2 Malikwa 8 - NABUWWA KEE MALIKWA

SUUNEM BARRA TUDUURE

¹ Dumih ayro Eliisaq, baxah rooci akak gacse barray dabqih Suunem rasul tenehiyyak iyyeh sugeemih, «YALLI a baaxol malcina sanatih gide sugu waa qulul ruubam faxak, atu is kee isi buxah marah gexay dabqih gersi ikkel gac» 'yaanam teetik iyyeh yen.

² Eliisaq teetik elle iyye innal, abteeh; is kee isi buxah mara gexxeh, Filistiin-rasul malcina sanat sugte.

³ Malcina sanatak lakal Israayil-rasu fan tuduure. Sarrak luk sugte qari kee, ikoytah luk sugte baaxo teetih gacsa'gidih, malik fan gexxe.

⁴ Malik, Eliisaq-kaadintuh-yen-Gecdi lih yaabak suge. Malik, «Eliisaq-kaxxa-abitto yoh waris» kaak axcuk sugeeh;

⁵ Gecdi, Eliisaq rabe awkal rooci elle gacse innat yaabak suge waqdi, woo barra malikik, «Qari kee baaxo yoh gacis» axcuk temeete. Gecdi too waqdi, «Yi malikow, woo barra amah teetiiy; tet baxay Eliisaq rooci elle gacsehiyya amah kaana» iyye.

⁶ Malik woo barra wohim essere waqdi, «Nummah tekkem kinnih» kaak inte. Tonna-leemik malik qaskar abbah secca 'yeh, «Is luk sugtem inkih teetih gacisa. Tet buqreh baaxo is akkel suge wayte malcina karmah addat darok uysubukka haytem inkih teetih ucuya» iyye.

ELIISAQ KEE SUURIYAH-MALIK

⁷ Eliisaq Damasko fan gexeeh; wokkel Suuriyah malik Banihadad lakmisak kaah suge. Malikih Eliisaq yemeetem warsen waqdi, kay qaskar abbobtik numuk teenah yen

⁸ Cadayel deqsita numuk iyyemii, «Gexay nabi-Eliisaqah mattaco gabat beyay, ‹Lakimak uru waam kee ure wayu waam YALLA yoh esser› kaak inxic» iyye.

⁹ Too waqdi Cadayel morootom rakub Damaskoh magaalal enna 'ta meqe duyyek eerra heeh Eliisaq fan gexe. Kaa fan yemeete waqdi iyyemii, «Ku baxi Banihadad, lakimak ure lem kee ure waam koo essera'gidih yoo ruube» iyye.

¹⁰ Eliisaq kaak iyyemii, «Kaal uduuray, ‹Uretto kok iyye› kaak inxic. Takkay immay YALLI kay raba yoo yuybullee» iyye.

¹¹ Sarrak Eliisaq, kaa wacarroysam fanah intit foocak adda kaak wagitak suggu 'yek lakal, weeqah hayya hee.

¹² Cadayel too waqdi, «Yi abbaw, macah weqta?» kaak iyye. Eliisaq kaak iyyemii, «Israayil maral bahtu wayta umaane aaxigeemih sabbatah weeqah an» iyye. Qagteh kaadu kaak iyyemii, «Gaso maroh edde tan magaaloolit keenik gira ruubetto. Furrayna keenik seefit qidetto; qunxa urri-xaylo tafqetto; soolimak xaylo baguk ayyaaqetto» kaak iyye.

¹³ Too waqdi Cadayel iyyemii, «Anu tu'num hinniyok, a gideh takke qande mankek baaheyyo?» iyye. Eliisaq too waqdi kaak iyyemii, «YALLI atu Suuriyah-malik akkettom yoo yuybulle» iyye.

¹⁴ Sarrak Cadayel, Banihadad fan yuduure. Banihadad too waqdi, «Eliisaq maca iyye?» iyye. Cadayel, «Urele yok iyye» iyye.

¹⁵ Takkay immay nammayhaytoh ayro Cadayel guula bahha heeh leet arqussa heek lakal, malik quxuuseh edde qide. Sarrak Cadayel Banihadad arac ciggiileeh malik yekke.

YACOORAM YUUDAL DARDAARE

¹⁶ Acab-baxi-Yooram Israayil-malik yekkeemih konoyhaytô-sanat yekke saaku, Yacoosafat-baxi-Yacooram Yuudâ-malik yekke.

¹⁷ Yacooram too saaku qumrik soddom kee namma karmat yen. Yarusalaam magaalal bacra karma malikih suge.

¹⁸ Kay barra Acab baxák ten. Usuk Acab buxah marak kaxxih, Israayil malikwa kataatak sugte uma gita kataatak suge. YALLAL dambi lem baahak suge.

¹⁹ Tohuh, YALLI Yuuda bayisam mafaxinna. Toh akah tekkemii, YALLI kay naqasuh yen Dawuduk, «Ku reeda baxak-baxal raaqele ikkal, bayya m'inta» 'yaanam axcuk, tohul xagna kaah culeh yen.

²⁰ Yahooram malikih yen saaku, Edom mari gaadileh kaat ugteeh, sarrak isinni amô-baxxaaqqa kaak geenih, isinni malikih gubat xinta doolat yekken.

²¹ Tonna-leemik Yacooram faras-gaariiray qeebi abtahiyya haysitta heeh Xaqir fan gexe. Tokkel Edom mari, maro keenit heen. Bari yekke waqdi Yahooram kee kay qaskarih abbobtiy faras-gaariirat qeebi abtahiyya keenik yewqeenih yisillimeenih; kay qaskar fixixxeh isi buxaaxi fan kudde.

²² Too ayrook lakal, Edom-mari Yuudâ-marak amô-baxxaaqqa geeh raaqe. Tonnah kaadu, too dabaanal Libnâ-magaalah mari gaadileh yewqe.

²³ Ahak raqteemiy Yacooram abehiyya inkih Yuudâ-Malikwah-Aydaada deqsita kitaabih addal tan.

²⁴ Yacooram, Dawud-Magaalak malikwa kee ken mara elle yaaguqen kabri aracal yoogoqen. Kay baxay migaaqah Acadya akak axcuk yeneenihiyya kay aracal malik yekke.

ACADYA YUUDAL DARDAARE

²⁵ Acab-baxi-Yooram Israayil-malik yekkeemih taban kee namma sanat yekke saaku, Yacooram-baxi-Acadya Yuudâ-malik yekke.

²⁶ Usuk malik edde yekkem, karmak labaatanna kee nammayat yan saaku. Yarusalaam magaalal inki sanatih gide malikih suge. Kay ina migaaqah Qatalya deqsitta barrak ten. Isiiy Malik-Acabak baxák teneeh; Malik-Qomri kaadu baxi baxák ten. Malik-Qomri Israayil malikik ten.

²⁷ Acadya kee Malik-Acab xalak ballisih yeneemiih; tonna-leemik Acab buxah mari akah abak suge innah, Malik-Acadya kaadu uma gita kataatak sugeh, YALLAL dambi lem baahe.

²⁸ Malik-Acadya, Suuriyah malik kee Israayil malikiy Yooram deqsitahiyya qeebi abte saaku, Israayil malikih qaxat gacca 'yeh Suuriyah malikit qeebi abe. Too qaskar Gilqad rasuk Raamot magaalal gaba kee gabah toome. Too qeebit Yooram mudduume.

²⁹ Sarrakaa, mudumuk uram fanah, Yidraqel magaala fanah yuduure. Acadya kaat boysita'gidih tokke gexe.