2 Malikwa 3 - NABUWWA KEE MALIKWA

ISRAAYIL KEE MOOYAB FANAT YEKKE QEEBI

¹ Yuudâ-baaxoh-Malik-Yacoosafat reedeemih taban kee bacra sanat yekke saaku, Acab-baxi-Yooram Israayil-malik yekke. Samaariyah magaalal taban kee namma sanatah malikih suge.

² Usuk YALLAL dambi lem baaheh immay kay abba kee kay inah gide YALLAL dambi lem mabaahinna. Kay abba, Baqal-elle-yaqbuduh-bicseh-suge-qamiddu wokkek oobiseh.

³ Tohuh, kaak duma malikih suge Nabát-Yarobqam abe uma-taamay Israayil ummat dambit akah asak sugtehiyya abak sugeeh; woo dambi le taamah abitto macabinna.

⁴ Mooyab-rasih malikih yen Malik-Meesaq illi yeyderreh yeneeh; Israayil-malikih-gabbarah illi xaylok kulli sanatal bool alfih gide takkem acayuk yen. Kalah kaadu, bool alfi yakke marwah xagor kaah acayuk yen.

⁵ Takkay immay Malik-Acab rabe saaku, Meesaq Israayil-milkih gacaanam cineh.

⁶ Malik-Yooram sissikuk Samaariyah magaalak yewqeeh, qaskarak eelli haamih gaaboysiyyat gace.

⁷ Sarrak Malik-Yacoosafat fan farmo ruube; kaak iyyemii, «Mooyab-rasih-malik qeebi yot abam faxak, atu qeebil yoo cate mantuu?» kaak iyye. Malik-Yacoosafat kaal gacsemii, «Yeey, yoo kee yi qaskaraay yok faarisih agantah, num nek maraaqaay inkih ko'lih gaadennok,

⁸ qeebi abnuh manni gitaak gacennoo?» iyye. Yooram iyyemii, «Edom baaxol woo bacarih yan gitaak gacenno» iyye.

⁹ Tohuk lakal Israayil-malikiy Yooram deqsita kee, Yuuda kee Edom malikwah nammay gaaduh ugten. Malcina ayro gexak sugga iyyeenik lakal, lee keenik tembexeeh, sahda kee merraytit taaqubeemik tu luk maraaqinna.

¹⁰ Too waqdi Malik-Yooram iyyemii, «YALLI, sidocuy nakkek Mooyab-malikih gabal nee haam faxeh yan; ahaysa abnam neh maraaqinna!» iyye.

¹¹ Malik-Yacoosafataay, «Akkel YALLIH fayu elle esserra nabi mayanaa?» iyye. Malik-Yooram qaskarih abba iyyemii, «Saafat-baxi-Eliisaq yan. Usuk Eliyyasah catoh yen numu» iyye.

¹² Too waqdi Malik-Yacoosafat iyyemii, «Tohuuy nummâ-nabi kinnih» iyye. Sarrak yakken sidocuk Eliisaq fan gexen.

¹³ Eliisaq fan yemeeten waqdi, Israayil-malikik iyyemii, «Anu koo macatak, gexay; ku ina kee ku abba fayu elle esserak ten nabuwwa fan gex» iyye. Too waqdi Yooram kaak iyyemii, «Nakke sidiica malikik Mooyab-malikih gubat nee qiddem YALLA» iyye.

¹⁴ Sarrak Eliisaq kaak iyyemii, «Inni afqadook akah taamita YALLAY waarah Nabaamak Nabahiyyah migaaqal xiibitah ani'mmay, ama ko'lih wakalih yan Yacoosafat assakaxxe waamal, koh tu abak mananniyo» inxicca 'yeh;

¹⁵ sarrak «Gexay saareh yaaguren duyye digira num yoh baaha» iyye. Woo num yemeeteh, saareh yaaguren tiya yoogore waqdi, YALLIH *Roocaaniyya Eliisaqal obte.

¹⁶ Too waqdi keenik iyyemii, «YALLI siinik iyyam aha. A daqaarih addal boodoodak mangom daga.

¹⁷ Rob rade waamahaay caacay amaate waamah, tama daqaral leek amaggele. Too lee sin kee saqaay sin merraytu inkih maqabah dudda heele» iyye.

¹⁸ Eliisaq toh lih kaadu keenik iyyemii, «YALLAL ahamih abto kaxxam hinnaay, kalah kaadu Mooyab marak qeebil sin aysiisele.

¹⁹ Gasoosa maroh le magaalooli kee qax-meqe magaalooli keenik abbixetton. Oson elli haan xaylo xala coox argiqettoonuuh; buyyitteh afoofi keenik alfetton. Eelli haan baqureh-baaxoy kullim elle taabukehiyya xeetik kibetton» iyye.

²⁰ Woo ayrok nammayhaytoh ayro, kulli saaku sadgat elle aban waktil, Edom baaxoh kabuk darah gexxa lee temeeteeh baaxok bagu kibba hayte.

²¹ Mooyab rasih mari, woo sidooca malik keenit qeebi aba'gidih yemeeten 'yaanam yoobbe waqdi, silac quuka dudda haa marak idaltuuy furraynuh inkih seeco abeenih, sarrak ken kee woo marih fanal yan cuduudul yinfiddigen.

²² Woo ayrok gersi ayro maaca xiinik ugten waqdi, ayroh ifi leê-bagul bixiixiqitak suge. Woo ifi woo lee qisih qabala celsiiseh yen.

²³ Toh yublen waqdi «Qabalak tanih tan» iyyen. «Taaxige sidiica malik isik isih toomeh titta qiddeh tanik, arac keenik genxeh dabqi keenik buubnay» iyyen.

²⁴ Takkay immay ken arac gufen waqdi, Israayil mari qeebi keenit abeeh, wadirih ken gacseh, lakak ken ayradduk sahda keenik qideeniih,

²⁵ magaalooli keenik bayseenih. Ken buqreh baaxoy kullim elle aysubukuk sugeenihiyyak elle tatraanamal, Israayil marak kulli numuuy wokket xaa qidak woo arooca xeetik kiben. Buyyittek afoofi keenik alfeenih, xaylo xala coox keenik yirgiqeenih. Kiir-Ceras deqsitta inaytâ-magaalak kalih gasoosa-le-magaalooli inkih bayseenih; wanxef-le-qaskar woo inaytâ-magaala marot hayya heenih qeebi edde aben.

²⁶ Sarrak Mooyab-malik qeebil gacu waam yuble waqdi, malcina boolih numuy gabat seef lehiyya is lih hayya heeh naqboytiitik gude gacca 'yeh Edom-malik fan kudam faxe. Takkay immay woh kaah mabicinna.

²⁷ Too waqdi naharsi-baxah kaak yan lab-baxay kay arac nagre raarehiyya, magaalat maroh tan gasok bagul, Mooyab yalla deqsittaamay elle yaaminehiyyah sadgatah qide. Israayil mari ah yuble waqdi, naqabut isinni baaxo fanah yuduuren.