2 Malikwa 4 - NABUWWA KEE MALIKWA

ELIISAQ, GUBNA ELLE CATE'NNA

¹ Butta takke nabuwwak numuk teenah yen nabik raqte gubna Eliisaq fan temeeteeh kaak inteemih, «Yallih numow, baqli yok rabeh; yi baqli akah taaxige innah, YALLIH meysi le numuk ten. Duma magoh maalu akak beeh suge num, woo magoh aftok, lab-xayloh nammay yok naqoosannuh beyam faxa» inte.

² Eliisaq, «Maca koh abooh?» teetik iyye. Sarrak kaadu, «Buxal duyyeh litom teellek, yoh warisey» teetik iyye. Isiiy, «Buxal caxâ xaylok bicsen *zeyti (saliid) edde yan gaanuk sah tu mayyu» inte.

³ Too waqdi Eliisaq teetik iyyemii, «Cuggaaneh kok tan buxaaxi gexay, foyyah tan gaanittey sarrak gacissu waytahiyyak faxxah gide bet.

⁴ Sarrak koo kee ku xaylo qari adda culay qari isinnit alifay woo gaanitte zeytik (saliidik) kiba. Kulli gaanu kibinnaan waqdi, inki kabuk hayis» teetik iyye.

⁵ Woo barra isi xaylo lih isi qari culteh qari isit alifte. Sarrak qunxa-gaanuy zeyti edde lehiyyaak zeyti cuggaanek bahte gaanittet qulte. Tet xaylo kaadu zeyti sinni gaanitte tiya tiyah teetil tabisse. Too waqdi is kulli gaanu zeytik kibte.

⁶ Tonnal kulli gaanu kibba hayte waqdi, «Kibe'kal cabnem maay tan?» inte. Too waqdi tet xaylok tiyak teeni, «Ama away kibtem ellecabo gaanu» teetik iyye. Tohuk wadir caxâ xaylok bicsen *zeyti yeede.

⁷ Sarrak nabi-Eliisaq fan tuduureeh; usuk teetik iyyemii, «Ama zeyti beyay eylemmaay mago isik edde igdiy. Woo magok raqtem is kee isi xayloh edde sugtaana'gidih haysitay, sin xiqelek» teetik iyye.

ELIISAQ KEE GADDALEH TAN BARRA

⁸ Ayrok teena Eliisaq Suunem-magaala fan gexe. Wokkel gaddaleh tan barra ten. Woo barra nabi-Eliisaqah qibnaytiinoh maaqo bicisse. Too ayrok lakal Eliisaq woo gita gexinnaan saaku, maaqo tet buxal akamuk yen.

⁹ Too barra baqalak intemii, «Akke kulli way nel yamaate num Yallih numuy taahirik yani kinnim digga haa.

¹⁰ A qarik amol qunxa qari kaah xisnayaay, qarkaytooy miiziiy sirbiya kee faanus kaah elle haynay, nee fan amaatinnaan waqdi elle silaalitelek» inte.

¹¹ Ayrok teena Eliisaq Suunem yemeeteeh isi qarih addal deerih yan waqdi,

¹² kay kaadintuh yen Gecdi deqsita numuk iyyemii, «Gexay woo barrah seecey» iyye. Woo barra temeete waqdi,

¹³ Gecdik, « ‹Nanu faxxa haynaamah neh abte taqabih aftoh maca koh abooh? Malik kee qaskar abbak numuk teenal gexeh meqe qangara ken lih koh maay yaaboo?› teetik inxicey» kaak iyye. Isiiy, «Anu faxxa haam akkel elle inni marih addal geya» kaak inte.

¹⁴ Eliisaq too waqdi Gecdik, «Hay maca teetih abuu?» iyye. Gecdi iyyemii, «Is lab-baxa maliiy, teetik baqli idaltu» iyye.

¹⁵ Too waqdi Eliisaq, «Annah ama teetik inxic» iyye. Is temeeteeh qari afal solte.

¹⁶ Too waqdi, «Yamaate sanat ta waqla lab-baxa gabah akkuqetto» teetik iyye. Isiiy, «Kee macaa, yi qammow. Yallih num kinnito way dirab macah yol tecee?» inte.

¹⁷ Takkay immay Eliisaq toh edde inxicca 'ye nammayhaytô-sanatat lab-baxa xalte.

¹⁸ Woo awki yembe saaku, daro edde orbisan waktit, isi abbay daro orbisa mara luk taamitehiyya fan gexe.

¹⁹ Sarrak abbah deero abeeh, «Moyya yok biyaakitta! Moyya yok biyaakitta» iyye. Too waqdi awki-abba kaadintuk, «Awka ukkuqay ina fan kaa bee» iyye.

²⁰ Woo num yukkuqeh ina fan kaa bee. Inaay carri tikka 'yam fan gurumbal kaa sugusse. Awki carri yekke waqdi rabeh.

²¹ Too waqdi ukkuqqa kaa hayteh Eliisaq-qari fan kaa beyteeh; qarkaytô-bagul kaa hayteh qarik afa kaat alifteh gexxe.

²² Sarrak baqalah secteh intemii, «Nabi-Eliisaq fan gexam faxak, taamâ-num kee oklo yoh rub. Duudek xayuk aduureyyo» inte.

²³ Tet baqli, «A saaku akah gexxam macaay? A saaki Sabti-qiidih ayro hinnay, alsi-biloh-qiidih ayro hinnak» iyye. Isiiy, «Aleey woh tu hinna» inte.

²⁴ Sarrak oklol koori hayte. Too waqdi kaadintuk intemii, «Anu ‹Oklo caalih bey› kok axce'kal, caalih mabenay, duddah gide iysissik» inte.

²⁵ Too waqdi woo oklol korteeh Karmel-qaley Eliisaq elle yanihiyya fan gexxe. Eliisaq xeri ikkek amaatih tet yuble waqdi, kay kaadintuy migaaqah Gecdi deqsitak yenek annah iyye, «Wagitey Suunem magaalah barra tamaateh tan.

²⁶ Tet fan gexay nagaynah temeetem keeh tet esserey. Tet baqala kee baxa nagay tanim keeh tet esserey» iyye. Gecdi woh tet essere waqdi kaak, «Inkih nagay tan» kaak inte.

²⁷ Eliisaq fan temeete waqdi, foocal kaak qununna inteh iba kaak tibbixe. Too waqdi Gecdi tet gutqam faxe. Takkay immay Eliisaq iyyemii, «Tanay tet 'xicay, cisabboowiyyat uma'nnah gacteh tanik. YALLI tet giddinaamak yoh warsem mali» iyye.

²⁸ Sarrak is kaak intemii, «Yi qammow, baxa yoh ucuy kok maay exce? Niya yot mahaysin, kok maxacciyoo?» kaak inte.

²⁹ Eliisaq, Gecdi fan ufkunna 'yeh iyyemii, «Isissikay yi caxxa gabat luk gex. Gital edde garayinnaan num lih salaamatta inteh masoolin. Xabba 'xicay buxa fan gexaay, awki amol yi caxxa daffessa hay» iyye.

³⁰ Barra kaak intemii, «YALLAY waarahiyyah migaq kee ku manol xiibitah ani'mmay, koo cabeh magexa» inte. Too waqdi oson nammayak sitta lih gexen.

³¹ Gecdi keenik naharat gexeh sugeeh, woo caxxa awki amol daffessa hee. Takkay immay awkal rooci yendebbeemih astah anay akkii, gersi astooti tumbulleem matan. Too waqdi Gecdi wadir yuduureeh Eliisaqak, «Awki muugutinna» iyye.

^32-33 Eliisaq wokke gufe waqdi, awki elle yan qari fan dibuk gexe. Too waqdi qarkaytok bagul deerih yan awkay rabehiyya yuble. Toh yuble waqdi qari isit aliffa heeh YALLA kallace.

³⁴ Sarrak isi af kee inti kee gaba, awki af kee inti kee gabah bagul hayya heeh; awkak bagul gace waqdi, awkak xagar niqna baahe.

³⁵ Too waqdi Eliisaq ugutta 'yeh qari addal wonnak annah gexam gexxa 'ye. Sarrak kaadu qagteh tonnah awkak bagul gace. Too waqdi awki malcina adda sanite. Sarrak inti fake.

³⁶ Eliisaq Gecdih secca 'yeh, «Awki inak, ‹Am› inxic» iyye. Awki ina woo qari culte waqdi, «Ku baxi ah kaana» teetik iyye.

³⁷ Too waqdi is Eliisaqak ibal qansah baaxo xagtam fanah radde. Sarrak isi baxa luk gexxe.

SUMMI LE MAAQO MEQE MAAQO ABE.

³⁸ Eliisaq Gilgal-magaala fan yuduure saaku, too baaxol qulul radeh yen. Ayrok teena Eliisaq butta takke nabuwwa barisak suge waqdi, isi taamah numuk iyyemii, «Kaxxa disti giral xikay maaqo neh bicis» iyye.

³⁹ Keenik numuk teeni maaqo tamu taymaaqe qayso baaha'gidih, garbo fan gexe. Tokkel inki caxah xaylok sarok exxa kibba heeh baahe. Sarrak kinnim aaxige'kal, kitiffa heeh maaqoh addat hee.

⁴⁰ Woo maaqo yakmeeni'gidih woo marah distik yeyyeeqeenih tamen waqdi, Eliisaqak iyyeenimii, «A maaqo summi tekkeh tan!» iyyeenih, yakmoonu yeffereenih.

⁴¹ Eliisaq, «Bulul yol baaha» iyye. Woo bulul kaal yeceen waqdi, woo disti addal tan maaqot yesgelle. Tohuk lakal, «Maaqo keenih ucuya» iyye. Woo maaqo keenih yeceen waqdi, summi cabteh sugte.

ELIISAQ BOOL NUMUH MAAQO KEEFE

⁴² Ayrok teena num Baqal-Saliisa deqsitta baaxok, woo sanatal naharat orbe gabru deqsitta darok bicsen labaatanni gaqamboyta kaah baahe. Toh lih kaadu woo waqdi yirgiqen daro kaah baahe. Too waqdi Eliisaq isi kaadintuk, «A maaqot woo butta takke nabuwwa adoobis» iyye.

⁴³ Woo num kaak iyyemii, «Aham bool num adoobiselem kot celtaa?» iyye. Eliisaq kaal gacsemii, «YALLI, ‹Oson akmeloonuuh geera cabelon› 'yaanam iyyak, maaqo keenil ucuy, yakmeeni'gidih» iyye.

⁴⁴ Too waqdi kay kaadinti woo maaqo foocal keenik heeh; YALLI akah iyye innah, woo maaqo yokmeeniih geeri elle raaqe.