2 Malikwa 6 - NABUWWA KEE MALIKWA

GODMA LEEH ADDAK TEWQE

¹ Ayrok teena butta takke nabuwway Eliisaq saqalah akak yanihiyya Eliisaqak intemii, «Elle nan arac kaxxam nek qunxa.

² Ordon weeqaytih garil nek kulli num arac edde bicisna caxa yargiqay, wokkel dabqih elle gacna arac xisnay nee inxic» kaak iyyen. Eliisaq «Meqeh hay» keenik iyye.

³ Keenik numuk teeni, «Atu ne'lih gexxam tayse» iyye. Usuk kaadu meqeh iyyeh ken lih gexe.

⁴ Oson too waqdi titta lih gexen. Ordon weeqaytu gufen waqdi coox garuq qimbisen.

⁵ Keenik numuk teenak caxa edde argaquk suge godmay birtak bicseenihiyya daabak tewqeh leeh addat radde. Too waqdi woo num, «Eliisaqow, yi kabiirow, taway macaa abu? Sinaamak bee godma leeh addat yok raddek» iyye.

⁶ Eliisaq, «Ankeey, edde raddem?» kaak iyye. Woo num edde radde ikke kaa yuybulle waqdi, Eliisaq caxxi-baxa irgiqqa heeh wokket qide. Too waqdi too godmay birtak bicseeni leeh addak tewqeh.

⁷ Eliisaq too waqdi, «Eyyeq away» kaak iyye. Woo num qununna 'yeh godma yeyyeeqeh.

ELIISAQ KEE SUURIYAH-QASKAR

⁸ Suuriyah-malik Israayilit carbi abak yen. Usuk isi qaskar abbobtil fayu essereeh, qeebi akak aboonu waan arac bicsiten.

⁹ Takkay immay Eliisaq Israayil-malikih farmo ruubeeh iyyeemih, «Ama aracal maxayyoowin; Suuriyah-mari qeebih bical gacca 'yeh sin raarisiyyat yaniinik» kaak iyye.

¹⁰ Too waqdi Israayil-malik wokkel yan marak, «Cubbi abitaay ama arac dacrisa» keenik iyye. Aham mango adda aben.

¹¹ Suuriyah-malik tah yoobbe waqdi, kaxxam yinqibeeh qaskar-abbobtih inkih secca 'yeh annah iyye, «Siinik Israayil-malikih-qaxat tanim miyyaay?» iyye.

¹² Keenik numuk teeni, «Yi malikow, woo numih qaxa num nek mayana'mmay, nabi Eliisaq atu isi buxah addal kinni way sirrih yabta yab Israayil-malikih warsa» iyye.

¹³ Too waqdi malik iyyemii, «Usuk elle yani ikke gorrisa; kaa yibbixeh baahu waa mara ruubeyyok» iyye. Eliisaq Dootan-magaalal yanim kaah warsen waqdi,

¹⁴ mango qaskar kee gaariira kee faariisa ruube. Too mari Eliisaq elle yan magaala barat gufeenih maro heen.

¹⁵ Maaci maacise waqdi, Eliisaq-kaadinti xiinik ugutta 'yeh afah yewqe waqdi, Suuriyah-qaskaray gaariira kee faaris lehiyyay magaala marot tabbixehiyya yuble. Too waqdi yuduureeh iyyemii, «Yi abbaw, gaba nel raddek, maca abnu?» iyye.

¹⁶ Eliisaq, «Mameysitin. Oson loonumuk nanu linom mangok» kaak iyye.

¹⁷ Too waqdi YALLA kallaceeh, «YALLAW, aham yable'gidih kay inti fak» iyye. Too waqdi YALLI kay kallaci oggoleeh; Eliisaq-kaadinti dagaak wagga hee waqdi, koomâ-deraafil faaris kee gaariiray girak bicseeniy Eliisaq marot tabbixehiyya yuble.

¹⁸ Suuriyah-mari qeebi kaat abe waqdi, Eliisaq dooqa abe. Iyyemii, «YALLAW, a marak inti alif» iyye. YALLI kay dooqa oggoleeh inti keenik alfeh.

¹⁹ Tohuk lakal Eliisaq ken fan yemeeteeh, keenik iyyemii, «Isin away temeeteenim aki gita'kkal, faxak temeeten gita hinna. Yoo kataya, isin faxxan num fan anu sin beeyyok» keenik iyye. Too waqdi Samaariyah-magaala fan foocat gacca 'yeh ken bee.

²⁰ Woo magaala culen waqdi, Eliisaq kaadu dooqa abeeh, «YALLAW, baaxo yableeni'gidih inti keenik fak» iyye. YALLI kay dooqa oggoleeh inti keenik fakeeh, too waqdi Samaariyah-magaala culeenim isinnik yublen.

²¹ Israayil malik a Suuriyah-mara yuble waqdi, «Yi abbaw, ken qidoo? Ken qidoo?» iyye.

²² Eliisaq, «Aleey, ken maqidin; qeebit yibbixen mara maqidaanak. A marah yakmeenim kee yaaqubeenim ucuyaay, isinni malik fan yadaaroonay ken inxic» iyye.

²³ Too waqdi Israayil malik kaxxa qibnaytiino keenih abe. Maaqok ken yoskomeeh maqab ken yefqek lakal, Suuriyah-malik fan ken ruube. Too ayrook wadirih, Suuriyah-mari Israayil-rasu buubaanamak raaqeenih.

SUURIYAH-MARI, SAMAARIYAH-MAGAALAT MARO HEEN

²⁴ Waqlaak wadiril Suuriyah-malik Banihadad inkih tan qaskar Israayilit qeebi abta'gidih, gaabossa heeh Samaariyah-magaalat maro heen.

²⁵ Too magaalat maro heenimih sabbatah, magaalal kaxxa darô-wayti raddeeh; inki dananak-moyyâ limo lakqok bacra-tabanih garsi tekke. Camaamah-daca namma gabah gide takkem limo lakqok koona garsi tekke.

²⁶ Malik woo magaalat maroh tan gasoh garil ibah gexa waqdi, barra deero abteeh, «Yi malikow, yoo cat. Yoo cat, yi malikow» inte.

²⁷ Too waqdi malik teetik iyyemii, «Maca kot tekkeeh? Cato YALLI koh abe week, anu maa cato koh abu? Daro mabbixaay qinab kaadu mayyuk» teetik iyye.

²⁸ Is kaak intemii, «Ayrok teena akkel tan barra, ‹A saaku ku baxa nakmay 'xicaay, aki saaku yi baxa akmenno› 'yaanam inte waqdi, tohul titta geyneh.

²⁹ Naharsi saaku yi baxa alasneh nokmeeh. Aki saaku, ‹Ku baxa nakmay› exce waqdi, kaa tooqoreh» inte.

³⁰ Malik ah yoobbe waqdi, niya kaak tiddigilleh sara isik qanxiseh. Magaalat maroh tan gasoh garil yan mari malik xagaral le sartanak guba *qabudda haah kaa yublen.

³¹ Too waqdi iyyemii, «Ayro kortaamak afal Eliisaqak moyya kale week, Yalli yoo bayisay» iyye.

³² Sarrak Eliisaq baahu waa mara ruuba. Toh tekke waqdi Eliisaq, kaal temeete idoola lih isi buxal daffeyak yen. Malik ruube mari gufe'kal yan waqdi, Eliisaq woo idoolak, «Woo biileeni yoo qidu waa num ruubeh yan. Usuk akke yamaate waqdi, qari-afa alifay cule kaa kala. Malik kaadu kaak darret yan» iyye.

³³ Usuk a yaabak gaba kale waqdi, malik yemeeteeh iyyemii, «A umaane nel bahtem YALLA kinni way, tuk teena neh abele exceh macah kaa qambaala?» iyye.