2 Samuwel 11 - NABUWWA KEE MALIKWA

DAWUD KEE BATSABAQA

¹ Ciggiila sugum adday dardorti xeflih qeebih edde gexxahiyyat, Dawud, Yowab kee kalah tan qaskar abbobti kee Israayil qaskar qeebih ruube. Oson Qammon maral umam baaheenih, qaskarak qeebih yeyseeniih; Rabbay inaytâ-magaalah keenik tenehiyya maraasiyya heenih yabbixeenim faxen. Dawud isih magexinnay, Yarusalaam magaalal elle raaqe.

² Ayrok teena Dawud carra waqlat xiinik ugutta 'yeh, isi qarih amol yewqe. Wokkel booxah yan aracal wonnak annah gexak suge waqdi, barra kaqalah yuble. A barra kaxxam qax muquk ten.

³ Tonna leemiik malik is kinni sahdayto yaaxigem faxe. Too waqdi farmoh num ruubeeh, woo num, «Tet migaq Batsabaqa. Abba teetik Alyamaay; tet ginnaaqot tabbixem, Uriyya deqsita numuy Ciitah yoobokehiyya» kaak iyye.

⁴ Too waqdi Dawud tet baahu waa mara ruubeeh, woo mari gexeh tet baahe. Tohuk lakal Dawud fido teetit faxe. Isiiy wasaktuk too waqdi kaqalteh sugteh. Sarrak isi buxah gexxe.

⁵ Waqlak wadir teedeqem isik tubleeh, wohim Dawuduh warissa'gidih farmo kaah rubte.

⁶ Toh yoobbe waqdi Dawud gaadi abbah yen Yowabak, «Ciitah yooboke Uriyya yoo fan rub» 'yaanamih farmo ruube. Yowab too farmo kaa gufte waqdi, Uriyya kaa fan ruube.

⁷ Uriyya yemeete waqdi, Dawud xaagu kaak abeeh, «Yowab kee qaskar mannah taniih? Carbi manna siinil leeh?» iyye.

⁸ Too xaaguk gaba kale waqdi, «Ahaysa, isi buxah gexay cawalak iba kaqalsitay offof» kaak iyye. Uriyya malik buxak yewqeh gexe waqdi, Dawud, buxah mattaco lakal kaak ruube.

⁹ Takkay immay Uriyya buxah magexinnay, malik gasol dacayrih tan qaskar elle xinta aracal ken lih xiine.

¹⁰ Dawud Uriyya buxah gexe weem yoobbe waqdi, kaah secca 'yeh, «Mango waktih buxal masugittok, buxah macah gexe wayte?» kaak iyye.

¹¹ Uriyya kaal gacseemih, «Israayil kee Yuudâ mari qeebi booxal yaniih, Qahdih-Sandug kaadu wokkel ken lih yaniih, tonnah kaadu, carbi abbah yok yan Yowab kee, kay gubal tan qaskar abbobti gubbik bagul tan way, maaqo kee maqubuh buxah gexaah, inni barra lih xiinam anni'nnah abaah? Yi amoytaw, tannah taniimit ase wayu waamah ku gabal xiibita» 'yaanam iyye.

¹² Too waqdi Dawud, «Hay, wonnal a saaku akkel elle assa inteh, xinna maacissa intek wadir, beera woo carbi booxa fan koo ruubeyyo» 'yaanam kaak iyye. Tohuk gexxaamah Uriyya woo saaku kee bar elle aseeh elle xiine.

¹³ Too waqdiiy Dawud afxagoh kaa arcibiseh kaa yiskirise. Takkay immay too bar kaadu xiinih buxa morbinnay, malik gasot dacayrih tan qaskarih aracal xiine.

¹⁴ Maaci maacise waqdi Dawud Yowabah yuktube warkat kaal yeceeh, «Tama warkat Yowabal bey» kaak iyye.

¹⁵ Yowabah yuktube farmô-warkat annah axcuk ten. «Qeebi rada waqdi, Uriyya qeebi elle qilsim table ikket qaskarak foocat kaa hay. Too waqdi qeebit akah raba'nnah edde kaa cabba haay, isinnih wadir kaak iissa 'xica» 'yaanam heeh yen.

¹⁶ Tohuk lakal Yowab kee qaskar magaala tabbixe'gidih maro magaalat haan waqdi, Uriyya, qaduwwi-qaskaray kaxxa agiirah tanihiyya edde ten aracat kaa hee.

¹⁷ Tokkel qeebi rade waqdii, qaduwwi-qaskar edde sugte aracak eweqqa 'teeh, Yowab-qaskarat qeebi abte. Too waqdi Israayil qaskarak tu takkem rabteeh; too marih addat Uriyya kaadu edde rabe.

¹⁸ Tohuk lakal Yowab woo qeebi elle yekke'nna warissa farmo Dawuduh ruube.

¹⁹ Woo farmo elle ruube numuk iyyeemih, «Carbi elle tikka 'ye'nna Dawuduh warissu wayta waqdi,

²⁰ Dawud bagcarritta 'yeh, ‹Magaalat kaxxam xayyowwa 'teenih qeebi akah abteenim macaa? Magaalak gidaarat xaquh gacca 'yeenih gaysê-baxat siinit heeloonum mannal teegemen?

²¹ Duma Abimalik elle qiden inna kassa mahannitoonuu? Barra Teebex deqsita aracal gidaar amook eceyya kaat hayteeh, too eceyyat edde rabe. Toh aaxagih gidaarat macah xayyowten?› kok iyye kaa tekkek, kaak intaamah, ‹Ku qaskariitah yen Uriyya woo rabe mara lih rabeh› kaak inxic» iyye.

²² Farmoh ruuben num Dawud fan yemeeteeh, Yowab kaak elle inxicca 'ye'nnal, carbi elle yekke'nna kaah warse.

²³ Iyyeemih, «Qammon qaskar qandeh nek umuk sugteeh, qado-booxal nee yabbaxoonuh fooca kee foocah net yemeeten. Takkay immay wadir, akak yemeeten magaalak culma fanah, xiiriyak ken gacisne.

²⁴ Sarrakaay magaalat maroh tan gidaaraak gaysê-xaylo net heeniih, qaskar abbobtik tu nek qiden. Uriyyay ku qaskariitah yenehiyya qiden marat qiden» iyye.

²⁵ Toh yoobbe waqdi, Dawud kaak iyyeemih, «Yowabak ‹Aytikum› inxicaay, ‹Tekkeemit masakkitin. Qeebi yakke waqdi qeebit rabu waa num, num mayaaxiga. Away qeebit quuruk culaay, magaala ibbixa› 'yaanam kaak inxic» iyye.

²⁶ Batsabaq tet baqli rabem toobbe waqdi, arka tet tibbixe.

²⁷ Rookak gaba kalte waqdi, Dawud, «Yi qari am» 'yaanamih farmo teetih ruube. Sarrak digibih tet abiteeh, lab-baxa kaah xalte. Takkay immay YALLI Dawud abem yinqibeh.