2 Malikwa 9 - NABUWWA KEE MALIKWA

YAAHU, MALIK YAKKE'GIDIH YUSKUTEN

¹ Too saaku nabi Eliisaq furraynah tan nabuwwak numuk teenah seeceh iyyemii, «Raamot rasul tan Gilqad deqsitta magaala gexxa'gidih bical gac. A xalay addat akak caxâ xaylok bicsen *zeyti (saliid) yanihiyya gabat bey.

² Wokke gufta waqdi, Yaahu deqsita num gorris. Yaahu, Yacoosafat deqsita numih baxak taniih, Nimsi deqsita numuk kaadu baxi baxak tan. Kaa geyta waqdi, kataysiisik kaa baxissa haay, dibuk yan qari kaa bey.

³ Too waqdi a caxâ xaylok bicsen *zeytit amo kaak uskut. Sarrak, ‹YALLI kok iyyaamah: Israayil-malik takke'gidih koo askute› kaak inxicay, isih xayuk am; tokkel maadayina» iyye.

⁴ Woo furraynuh yan nabi Raamot rasuk Gilqad magaala fan gexeeh;

⁵ wokke gufe waqdi, qaskar-abbobti daffeyna hayteh kaah sugte. Too waqdi, «Qaskar abbaw, farmo koh baahe» iyye. Usuk toh iyye waqdi Yaahu, «Nek iyyah bahte?» iyye. Too waqdi, «Qaskar abbaw, koh baahe» iyye.

⁶ Tohuk lakal nammayak qari adda culeeniih; woo furraynuh yan nabi woo caxâ xaylok bicsan zeyti Yaahu amol caxeeh, kaak iyyeemih, «YALLAY Israayil doore Dageltah yanihiyya, ‹Israayil-maray yim kinnihiyyah malik takke'gidih koo askute› iyyah yan.

⁷ ‹Ku amoytah yan Acabak buxa qidetto. Tonnal, Idebal yi nabuwwa kee yi naqoosa qiddeemih sabbatah, teetil cane gacseyyo.

⁸ Acabak radda 'tem kee kay buxah mari inkih rabam keenil tan. Kaak radda labhak baacoytit takkuu, gaddaloola takku, inkih ken bayseyyo.

⁹ Kay buxah maral, Nabat-baxa-Yarobqamay Israayil-malikih yenehiyya kee, Aciiyâ-baxa-Baqsay kaadu Israayil-malikih yenehiyyah buxah maral bahha heem baaheyyo.

¹⁰ Idebal matamoogoqa. Tet xagar Yidraqel rasul kuutâ-gadda akkele› 'yaanam kok iyye» kaak inxicca 'yek lakal, furraynuh yen nabi arduk gexe.

¹¹ Sarrak Yaahu woo is lih tan qaskar abbobti fan yuduure waqdi, keenik numuk teeni kaak iyyemii, «Nagaynaa? Ama cabuli akah yemeetem macaa?» kaak iyye. Usuk keenik, «Usuk kinni num maay taaxigeeni? Edde yaabe yab maay teexegen?» keenik iyye.

¹² «Aleey, maaxaginninok, neh warisey» kaak iyyen. Too waqdi usuk keenik iyyemii, « Usukuuy, ‹YALLI kok iyyaamah: Israayil-malik takke'gidih koo askute› 'yaanam yok iyye» keenik iyye.

¹³ Oson too waqdiik, usuk elle yawqe mawqeenah bagul, sinni sara qidda heenih *baanta yoogoren. Sarrak anay fayya haak, «Yaahu malik yekke! Yaahu malik yekke!» 'yaanam iyyen.

YOORAM QIDEENIH

^14-15 Tohuk lakal, Yaahu, Malik-Yooramay Yidraqel magaalal yenehiyyak abu waamal malse. Malik-Yooram, Raamot-rasul Cadayel deqsita Suuriyah-malik lih abe qeebit mudduumeeh; qaffoota'gidih Yidraqel fan gexeh yen. Yaahu is innah tan qaskar abbobtih tan labhak iyyemii, «Yi mara tekkeenik, Raamot magaalak num siinik awqe waay; Yidraqel magaalah marah garci num siinik kale waama» keenik iyye.

¹⁶ Tohuk lakal usuk isi faras-gaarit koreh Yidraqel fan daqaarime. Yooram wokkel woo mudumuk ure'kal yeneeh; Yuudâ-malikih yen Malik-Acadya kay bossah wokke kaa fan gexeh yen.

¹⁷ Yidraqel magaalal sinam akak wagtan fayya le aracal suge dacayrih yan qaskariiti, Yaahu kee kay mara amaatih yuble. Too waqdi, «Sinam amaatih able» iyyeh deero abe. Yooram iyyemii, «Naqboytit kinnoonum kee kacnoytit kinnoonum keenik yubleh yamaatu waa num farasat rub» iyye.

¹⁸ Farasat yan num Yaahu fan yemeeteeh, too waqdi iyyemii, «Malik, ‹Akah, temeetem nagaynaa?› kok iyyah yan» kaak iyye. Yaahu kaal gacsemii, «Wohut waytam mantuk, darret yok gac» kaak iyye. Sarrak woo fayya le aracal dacayrih suge qaskariiti iyyemii, «Farasat gaceh gexe num akah gexe mara fan gufeh immay aduurih kaa mabla» iyye.

¹⁹ Too waqdi aki qaskariita ruubeeniih; too num kaadu, «Malik, ‹Akah, temeetem nagaynaa?› kok iyyah yan» kaak iyye. Yaahu woo numuk kaadu, «Wohut waytam mantuk, darret yok gac» iyye.

²⁰ Dacayrih yan num kaadu qagteh, «Farmoh rubten num sinam fan gufeh immay aduurih kaa ableh maanaay; yamaate marak foocat yan num faras, cabuli innal, yayraddeh yaniih; hununuh Nimsi-baxak-baxi-Yaahu elle ayradduk yene innal yayraddeh yan» iyye.

²¹ Too waqdi malik Yooram, «Faras-gaari yoh baaha» iyye. Gaari kaah baaheenih; too waqdi kaa kee Malik Acadyak mariiy isi gaarit keenik koreh, Yaahut matraana'gidih gexen. Sarrak Nabot buqreh baaxo gufen waqdi, kaat garayen.

²² Too waqdi Yooram, «Akah temeetem nagaynaa?» kaak iyye. «Ku ina Idebal qimbisse xeet kee coox yaqbudeenim kee sicri abaanam tanim fan, maa nagayna tan?» kaak iyye.

²³ Yooram toh yoobbe waqdi, «Acadyaw, ah gano! Ah ganok tanih tan!» iyyeh, gaari wadir eykeleelebba heeh kude.

²⁴ Too waqdi Yaahu qandek leemiik gaysê-baxa darre le kabuk buucusut kaak hee. Woo gaysê-baxi afqadot kaak rade. Too waqdi Yooram isi gaarik bagul yinnikisseh edde rabe.

²⁵ Yaahu, catottah kaa'lih yen Bidkar deqsita numuk iyyemii, «Ginaada kaak beyay Nabot buqreh baaxot qid» iyye. Sarrak kaadu woo numuk, «Koo kee yoo Malik-Yooram-abba-Acab lakat farasat gexak sugne saaku, YALLI,

²⁶ ‹Kimal Nabot kee kay xayloh raba ubleh immay koo kaadu too baaxol digaaleyyo› kaak iyyem hawwentaa?» iyye. «Hay, toh kassittek, Yooram-ginaada beyay, YALLI akah iyyem takke'gidih, Nabot-buqreh-baaxot qid» 'yaanam isi catottah numuy Bidkar deqsitahiyyak iyye.

YUUDÂ-MALIKIH YEN ACADYA QIDE

²⁷ Yuudâ-malikih yen Acadya tekkem yuble waqdi, Beet-Cagan magaala fan isi gaarit kude. Yaahu lakak kaa yeyredde. Too waqdi isi marak iyyemii, «Kaa kaadu macabinay qida» iyye. Sarrak Acadya, Yiblaqam garit yan Guur-magaala fan yawqe gita gaarih amot kudak suge waqdi, Yaahû-mari kaa mudeh. Takkay immay gaarih amot gacca 'yeh Magiddô-magaala aleelite. Tokke gufe waqdi rabe.

²⁸ Kay qaskar-abbobti kay raysa faras-gaarit hayya heeh, wadir Yarusalaam fan gacse. Tokkel Dawud-Magaalah addal malik kee malik buxah mara edde yaaguqen kabri aracat kaa yoogoqen.

²⁹ Acab-baxi-Yooram, Israayil-malik yekkeemih taban kee inki sanat yekkek sarra, Acadya Yuudâ-malik yekke.

³⁰ Yaahu, Yidraqel magaala gufe. Idebal tekkem toobbeh teneeh; too waqdi intil kucul hayya hayteh amo kaadu bicisitta hayteh, malik qarih taagataak gititte fan wagitak sugte.

³¹ Yaahu gasoh afaak yemeete waqdi, «Biili baqalaw, duma Dimri akah qide innah biilu bahtehik, away maca wayta?» kaak inte.

³² Too waqdi Yaahu gubaak wagga hee waqdi, anay fayya heeh, «Yi qaxa yan marak iyyi yan?» iyye. Sidoc yakke maray malik qaril abbootan lehiyya taagatak addah kaa fan wagga heen.

³³ Too waqdi Yaahu, «Addah tet qida» keenik iyye. Osonuuy wokkek addah tet qiden. Qabal teetik qari gidaar kee faariisal caxite. Yaahû-gaari giitak beyta faroosa amot teetik taqqa 'yeh.

³⁴ Yaahu malik-qari culeh, maaqo woo qarih addal xage. Tohuk gaba kale waqdi, «Ama abaaro leh tan barra beyay uguqa. Is faxe sahdayto takke'mmay, malik baxáh sugtek» iyye.

³⁵ Sarrak sahda tet taagaqu gexxe waqdi, moyyâ-lafa kee, gaboobi kee ibitteh lafoofik sarrah tu magennon.

³⁶ Gexeenih Yaahuh toh warsen. Yaahu too waqdi iyyemii, «Tah YALLI akkele iyyem kinniih; Eliyyas Yallih afak aham akkeleemit yaabeh yeneeh; iyyemii, ‹Yidraqel rasih addal Idebal ginaada kuuta akmele.

³⁷ Tet xagarak raqtem kukkurruh dacah innah baxacah kulli ikkel caxitele. Tonna-leemik tet xagar kinnim num yaaxagu maduuda› iyyeh yeneeh; tohim tekkeh» iyye.