2 Samuwel 10 - NABUWWA KEE MALIKWA

DAWUD, QAMMON KEE SUURIYAH MARAK YEYSE

¹ Waqla suggu 'yeenik lakal, Qammon rasih malikih yen Nacas rabeeh; kay baxay migaaqah Cannun akak iyyaanahiyya kay aracal malik yekke.

² Dawud too malikih raba yoobbe waqdi, «Usuk meqem yoh abeemih, anu away kaadu kay baxah amqeyyo» iyye. Sarrak kaah le bagi maqaane kaah warisu waa mara Nacas baxah farmo ruube. Too mari Qammon deqsitta baaxo gufe waqdi,

³ Qammon marih abbobti malikik inteemih, «Amoytaw, away Dawud a mara akah ruubem, nummah ku abbah assakaxxiyyah kot celtaa? Ku abbah taqdiyyah ken maruubinnay; sarrak qeebil nek akah yayse innah, ni magaala elle tani'nna gibittaay cubbussa heenih gexaana'gidi» kaak iyyen.

⁴ Cannun too yab yoobbe waqdi, Malik Dawud ruube marak debenik gambi mollaay, sartanay edde sugeenihiyya xiiqarel keenik qanxissa heeh ken xiiriye.

⁵ Too marat toh tekke waqdi, isinni baaxol woo ceelot yaduureenim kaxxa wacarriy keenil tekke. Dawud a xaagu yoobbe waqdi, «Annah buxa fanah maaduurinay, deben siinih ubukka 'yam fanah Yerikô-magaalal suga» 'yaanam keenih ruube.

⁶ Sarrak Qammon mari, Dawud naqabu xaamiteenim isinnik yeexegen. Tohuk gexxaamah, Suuriyah baaxok Beet-Racob kee Xooba deqsitta namma rakaakayak labaatanni alfi qaskariita lakqot bahsiisen. Tonnah kaadu, Toob rasuk taban kee namma alfi qaskariita kee, Maqka deqsitta baaxoh malik kee alfi qaskariita lakqot bahsiisen.

⁷ Dawud tah yoobbeeh, too waqdi qeebi keenit aba'gidih, elli haah yan qaskarak Yowab foocat hayya heeh ruube.

⁸ Qammon-mari qeebih fooreeh, inaytâ-magaalah keenik tan Rabba deqsitta magaalak culmeynat qeebi akak aboonu waan aracal gacen. Suuriya kee Toob kee Maqkah marah tu gactek, magaalak irol yan arac yibbixen.

⁹ Tohuk lakal Yowab, naqboytit-qaskar fooca kee salafak gacca 'teh qeebi keenit abtu waytam yuble waqdi, Israayil qaskarak inkih tayse qaskar doorru heeh, Suuriyah qaskarat fooca kee foocah eyseddi hee.

¹⁰ Raqqa 'te qaskarak Abiisay deqsita kay toobokoyta abbah akak hayya heeh, Qammon-qaskarat foocah raaqa arac ken yiysibixe.

¹¹ Too waqdi Yowab toobokoytak iyyemii, «Suuriyah mari qeebil yok yaysem tublek, catoh yoh amaatetto. Qammon mari kok yaysem ublek, catoh anu koh amaateyyo» iyye.

¹² Kaadu qagseh kaak iyyeemih, «Agiru tikay digga xic. Ninni mara kee ni Dageltih magaalah nagay yan qeebi abnaama. Ellecabol YALLI isih loowem akkele» iyye.

¹³ Yowab kee kay mara qeebih dadahte waqdi, Suuriyah mari kudeh.

¹⁴ Suuriyah mara kudah yublen waqdi, Qammon mari kaadu Abiisayak yoowweeh, magaalah adda culen. Toh yuble waqdi Yowab Qammon marih qeebik raaqeh, Yarusalaam fan yuduure.

¹⁵ Suuriyah mari Israayil-marak gaceenim isinnik yublen waqdi, qaskarak elli haanamah seeco aben.

¹⁶ Malik Hadad-Qeder, Suuriyah maray Furaatak darre le kabul sugehiyyah seeco abe. Too mari Ceelam deqsita arac fan yemeeten. Qaskar abbah keenik tenem, Soobak deqsita numuk ten. Soobak Xooba rasul malikih yan Hadad-Qeder qaskarak abbah yan numuk ten.

¹⁷ Malik Dawud ta xaagu elle gee'kkel, Israayil qaskar gaabossa heeh Ordon weeqaytuk woo qaxa raqta exxal Suuriyah qaskarat fooca kee foocah gacca 'yeenih qeebi elle aban arac ken yibbixsiise. Tohuk lakal qeebi radeeh,

¹⁸ sarra, Suuriyah qaskar wadir-wadirih toowwe. Too waqdi Dawud kee kay mari, Suuriyah qaskarak malcina boolih numuy gaari farasak qeebi abahiyya kee, morootom alfih qaskariitay faaris amok qeebi abahiyya qiden. Soobak deqsita numuy keenik qaskar abbah yenehiyya xaaguqal raaqeeh, sarrak carbi booxal elle rabe.

¹⁹ Malik Hadad-Qeder gubat sugte malikwa Israayil mari carbil keenik yeysem yoobben waqdi, ken lih bica haysiteeniih ken gabah gacen. Tohuk wadir Suuriyah-mari Qammon-mara carbil cataanamak raaqen.