2 Samuwel 12 - NABUWWA KEE MALIKWA

NAATAN YALLIH FARMO DAWUDUH WARSE

¹ YALLI, Dawud abem yinqibeemih sabbatah, nabi Naatan kaa fan ruube. Naatan kaa fan yemeeteh, kaak iyyemii, «Namma num inki magaalal tene iyyen. Numuk teeni keenik gaddalih yeneeh, akitti baacoytak yene iyyen.

² Gaddalih yan num mango illi kee laa luk yen.

³ Baacoytah yan numuh tu gactek, inki anaqtoy xaamite luk yene iyyen. Too num too anaqto, baxáh innal, amo akak wagitak isi buxal isi xaylo lih tet yeynebe. Maaqok isih yakme maaqo is lih tet adoobisak, isih elle yaaqube kobbaayak lee tet afaquk tet qarisak yene iyyen. Xiin kinni-way amô-ginah isi carayal tet xiinisak yene iyyen. Hununuh kacanuh sammok xalen baxáh gide teetih assalluk yene iyyen.

⁴ Ayrok teena qibnayti gaddali buxa yemeete. Taaxige gaddali, yemeete qibnaytuh isi saqak lac qidam cabba heeh, taaxige miskinti-anaqto beyya heeh qibnaytuh yusguude.»

⁵ Naatan tama ceelallo kaah warissa hee waqdi, Dawud a gaddali abem yoobbe waqdi kaxxam bagcarrite. Iyyeemih, «YALLAY waarahiyyah nabnal xiibitaah, tah rabi akah yaguude numuk tanih tan» iyye.

⁶ «Racmat sinnih annah tan umaane abek wadir, beyyi heemih gide affara adda yagdiyem kaal tan» iyye.

⁷ Too waqdi Naatan kaak iyyeemih, «Hay, tonnah tanim abtem koo!» kaak iyye. Qagseh, «YALLAY Israayil doore Dagelta kinnihiyyak farmo koh abbixe. YALLI kok iyyaamah, ‹Israayil malik takke'gidih koo dooreeh, Saawul kol baahe raareemik innih koo cateeh,

⁸ kay midir kee kay agabu koh ecee. Yuuda kee Israayil rasuk inkih malik koo abe. Aham koo xiqe wannah, namma adda a gid takkem uxih koh osise raare.

⁹ Hay, yi amri cinna hayteh makkook isi amril taamitte. Yi garil annah tan gacta taamat akah assem macaay? Uriyya qiddem Qammon mara'mmay, wohim elle takke'nna bicissem koo. Uriyya barra isih haysitte.

¹⁰ Yoo hawwenna hayteh, Uriyyâ-barra isih abitteemih sabbatah, ku ramad carbi gadda akkele› 'yaanam YALLI kok iyya.

¹¹ Qagseh kaadu kok iyyaamah, ‹Ku buxah marak addak umaane koo abbixele. Isi namma intih abalih, ku agabu kok kalla heeh, kol xayi numih gabal heeyyo. Too num qado-laqo sahdak foocal fido keenit faxele.

¹² Atu abte umaane uqurat abte'mmay, anu taway kok axcem gubbik bagul inkih yan Israayil mari elle yable'kkel kot absiiseyyo› 'yaanam YALLI kok iyya» kaak iyye.

¹³ Too waqdi Dawud nabi Naatanak iyyeemih, «Anu nummah YALLAL dambi baahe» iyye. Sarrak Naatan annah iyye. «YALLI dambik qafu koh iyyeh raba mabta.

¹⁴ Takkay immay away abteemil YALLA bursutteemih sabbatah, away xalte baxi kok rabele» kaak iyye.

¹⁵ Too waqdi Naatan isi buxah gexe. YALLI, Uriyyâ-barra Dawuduh xalte baxat lakima ruube.

DAWUDUK BAXI RABE

¹⁶ Too waqdi Dawud, baxi kaah qaffoota'gidih, Yalla kallace. Maaqo afah xagu cineeh, kulli bar isi qari culla 'yeh qarik baaxal deerih gacca 'yeh, elle maaca fan sugak yen.

¹⁷ Buxal kaxxa taamat yen maray kaal xayuk raaqak yenehiyya kaal gexak, «Ahaysa ugutay akkek kat» 'yaanam kaak axcuk yeneeniih, woo aracak kaa ugsaanam faxak yenen. Takkay immay usuk toh keenik mango adda cineeh, maaqo kaadu ken lih akamuk mananna.

¹⁸ Ayyaamak lakal woo awki rabeeh, too waqdi kay buxal taamat yen mari woh kaah warsaamak meysiteh. Oson sittak iyyeenimih, «Awkal rooci anih, kaal lih yabnem oggolak masuginnak, away ‹Baxi kok rabe› 'yaanam kaak innek, abu waam iyyi yaaxigeh yaniih? Ah kaah warisnek, tuk teena isil baaham takkeh» iyyen.

¹⁹ Dawuduh tu gactek, tutuc axcih ken yuble waqdi, awki rabem yeexegeeh, «Awki maay rabee?» keenik iyye. «Yeey, rabeh» kaak iyyen.

²⁰ Too waqdi Dawud woo elle suge qari-baaxak ugteeh, kaqalla 'yeh amo filla heek lakal, edde suge sarak katta 'yeh meqe sarat gace. Tohuk lakal YALLIH Qibaadah-Qaril YALLA yaqbude'gidih gexeeh, tokkel YALLA yuqbude. Sarrak isi buxah yuduureeh, buxa gufe waqdi, «Maaqo yoh baaha» iyyeeh, maaqo kaah baaheeniih; yokme.

²¹ Kay buxal taamat yen mari ah yuble waqdi kaak iyyemii, «Awkal rooci yen saaku kaah weeqakaay, maaqo cinak sugteh; awayay awki rabehiyya ugutta 'teh maaqo akah takmem waagisnehik macaay?» kaak iyyen.

²² Too waqdi keenil gacsemii, «Nummah awki rabe'kah yen saaku maaqok soomuh gaceh weeqeh; woh akah abem, ‹YALLI yoh racmateleeh, awka rabak yoh catam takkeh› 'yaanam bagut ascubuk suge.

²³ Awayah tu gactek, awki rabeh yanik, macah maaqo cinaah? Rabak kaa gacsam maay duudaa? Ahaysa anu kaa fan gexeyyo ikkal, usuk yol magaca» 'yaanam iyye.

SULEEMAN YOOBOKE

²⁴ Tohuk lakal Dawud isi barray Batsabaq deqsitta, baxi raba akah hawwenta'nnah, tet ruffa haamat gaceeh, fido teetit faxe. Is bagut kaah haysitteeh, lab-baxa kaah xalte. Dawud woo baxak migaaqah Suleeman iyye. YALLI woo awka yikcineeh,

²⁵ nabi Naatanak iyyeemih, «Ama yooboke awkak migaaqah Yadidya inxic» 'yaanam iyye. Wohuk maqna YALLI yikcine numu 'yaanama. A migaq, YALLI kaa yikcineemih sabbatah kaah yeyyeeqe migaaqa.

RABBA DEQSITTA MAGAALA YIBBIXEN

²⁶ Tohut yanin waqdi Yowab, Qammon-marak inaytâ-magaalah gaadut yeneeh, malik elle suge caafat teetik yibbixe.

²⁷ Too waqdi Dawuduh farmo ruubeeh iyyeemih, «Rabbâ-magaalak leeh arac ibbixeh gabat raaqiseh ani'mmay,

²⁸ taway qaskarak raqqa 'tem gaabossa hay magaala tabbixe'gidih am. Anu a magaala usuk raaqise yok 'yaanam mafaxak, amay isih ibbix» 'yaanam kaah ruube.

²⁹ Dawud too farmo yoobbe waqdi, qaskarak elli haam gaabossa heeh Rabbâ-magaala fan gexe. Too magaalat qeebi abeeh yibbixeh.

³⁰ Qammon mari yalla iyyeh aqbuduk suge Milkom deqsitta ceeloh amot suge dahabak bicsen kalabta bee. Too kalabta miizaanal heen waqdi, qilsah soddom kee koona kiilo akkuk ten. Woo kalabtah bagul bilqah qax-meqe xaa yeneeh; Dawud too xaa beyya heeh isi kalabtah addat hee. Tohuk kalah woo magaalak mango duyye dannabah orbisen.

³¹ Magaalal suggu 'ye mara yeyyeeqeeh, miisaar kee maataka kee godmat daadur bicisa keenik iyyeh ken dirkise. Raqqa 'te Qammon marih magaaloolik kaadu toh abe. Tohuk gaba kalla hee waqdi, kaa kee kay mara Yarusalaam fan tuduure.