2 Malikwa 7 - NABUWWA KEE MALIKWA

¹ Eliisaq kaak iyyemii, «YALLI iyyam oobbey. Beera ta waqla kamadik sidooca-kiilo Samaariyah-magaalat maroh tan gasok culmal, lakqok inki-garsit xaametton. Gabru deqsitta darok kaadu lica-kiilo lakqok inki-garsit xaametton» iyye.

² Malik dacayrit yan num Eliisaqak iyyemii, «YALLI qaran afoofi fakka haamah, aham takkem hinna» iyye. Eliisaq kaal gacsemii, «Amaham akkih abletto'mmay woo maaqok tu matakma» iyye.

SUURIYAH QASKAR KUDDE

³ Affara numuy arab takme kaxxam uma dalkah biyaakittahiyya Samaariyah-magaalah gasoh afal ten. Oson tittak iyyeenimii, «Rabnam fan akkel abnam macaa?

⁴ Magaala cullam neh xiqtam mali, qululuh rabnaamak sa; akkel elle needek kaadu qululuh rabenno. Tohuk Suuriyah-mara fan gennay. Nanay nee iyyeenik, sugennooh; rabak sah nel baahoonu waanam malon» iyyen.

⁵ Sarrak bari yekke waqdi, Suuriyah-marih arac gexen. Wokke gufen waqdi, num keenih elle masuginna.

⁶ Yalli, Suuriyah-marat mango qaskaray gaariira kee faariisa lehiyya amaatih yaabbeenim keenit celsiise. Too waqdi Suuriyah-mari tittak iyyemii, «Israayil-mari, Ciita kee Masri malikwa kee ken qaskar amma 'yeenih qeebi net abaana'gidih, maalut xaamen» iyyen.

⁷ Tonna-leemik too bar, siraqwa kee faariisa kee danoona woo elle sugen aracal elle cabba heenih, tu gabat bee'kal, isinni roocih megloh kuden.

⁸ Taaxige affara num woo aracah xayyoowen waqdi, siraq adda culen. Wokkel geenim yokmeeniih, yooqoben. Sarrak lakqo kee dahabaay, sarak geenim beenih yooqoren. Wadirih kaadu yuduureeniih, gersi siraqih adda culeeniih tu beenih yooqoren.

⁹ Sarrak tittak iyyeenimii, «Aham abnam nel matan. Away geyne-meqe-xaagu ninnit ayseede waynaama. Maaci maacissa 'yam fan aham warse'kal sugnek, digaala nel amaatele. Tonna-leemik away xayuk genxeh malik-buxah warisnay» iyyen.

¹⁰ Too waqdi wokke cabeenih gexen. Sarrak Samaariyah-magaala yemeeteeniih gasoh afal suge qaskariitah seecen. Iyyeenimii, «Nanu Suuriyah-marih arac genxeeh wokkel num maballinooy, numtin anay kaadu maabbino. Faariisa kee danoona axawat teneeh, siraqwa kaadu Suuriyah mari elle cabba hee innal ten» iyyen.

¹¹ Qaskar woo xaagu warisseeh; xaagi malik-buxal yontoobbeh.

¹² Maaci maacise'kal maaci-bar, malik xiinik ugutta 'yeh qaskar abbobtik iyyemii, «Anu Suuriyah-mari niyat lem aaxigeh. Oson akkel qulul yanim yaaxigeenih. Tonna-leemik oson, ‹Maaqo goranah akke amaateloonuuh; too waqdi elle yanin innaak ken abbixenno› 'yaanamal magaalak irol ambooqoriyyat yanin» iyye.

¹³ Too waqdi kay qaskarih abbak numuk teenah yan num iyyemii, «A magaalal yan-mari rabe-marak kaxxih gaba kaleemih sabbatah, tu elle tani'nna akah naaxige innah, edde gexoonu waan koona farasay away raqtehiyya koona numuh neceeh rubnay» iyye.

¹⁴ Too gexoh sahdak tu takkem dooreeniih; too waqdi malik namma faras-gaarit ken hayya heeh, «Tekkem wagita» axcuk, Suuriyah-qaskarak lakat ken ruube.

¹⁵ Too waqdi too mari Ordon weeqaytuh amma 'yaanam gexeeniih; elle gexxa 'yeenimil, Suuriyah mari kude waqdi qideh cabe sartan kee duyyeeya yublen. Sarrak yuduureeniih, tohim malikih warsen.

¹⁶ Too waqdi Samaariyah-mari arduk gexxa 'yeh, Suuriyah-mari elle suge arac buuben. Tonnal YALLI akah inxicci 'ye innal, kamadik sidooca-kiilo kee, gabru deqsitta darok lica-kiilo lakqok inki garsih xaamen.

¹⁷ Malik woo magaalah culmal, isi dacayrit tan qaskarih abba dacayrih hee. Too waqdi ummatta magaalah culmah temeete waqdi, duufut kaa beyteh itqat kaa qidde. Tohim naharal elle, malik Eliisaq fan yemeete waqdi, Eliisaq akkele akak iyyemiy tekkehiyya kinni.

¹⁸ Eliisaq too ayro, «Beera ta waqla kamadik sidooca-kiilo kee gabru deqsitta darok lica kiilo takkem Samaariyah-magaalat maroh tan gasok culmal lakqok inki-garsih xaametton» 'yaanam iyye waqdi,

¹⁹ malik dacayrit yan num, «YALLI qaran afoofi fakka haamah, aham takkem hinna» 'yaanam iyyeh yen. Eliisaq too waqdi, «Amaham akkih abletto'mmay woo maaqok tu matakma» 'yaanam kaal gacseh yen.

²⁰ Hununuh tohim Eliisaq elle iyye innal tekke. Usuk rabeh; magaalak culmeynal ummattah itqat rabe.