2 Samuwel 13 - NABUWWA KEE MALIKWA

AMNON KEE TAMAARI

¹ Toh tekkek wadir waqla gexxe. Dawud baxi Absalaam digibe wayte qax-meqe maqanxá luk yen. A awká migaaqah Tamaari deqsitak ten. Dawuduk gersi baxay Amnon deqsitahiyya Tamaari yikcine.

² Kaxxam tet yikcineeh, tet kacanuh lakimah aracal gace. Tamaari bikrit teneeh; tonna-leemik Amnon tet geelem makkalinnaay, tohuu biyak kaal tekke.

³ Takkay immay Amnon, Yonadab deqsita qammih-baxa kataysah luk yen. Yonadab-abba, Simqa deqsita Dawud saqalak ten. A qammih baxi kaxxa cubbi kee wale luk yen.

⁴ Qammih baxak iyyeemih, «Ale yaalo! Malik baxah tan way, kulli saaku cisab kol takkem macaay? Sugay tanim macaay? Yoh warisey» kaak iyye. Too waqdi Amnon, «Toh kinnim koh warisu waah, yi abbah baxa Absalaama lih ina kee abba le Tamaari deqsitta awkáh kacani yoo yibbixe» kaak iyye.

⁵ Yonadab too waqdi kaak iyyemii, «Tonnal abtam hay! Gexxa 'xicay qarkaytol qaxah gacay lakmissam cel. K'abba kot boysita'gidih yamaate waqdi, kaak intaamah, ‹Ku maganak, yi maqanxá Tamaari maaqo yoh abta'gidih yoh rub. Anu tet elle able'kkel, is maaqo yoh bicissaah, isih afat yoh haytam teetik faxak, tet yoh rub› kaak inxic» iyye.

⁶ Amnon «Meqeh» kaak iyyeeh; kataysa kaa elle yescesse'nnal, lakmisam cella heeh qarkaytol gace. Malik tah yoobbe waqdi, kaat boysita'gidih gexe. Kaal yemeete waqdi, abbak iyyemii, «Ku maganak Tamaari maaqo yoh abta'gidiiy anu tet elle able'kkel isi gabak yoh bicisse gaqamboytay kaxxam meqehiyya isih afat yoh haytam faxak, tet yoh rub» kaak iyye.

⁷ Too waqdi Tamaari Malik-Dawud buxal sugteeh; farmo teetih ruube. Teetik iyyeemih, «Amnon-buxa gexay, maaqo atu kaah bicis» teetik iyye.

⁸ Too waqdi is Amnon fan gexxeeh; tokkel usuk qarkaytô bagul qaxah teetih suge. Too waqdi arquseenih sugen qagina bahha hayteh arqusseeh, sarrak usuk tet elle yable'kkel gacca inteh gaqambo kaah bicisse. Woo gaqambo alassa hayteh,

⁹ usuk yakme'gidih distik eyyeqqa hayteh kaah bahte. Takkay immay usuk yakamu cineh. Too waqdi kaa'lih yen marak inkih, «Gexa» iyye. Too mari inkih gexe.

^10-11 Too waqdi teetik iyyemii, «Ama gaqambo a qarkayto fan annah yoh baahay, isi gabaak afat yoh hay» teetik iyye. Gaqamboyta ugussa hayteh kaa fan bahte waqdi, xabba tet heeh is fanah hirigga tet heeh, «Amay a qarkaytol yo'lih gac» teetik iyye.

¹² Too waqdi kaak intemii, «Kat bas qaybih tanim maxcin, yi toobokoytaw! Tahah yoo madirkisin. Tah Israayil addal abeh umaamak kat. Uma-taamah yoo magorrisin» kaak inte.

¹³ Qagisseh, kaak inteemih, «Ah yot tikka 'teh, elle raaqa'kke mayyuuy; atu kaadu ahat assek, Israayil rasul qaybit radettom ixigay. Ahamat assaamak, ku maganak malik lih yaabay. ‹Tet yoh ab› intek, yoo koh abelek, ku maganak ahak raq» kaak inte.

¹⁴ Usuk tet yaabat baaqid mahanna. Caylah teetih aabbuk manannaay, tonna-leemiik teetik yeyseh tet cayliseh.

¹⁵ Tet geek lakal uma'nnah tet yinqibe. Duma kacanuh teetih assalluk suge'nna, naqabuh teetih yesselle. «Kat ugutay, buxak yok eweq» teetik iyye.

¹⁶ Is kaak intemii, «Magexa. Away yoo ruubaanam, yol bahteh tan umaanek lafitta umaane kol akkelem ixig» kaak inte. Takkay immay Amnon tet yaabat baaqid mahannay,

¹⁷ buxal kaah taamita numuh secca 'yeh, «A barra foocak yok kal. Wonnah afah tet eyyeeqay qari teetit alif» kaak iyye.

¹⁸ Tama num afah gutuqak tet yeyyeeqeeh, qari addak teetit alfe. Too waqdi Tamaari xer kameesiy namma gaba xeerihiyya xagarat luk ten. Woo dabaanal wonnah yan sartan haytam, digibe wayte malik xaylok ten.

¹⁹ Tohuk lakal Tamaari gombod amol isik caxxeeh xagarat le kames qanxisseeh foocal namma gaba isik hayya hayteh weeqak gexxe.

²⁰ Tet toobokoyti Absalaam ah yuble waqdi iyyemii, «Amnon koo maay caylisee? Yi maqanxáy, bas, ahimih manneeqebbin. Usuk abba ko'lih le ku toobokoyta'mmay, aham atu gersi marah mawarisin» teetik iyye. Tohuk wadir Tamaari Absalaam buxal gacteeh, tokkel teetit tekkeemih dibuukitteh, maxhaxxeh.

²¹ Malik Dawud ah yoobbe waqdi, kaxxam bagcarrite.

²² Absalaam kaadu Amnon kay maqanxá cayliseemih sabbatah, kaxxam kaa yinqibeeh, afti yab kinni way kaa'lih luk mananna.

ABSALAAM ABE CANÊ-GACSIYYA

²³ Namma sanatak lakal, Absalaam Baqal-Caxor deqsita aracal illik xagor kalam faxe. Baqal-Caxor, Efrayim magaalal xayi aracak ten. Too ayrot malik xaylok, «Num raaqe waay tokkel qibnaytiino siinih abak yol ama» iyye.

²⁴ Dawud fan gexeeh kaak iyyemii, «Illik xagor kalam faxak, woo ayro koo kee ku gubal taamitta doolat abbobtik wokke qibnaytiinoh yol amaatetton» kaak iyye.

²⁵ «Aleey, yi baxaw, nanu inkih woo arac nakkeemiik nemeetek, wonni qibnaytiinol koo biyaakele» kaak iyye. Absalaamah tu gactek, kaat qagamqagseh, «Tamaateenim meqe, yi abbaw» iyye. Malik, «Aleey yi baxaw, neh mataqabin immay abtam kol tamqay» iyye.

²⁶ Absalaam too waqdi abbak iyyemii, «Hay meqek, ahaysa bas Amnon yamaatay inxic» kaak iyye. Malik Dawuduuy, «Kaa akah sectam faxxam macaay?» iyye.

²⁷ Takkay immay Absalaam qagamqagisak, «Kaa faxa» axcuk kaa kallace. Sarrak Dawud Amnon kee kay tooboko inkih wokke gexxam keenih oggoleh. Tohuk lakal Absalaam malikih taguude xigla bicse.

²⁸ Kay taamat yan marak iyyemii, «Amnon kaxxam yaskirem tablen waqdi, cubbusak suggu 'xicay; anu amri siinih aceeyyok, isin kaa qida. Mameysitina. ‹Macah kaa qiddeeniih?› siinik iyya mari yenek, yoo liton. Labha tikaay, tamahal namma kalbi mahana» keenik iyye.

²⁹ Absalaam taamat yen mari, usuk keenik elle inxicci iyye'nnal, Amnon qideenih. Too waqdi raqte toobokok kulli numuuy isi bakilit koreh kude.

³⁰ Oson buxa gufe'kal gitat yanin waqdi, Dawuduk iyyeenimih, «Absalaam, xaylo kok qideeh ku xaylok num maraaqinna» iyyen.

³¹ Too waqdi malik sollu 'yeh sartan isik qanxiseeh, qari-baaxal afah rade. Kay buxal taamita kay mari kaadu sara isik qanxise.

³² Too waqdi kay saqlih baxi Yonadab kaak iyyemii, «Malikow, oson ku xaylo inkih maqidinnoonuy, rabtem dibuk Amnoonu. Absalaam ahat asu waam, Amnon kay maqanxá Tamaari caylise saakuuk foocal qellisak mananna.

³³ Tonna'mmayii xaylo inkih kok qideenih iyya marih xaagu maabbin. Rabtem dibuk Amnoonu» kaak iyye.

³⁴ Oson tohut yanin waqdii, Absalaam woo arac cabeh kude. Sarrakaay dacayrih suge qaskariiti butta yakke mari Coronyim qaleh gitaak amaatih yuble. Too waqdi woo qaskariiti malikil gexeeh yublem kaah warse.

³⁵ Yonadab Dawuduk iyyemii, «Too tamaatem, ku xaylooy; oson amaate loonu 'yaanam kok exceh suge» kaak iyye.

³⁶ Yonadab tah inxicci 'yeh gaba kale waqdi, Dawud xaylo temeeteh. Kaxxam boogisak qari culen. Dawud kee kay gubal taamita doolat mari too waqdi kaadu inkih weeqah hayya heen.

^37-38 Absalaamah tu gactek, Qammihud baxa Talmayi deqsita numuy Gasur deqsitta baaxol malikih yanihiyya fan gexe. Tokkel sidiica sanatih gide suge. Malik Dawuduh tu gactek, mango wakti Amnon arkat suge.

³⁹ Wohuk elle ugte'kkel, Absalaam maxhax kaa yibbixe.