe. Too waqdi ib-qassih yeneeh, amot saro heeh yen. Kaa'lih yen mari yakkeemiik kaak kaxxih amô-sara isik hayya heeh, woo qale kaa'lih boogisak yewqen.

³¹ Dawud, «Acitoofal Absalaam marat yengele» 'yaanam yoobbe waqdi, YALLA kallaceeh, iyyemii, «YALLAW, Acitoofal fayu foyya ab» iyye.

³² Dawud qaleh amoy Yalla elle yaqbudeeni gufe waqdi, aamanuk yen kataysay migaaqah Cusaay deqsitaah, Qarka deqsita gulubuh aabakuk yenehiyya gee. Cusaay Dawudut tekkeemih sara isik qanxiseh yeneeh, amol ballaaqe luk yemeete.

³³ Dawud too waqdi kaak iyyeemih, «Akkel yo'lih gactaamah yoh xiqtam mantu.

³⁴ Takkay immay Absalaam fan uduuraay, kaak intamaa, ‹Anu ku abba digga luk taamitak akah suge'nnah, koh kaadu taamiteyyo› kaak inxic. Tonnal Acitoofal yecee fayu oggole ken kaletto.

³⁵ Sek Saaduk kee Sek Abiyataar wokkel taniih; Absalaamak aabbinnaan xaagu too seekah waris.

³⁶ Acimqax kee Yonaatan deqsitta ken xayloh nammay wokkel yaniih; xaaguk geyya haanam keenil yoh ruubeloonuk, keenih waris. Toh kaxxam yoh xiqele» kaak iyye.

³⁷ Cusaay toh kaak oggoleeh, too waqdi woo magaala fan yuduure. Absalaam kee kaak, mariiy kabuk magaala inki adda culen.