2 Malikwa 5 - NABUWWA KEE MALIKWA

ELIISAQ, NIQMAAN AKAH URUSE'NNA

¹ Suuriyah-malik, Niqmaan deqsita Suuriyah-qaskarih-abba kaxxam assakaxxayuk yeneeh kaxxa arac kaah abak yen. Woh akah tekkem, YALLI, Niqmaan gabat Suuriyah qaskarah iisa yeceeh yen. Usuk kaxxa qaskariitak ten. Takkay immay arab takme kaxxam uma dalka luk yen.

² Israayil lih aben carbit qunxa-Israayil-baxuwwa seewah orbiseenih yenen. Woo awká Niqmaan-barrah taamat gacte.

³ A baxuwwa ayrok teena Niqmaan-barrak, «Yi qammi Samaariyal yan nabi fan gexinnay, woo nabi a biyaakak kaa urusak yen» inte.

⁴ Niqmaan ah yoobbe waqdi, malik fan gexeeh, woo baxuwwa intem malikih warse.

⁵ Too waqdi malik iyyemii, «Gexay; Israayil-malikih warkat ruubeyyooh kaal ucuy» iyye. Niqmaan lakqok soddom alfih garsi takkem kee dahabak laca alfih cabbataay, kalah kaadu sartanak tabna cabbat gabat hayya heeh wokke gexe.

⁶ Malik kaal ruube warkatal kutbeh tenemii, «A warkat gabat baahu waa num Niqmaan deqsitaah, usuk yi qaskarih abbah yan. Usuk le dalkak kaa urus» 'yaanam elle tan.

⁷ Israayil-malik a warkat yikriye waqdi, sara isik qanxiseh, «Suuriyah-malik a num uruseyyom mannah yakkale? Qidaah wada Yalla yoo maay yakkale? Usuk umaane yok faxam qellu leemik tanih matan» iyye.

⁸ Nabi Eliisaq ah yoobbe waqdi, malikih farmo ruubeeh iyyemii, «Isi sara maca qanxisseeh? Ama num yol rub. Israayilil nabi yanim kaa aybulleeyyok» iyye.

⁹ Niqmaan, luk yemeete faaris kee gaariira luk, Eliisaq fan gexeeh kay buxah afah amma 'ye waqdi sooleh.

¹⁰ Eliisaq, kaadintu kaa fan ruubeeh; woo num kaak iyyemii, «Ordon-weeqaytut malcina adda kaqal. Toh abtek, dalkak tu ko'lih maraqtay taahirroowetto, kok iyyah yan» kaak iyye.

¹¹ Takkay immay Niqmaan too waqdi kaxxa naqabu xagarat luk gexe. Too waqdi iyyemii, «Anu akim abe waamah, yol eweqqa 'yeh YALLAY kay Dagelta kinnihiyya kallacca yoh heeh, dale amol gabah fayya heeh yoo qaffoysam ekkeleh suge.

¹² Weeqayti tiyah tu gactek, Israayil tan weeqaytittek Damaskol yok raaqe Abaana kee Farfar weeqayti maay gaca? Woo namma weeqaytut kaqaleh urak en» iyyeeh, naqabut gexe.

¹³ Too waqdi kay gubal yan mari kaal gexeh kaak iyyemii, «Yi abbaw, nabi gibdim ab kok iyyek, woh abe raarreh tanik. Away hay, nabi kok akah iyye innah urta'gidih, gexxeh macah kaqale waytaa?» kaak iyyen.

¹⁴ Sarrak Niqmaan Ordon-weeqaytu fan gexeeh, Eliisaq ab kaak akah iyye innah, malcina adda kummatta edde iyye waqdi, xagar inkih kaak qaffoote. Xagar kaak qaafiyat kee maqarah furrayni baxi innah kaak gacca 'ye.

¹⁵ Too waqdi isi mara is lih hayya heeh Eliisaq fan gexeeh kaak iyyemii, «Tawayaay Israayil ummat taqbude Yallak sah Yalli mayanam eexegeh. Tonna'mmay Yallih numow, a mattaco yok oggol» iyye.

¹⁶ Eliisaq iyyemii, «Mattaco kok oggole waamah, anu inni afqadook akah taamita YALLAY waarahiyyah migaaqal xiibita» iyye. Niqmaan, «Mattaco yok oggoltaama» iyyeh fiirik geerah kaat qagseh immay, Eliisaq woo mattaco kaak cineh.

¹⁷ Too waqdi Niqmaan Eliisaqak iyyemii, «Hay, mattaco yok cintek, buxah gabat luk gexa'gidih, namma bakili eerra heeh ballaaqek beyay yoo inxic» iyye. «Woh akah axcem, anu tahak wadir YALLAK kalihimih sadgat maabaay qerto maqeerisa.

¹⁸ Takkay immay yi amoytah yan Suuriyah malik, yalla akak iyyaanamay Rimmon deqsitahiyya yaqbude'gidih gexa waqdi, kaa'lih gexak qununnu axceemih YALLI qafu yoh abay. Tonnal Rimmonuh qununna axce waqdi, YALLI qafu yoh abay» iyye.

¹⁹ Eliisaq too waqdi, «Salaamata wagri ko'lih gexay» kaak iyye. Sarrak Niqmaan gexeh. Niqmaan dagoh gide gexxa 'ye waqdi,

GECDI ABEEMI

²⁰ Eliisaqak kaadintuh yen Gecdi isi niyal yuscubemii, «Yi abba Suuriyah num kaah yeceem oggolam kaal ten. Tu kaak bee'kal kaa ruubeh yani'mmay, waara YALLIH migaaqal xiibita'mmay, gexxa exceh tuk teena kaak beeyyo» iyye.

²¹ Sarrak Niqmaan lakat gexe. Niqmaan, yarde num lakak kaa katayam yuble waqdi, amot akak suge gaarik obba 'yeh kaah garaye. Sarrakaay, «Macaay, tekkem tani'nnaa?» iyye.

²² Gecdi, «Tekkem matan immay, yi abba yoo ruubeeh, ‹Away Efrayim rasuk woo qaleelah tan baaxol tan nabuwwak namma nabi temeeteeh; tonna-leemik lakqok sidiica alfih garsi kee, xagar meqe sartanak namma saro yoh rub› kok iyyeh yan» iyye.

²³ Niqmaan too waqdi, «Kee, ku maganak lakqok lica alfih garsi yok bey. Too gide bee waytek, matakka» iyye. Sarrak woo lakqo namma kiisit kaah hayya heeh, kalah kaadu sartanak tonnah, namma qaynat isi taamah marak nammayal hayya heeh Gecdik naharat ken ruube.

²⁴ Kooma gufen waqdi, Gecdi namma kiis keenik beeh buxah adda culse. Sarrak woo marak, «Ahaysa Niqmaan fan uduura» iyye.

²⁵ Tohuk lakal usuk buxa cule waqdi, Eliisaq, «Ankel sugte?» kaak iyye. Usukuuy, «Yi abbaw, gexe'kke mayyu» iyye.

²⁶ Eliisaq kaak iyyemii, «Woo num gaarik oobeh koh garaye waqdi, wokkel yi roocaaniyya ko'lih manannaa? Aham lakqooy sartan kee, hinnay kaadu, *daytuun coox kee qinab caxah buqreh baaxooy, laa kee illiiy naqoosa edde beyan wakti hinna'nnaa?

²⁷ Taway Niqmaan luk suge dalka kot tabele. Koo kee ku durruyyat tama dalka way macabtan» iyye. Sarrak Gecdi wokkek gexe waqdi, woo dalka kaal obteeh xagar kaak qidih arroqleh innah gace.