2 Samuwel 1 - NABUWWA KEE MALIKWA

DAWUD, SAAWUL KEE YONAATANAH ABE ROOKA

¹ Saawul rabek sarra, Dawud Qamaalek marak edde yeyse qeebik yuduureeh; Xiklag deqsita aracal namma ayro suge.

² Nammayhaytoh ayrok wadiril furraynuh yan awkii, Saawul macaxi mafdagah luk suge aracak, amol siisa heeh rookak gexxaamah sara isik qanxiseh, yemeete. Dawud fanah yemeeteeh kay assakaxxiyyah qansah baaxo xagam fan baaxok bagul qununna 'ye.

³ Too waqdi Dawud, «Ankek temeeteeh?» kaak iyye. Too awki iyyeemih, «Israayil mari macaxi mafdagah le aracak kudeh emeete» iyye.

⁴ Dawud, «Hay, xaagi macaay?» kaak iyye. Too waqdi awki kaak iyyeemih, «Qaskar carbik kuddeh immay mango mari edde rabe. Saawul kee kay baxa Yonaatan kaadu too qeebit rabte» iyye.

⁵ Too xaagu yoobbe waqdi Dawud kaak iyyeemih, «Atu Saawul kee Yonaatan rabtem mannal tuble?» iyye.

⁶ Awki kaal gacseemih, «Gilbowaq qaleh amol suge waqdi, Saawul macaxul qekuh yaniih, naqboytit carbi edde aban gaariira kee faariisah amot gacca 'teh kaa fan amaatuk sugtem uble.

⁷ Tohuk lakal Saawul annah wagga hee waqdi, yoo yubleeh yoh seece. Too waqdi kaa fan emeete. Emeete waqdi,

⁸ ‹Maa mari num kinnito?› yok iyye. Qamaalekih-yooboke-num kinniyom kaah warse.

⁹ Too waqdi yok iyyeemih, ‹Kaxxam mudduumeh rabam faxak, annah yol amay yoo qid› yok iyye.

¹⁰ Too waqdi rabi kaat xayim ubleeh, too waqdiik yinnikisseh rabu waam eexegeeh, kaal amma exceh kaa qideh. Amot luk suge dardaarinni-kalabta amok kaak kaleeh, kaadu carayat luk suge sookoyta kaak kalla heeh, yi amoytaw, ku fanah baahe» iyye.

¹¹ Dawud toh yoobbe waqdi, kaxxam qaadeeh sara isik edde qanxise. Kay mari kaadu toh abe.

¹² Sarrak kaxxa rookah rookiteenih weeqeenih, magrib tikka 'yam fanah, Saawul kee Saawul baxih raba kee Israayil mara kee YALLIH qaskaray qeebit rabtehiyyah rookah soomuh asen.

¹³ Dawud xaagu baahe awkak, «Ankeh num kinnito?» iyye. Woo awkiiy «Yi abba Qamaalekih yooboke numuuy; dabqah elle nanim ku baaxo» iyye.

^14-16 Dawud qagseh kaak iyyeemih, «Hay meqek, atu YALLI doore malik elle qiddu tilliilem manna?» kaak iyye. Sarra Dawud, «Abte umaane kol tuduureh, isih abte umaaneh isih warisseeh, YALLI doore malik, ‹Anu qide› 'yaanam inte» kaak iyye. Too waqdi isi marih numuh secca 'yeh, «A awka qid!» iyye. Woo num kaa yootokeeh awki edde rabe.

^17-18 Sarrak Dawud Saawul kee Yonaatan arkah boogiseeh iyyeemih,

¹⁹ «Israayiley, sin agiira elle tembexem, sin abbobtiiy sin miracwa elle rabtemii, sin baaxok qaleh amoy qeebi elle abeeni. Agiirah ten labha rabteeh carbi beete.

²⁰ Ken raba Filistiin-baaxol mawarsina. Rabat keenik Gat magaalal mayaabinaay Askeloonul gitak addal mawarsina. Filistiin agbih qangaasal nee maabina. Yalla sinniih diini sinni ken say xaylo, nel africeey nel asuule ken kallaama.

²¹ «Gilbowaq qaleelaw, rob siinil rade waay! Rob kee buqre ken booxaaxal able waynay. A abaaro akah axceemih akah abamaa, agiira le goobwa wanna maleh raqte. Tohum qax-umaane kinnih waaga mali. Saawuluk gob saliid duugo geyah mayan.

²² Yonaatan luk yen macaxi numut radek, wadak manannaay; radek, qidak yene'kkal. Cayla-leelah yen kay naqboytit qidak yen. Saawul-seef selli hee week wadak mananna.

²³ «Nanu Saawul kee baxi tiyat yabba innek, addunyal anuk maqaane luk sugeenih; addunyal anuk sahda ken kicinuk ten. Rabal kaadu titta lih waklisak raben. Sissikaaneh tikoh inna luk sugeeniih; maqarah kaadu lubak inna luk yenen.

²⁴ «Israayilih tooboke sayyoy oobbeyay! Inkih boogisay rookita, Saawul rabah. Qasa sara sin sarissem, Saawuluk ten. Bilqah haak sugten bilaali kee dahabat, sin bilqissem, Saawuluk ten; toh ixiga.

²⁵ «Agiirah ten labha rabteeh carbi beeteeh, Yonaatan raysi qaleh amol fidut yen.

²⁶ Toobokoyta Yonaatanaw, yi kacnoytaw, meqe qalla yo'lih luk ten; yoh muquk ten. Atu afqadook yoh abtaah, yoh lito kacni say numuh aban kacanuk aysuk raaqa. Koh rookitak weeqah an, yi Yonaatanaw.

²⁷ «Agiirah ten labha rabteeh carbi beeteeh, ken silaacay luk sugeeni foyya yekke» 'yaanam axcuk keenih boogise. Sarrak Dawud ta arkah abe booge Yuudâ-rasih-marak, «Aliilih barita» iyye. Ta booge tunkuttubeeh, Yaasar deqsita kitaabih addal tan.