2 Samuwel 14 - NABUWWA KEE MALIKWA

ABSALAAM YARUSALAAMAL YUDUURE

¹ Yowab, Malik Dawud Absalaam waytik gexxaamah kaxxa maxhax yibbixem yuble waqdi,

^2-3 kaxxam bagi cubbi le barray dabqah Takooqa deqsitta magaalal tenehiyya kaa fan ruube. Woo barrak iyyemii, «Dawud fan gex. Gexxa way rookat sugte barra ceelay, qatri mahaysitinay, mango udduruh rookitak sugte barra ceelay kaal gex. Sarrak kaa fan tamaate waqdi, anu taway kok elle inxicca axce'nnal kaak axcetto» teetik iyyeeh, intu waytam warissa teetih heeh tet ruube.

⁴ Too yaabal taaxige barra malikil gexxeeh, kay massakaxxah baaxo qansah xagtam fanah qununna inte. Sarrak, «Yi malikow, ku cato faxak emeete» inte.

⁵ Malik Dawud, «Catoh maca faxak temeeteeh?» teetik iyye. Too waqdi kaak intemii, «Yi amoytaw, yi baqli rabeh yaniih, gubna kinniyo.

⁶ Lab xayloh nammay luk suge. Too urri, ken kalkaala mari elle deedala arac, qeebih titta beeniih; tiyak teeni too qeebit yok rabe.

⁷ Taway hay, yi amoytaw, yi mari inkih qaduwwi yok yekken. ‹Awka qide awka caneh qidna'gidih nel kaa bah› yok iyyen. Ta awkay raaqehiyya keenil eceek, baxa maleh raaqu waah aniih, inki baxay niyah luk sugehiyya yok qidaanam faxan. Ken abba ramad maleh cabaanam faxaana'mmay, tahak tuk teena yoh inta'gidih kol emeete» inte.

⁸ Too waqdi malik teetik iyyeemih, «Atu isi buxah uduuraay; a caagid anu innih bicseyyo» teetik iyye.

⁹ Barra kaak intemii, «Atu abba haytaamah qellat yoo kee yi buxah maral gacay. Qellatah koo kee ku buxah mara akak barih raaqetton» inte.

¹⁰ Too waqdi malik qagseh teetik iyyeemih, «Koo meysiisa mari yenek, yol baahaay, wadiriik koo mataqbisan» iyye.

¹¹ Is kaadu qagisseh kaak inteemih, «Yi malikow, raaqe baxa caneh yok qidam faxa numuk uma biilu yoo catettoomuh, YALLAY ku Dageltah yanih migaaqal xagna yoh acuy» kaak inte. Dawud teetik iyyeemih, «Ku baxal dagoohim baxa kinni way num baahu alliile wayu waamah, YALLAY waarahiyyah migaaqal koh xiibita» teetik iyye.

¹² Too waqdi kaak intemii, «Inki qangara ko'lih yaabu waa, yi malikow» inte. «Meqehik, yaabit» teetik iyye.

¹³ Too waqdi kaak intemii, «Atu annah yan qellat Yallih maral macah bahtee? Isi baxay marin baaxol yanihiyyak uduura maxcinnito. Away inteemil isih isil mekeltem deqsitta.

¹⁴ Nanu, caxitte lee innal, wadir manaduuraay inkih rabah nan. Takkay immay Yalli marin baaxo megloh gexe num elle yaduure gurra kaah bicsa'kkal, kaa maqida.

¹⁵ Taway hay, yi malikow, ummat yoo meysisseemih sabbatah, kol emeete. Yoh tu gactek, malik yi yab oggole le 'yaanam niyal hee.

¹⁶ Anu axcem aabbeleeh, yi baxa qidam faxa numuy Yalli neh yecee baaxok nee yayyaaqem faxahiyyak nee catele 'yaanamah niya kol heeh emeete» inte.

¹⁷ Qagisseh kaadu intemii, «Yi malikow, atu Yallih malaykattih gideey, umam kee meqem tittak baxissu dudda. Tonna-leemik, malik yoh culu waa xagni yoo catele, 'yaanam inni afqadol heeh emeete. YALLAY ku Dagelti kinni ku qaxa yakkay!» inte.

¹⁸ Too waqdi malik teetik iyyemii, «Inki qangara koo esseru waak, nummat yo'lih yaabe mantuu?» teetik iyye. «Yi malikow, faxxa haytam yoo esserit» kaak inte.

¹⁹ Teetik iyyemii, «Aham kok inxica intem Yowab maay kinnii?» iyye. Too waqdi barra kaak intemii, «Away atu yol esserta esserok elle asillime'nna mayyu. Aham yok inxica intem kaa kinniimih ku gabal xiibita. Ta yab afat yok haytem kaa kinnih» inte.

²⁰ Qagisseh intemii, «Yowab tah akah abem, away yan caalat gitah gacsa'gidi. Yi malikow, kasah Yallih malaykah inna litoh takku waytam taaxigeh» inte.

²¹ Sarrak, malik Yowabah secca 'yeh; yemeete waqdi, kaak iyyeemih, «Atu faxxem takkayik, gexay Absalaam bah» kaak iyye.

²² Yowab malik-massakaxxah baaxok bagul qununna iyye. Sarrak malikih dooqa abe. «Yi malikow, koo esserem yoh oggolteemih sabbatah, ku intit kaxxa num ekkem aaxigeh» iyye.

²³ Waqalak wadir kaa baaha'gidih, Gasur fan gexeeh; Absalaam gabat hayya heeh wadir Yarusalaam fan yuduure.

²⁴ Takkay immay kaa baahen waqdi, malik iyyemii, «Absalaam isi buxal gacaama; yi inti kay inti able waytaama» iyye. Tohuk gexxaamah Absalaam dabqah isi buxal gaceeh, too ayrook wadir abbat mangoorowinna.

²⁵ Israayil baaxol qax-maqaaneh Absalaam innah yan num mananna. Amok xagortaay ibak lifiqih amma 'yaanam cooca luk mananna.

²⁶ Amô-xagorti kaak kaxxam manguk yeneeh, sanatal inki adda tet argaquk yen. Xagorti kaak kaxxam yanbeh yaxxeere waqdi, qilsah namma kiilok fula akkuk yen. Woh elle timixxigem, woo dabaanal malik buxal qilsi duyye elle keexak sugen miizaanak ten.

²⁷ Absalaam lab-xayloh sidoc kee say-baxá luk yen. Baxá migaaqah Tamaari deqsitak ten. Is kaxxam qax-muquk ten.

²⁸ Absalaam malikih ambullee'kal namma sanat Yarusalaamal suge.

²⁹ Sarrak, Yowab fanah farmo ruubeeh, «Yi abba fanah farmo kol ruuba'gidih yoo guf» 'yaanam kaah ruube. Takkay immay Yowab kaal mamatto. Absalaam kaadu qagseh gersi farmo kaah ruube. Yowab kaadu too farmol maamattinna.

³⁰ Too waqdi Absalaam is lih taamita taamat le marak iyyemii, «A yi buqrek garit tanim, Yowab buqreey; gabru deqsitta daro kaah yoobokeh yanik, gexay gira kaak edde ruuba» keenik iyye. Oson gexeenih woo buqret gira ruuben.

³¹ Too waqdi Yowab Absalaamal yemeeteeh kaak iyyemii, «Ku mari buqret gira yok akah ruubem macaay?» kaak iyye.

³² Absalaam kaal gacsemii, «Anu ama 'yaanamih farmo koh ruubeeh mamattito. Tohuk gexxaamah, ‹Gira edde ruuba› keenik exce. Malikil gexxa 'teh, anu Gasuruk akke fan akah emeetem, yoh kaak essertam kok faxe. A baaxo amaateemik, wokkel elle aadem yoh aysuk ten» kaak iyye. Yab tokket mayseedinnay bisoh beeh, iyyemii, «Away malikit angoorowem faxak, kaat elle angoorowe'nna yoh bicis. Hoxissem yoo tekkek, usuk raba yol yackumay» iyye.

³³ Tohuk lakal Yowab Malik-Dawudul gexeeh, Absalaam kaak inxicca iyyem kaah warseh. Too waqdi malik, Absalaamah ama 'yaanamih farmo ruube. Absalaam kaal yemeeteeh qansa kaak baaxo xagtam fan massakaxxah qunuune. Malikiiy fugga kaa heeh kaa arcibiseh.