2 Malikwa 25 - NABUWWA KEE MALIKWA

YARUSALAAM TINTIXIBBIXE

¹ Toh yuble waqdi, Baabelon-malik qaskarak tu cabe'kal beyya heeh, Xidkiya malik edde yekke sagalhaytô-sanatak tabanhaytoh alsak tabanhaytoh ayrot, Yarusalaam wararen. Magaalak irol megdebih edde gacan arac haysitta heeniih, sarrak magaalal yan mari akah awqe waa innah, dariifat maro teetik xisen.

² Xidkiya edde reede taban kee inikhaytô-sanat guffa haam fan marot tet sugsen.

³ Tohih sabbatah magaalal kaxxa qulul radeeh; ellecabol too sanatak fereyhaytoh alsak sagalhaytoh ayro ummatak maaqo tembexeeh, magaalal xagaanam waytinteh.

⁴ Too waqdi magaalat maroh yan gidaar boohayseenih. Baabelon-mari magaala marot abbaxuk yene'mmay, tohuh, Yuudâ-malik kee qaskar inkih barat edde kudde. Kuden waqdi gitah malik buxah bustaan elle yen aracak namma gidaarak fan-fan gacca 'yeenih Ordon weeqaytu fan gexen.

⁵ Takkay immay Baabelon-qaskar Malik-Xidkiyak lakal gexeeniih, Yerikô-magaalah garil tan booxak bagul kaa yibbixen. Kay qaskar inkih kaa cabteh isih kudde.

⁶ Kaa Malik Nabkadnessar fan beeniih; Nabkadnessar too waqdi Ribla deqsitta magaalal yen. Tokkel Malik Nabkadnessar digaala kaal hee.

⁷ Xaylo kaak foocal elle yusguudek lakal, «Kaak namma inti eyyeeqa» iyyeh; yeyyeeqeenih. Sarrak nacaasak bicsen silsilat kaal hayya heeh, Baabelon fan seewah kaa bee.

YALLIH QARI YIGGIGGILEENIH

⁸ Malik Nabkadnessar Baabeloonul edde reede taban kee sagalhaytô-sanatak konoyhaytoh alsak malcinhaytoh ayrol, Nabudardan deqsitak yen numuy Nabkadnessarat dacayrih tan qaskarak abbah raaqahiyya Yarusalaam magaala yemeete.

⁹ Too waqdi YALLIH Qibaadah-Qari kee malik-qari kee kaxxa-marih-qarwat inkih gira ruube. Meqe xisne le aroocat inkih gira ruube.

¹⁰ Kay gubal tan qaskar, Yarusalaamat maroh ten gidaarwa inkih bututtukku heen.

¹¹ Tohuk gaba kale waqdi, Nabudardanay qaskar abbah yenehiyya magaalah addal raaqeh suge mara kee, gabâ-naggarinna luk yen mara kee, qeebi yekke way Baabelon qaxat gaceh suge Yuudah-mara inkih, Baabelon fan seewah bee.

¹² Takkay immay Yuudâ-rasul kaxxam masaakiinah yan mara qinab-cooxih-taama kee baqurê-taamah cabe.

¹³ Baabelon-mari YALLIH Qibaadah-Qaril addal ten qamidway nacaasak bicseenihiyya kee, wokkel ten gaariiray nacaasak bicseeni bututtukku heen. Tonnah kaadu, nacaasak bicsen kaxxa tanakay Qibaadâ-Qaril yenehiyya yiggiggileenih. Too nacaas inkih Baabelon fan been.

¹⁴ Tonnah kaadu, nacaasak bicissa heen duyyey Qibaadâ-Qarih-taama edde abak sugeenihiyyak gombod elle caxan mingilwaay badiilaali kee faanuswa edde bargusan afti-xaylooy qaydarus elle qeerisan mingilwa kee, wohuk kalah tan duyyey nacaasak bicseenihiyya Yallih-Qibaadah-Qarih addak weerra heeh bee.

¹⁵ Wohuk kalah, qaskar abbah yen num, dahab kee lakqok bicissa heen duyyey sugga 'tek xikcin elle haan kabaabaay qunxa sacnitte kee disti agantah, tu macabinnaay inkih beeh.

¹⁶ Malik-Suleeman YALLIH Qibaadah-Qarih bicseh suge duyyek namma qamiddu kee, gaariira kee, kaxxa tanakay kaxxa qilsa luk yenehiyya loowo sinni nacaasak bicsen.

¹⁷ Been namma qamiddi titta ceelak yen. Kulli tii fayyah taban kee bacra cusul akkuk yeneeh, amot akak heen namma mansaf sidiica cusul fayyah akkuk yen. Kulli qamidduk amot bilqah heenim, nacaasak bicsen tittat-yoxeen-silsilatih-taswiir kee rummaan-taswiir maroh heenih yenen.

YUUDÂ-MARA BAABELON FAN SEEWAH BEEN

¹⁸ Qaskar abbah yen Nabudardan wohuk kalah, Seraaya deqsita kaxxa sek kee, Seraayal kataata nammeyhaytoh-seekiy migaaqah Xafanya deqsitahiyya kee, Yallih Qibaadah-Qarih afal dacayrih tan qaskarih sidoc seewah gabat luk gexe.

¹⁹ Magaalal raaqe marak, qaskar abbay qaskarak foocat yanihiyya kee, malikih fayu acayuk yen koona numuy saqoltih tenehiyya kee, tonnah kaadu, qaskar abbah cato abak yen numuy qaskar migaaqih kutbet yenehiyya kee, wohuk kalah yan marak lactam numuy muxxo lehiyya geeh,

²⁰ Baabelon-malikiy Riblâ-magaalal yenehiyya fan bee.

²¹ Ribla Camat deqsita rasul tan magaalak ten. Tokke ken baahen waqdi, malik ken qidsiiseh. Yuudâ mara seewah elle beenim tonnak ten.

GEDALYA YUUDÂ-RASIH ABBA ABEN

²² Malik-Nabkadnessar, Acikám-Gedalya, Yuudâ-rasul xintoh-abba kaa abeeh, Yuudâ-rasul elle raaqe maray seewah bee weenihiyyak inkih abba kaa abe. Acikám-Gedalya, Safan deqsita numuk baxi-baxak ten.

²³ Yuudâ-qaskarih-abbobti kee qaskar ta xaagu toobbe waqdi, Gedalya fan yemeeten. Gedalya too saaku dabaaqah Mixfa deqsitta magaalal suge. Too saaku Gedalya fan temeetem, Natanyá-Ismaaqil kee Kareyyác-Yohanan kee, Tancumét-Seraayay Natoofâ-magaalah yooboke kee, Yaadanya deqsita numuy Maqkâ-magaalal yoobokehiyyak ten.

²⁴ Gedalya keenik iyyeemih, «Baabelon marak akah meysittaanam manton. Ta qangara yok eemena. Baaxol elle idiyaay, malik siinik aba iyyam aba. Tonnal tu siinil bahtam matan» keenik iyye.

²⁵ Too sanatak malcinhaytoh alsat, Natanyá-Ismaaqiliy Yuudâ-malikik nasab luk yene, tabna num gabat hayya heeh Mixfa yemeeteeh, tokkel Gedalyat qeebi abeeh kaa qideh. Kaa'lih suge Yuuda kee Baabeloonuh yooboke mara edde qide. Natanyá-Ismaaqil, Alisamaq deqsita numuk baxi-baxak ten.

²⁶ Toh yuble mari, qunxa num kee kaxxa numu axce'kal qaskar abbobtih agantah, Baabelon marih meysih Masri fan kuden.

YAHOYAASIN CASBIK YEWQE

²⁷ Awil-Maroodak, Baabelon-malik edde yekke sanatat, Malik-Yahoyaasinih xuwaawak sugeeh, casbiy edde sugehiyyak kaa yeyyeeqe. Taham edde tekkem, seewah kaa edde been soddom kee malcinhaytô-sanatak taban kee nammeyhaytoh alsak labaatanna kee malcinhaytoh ayrok ten.

²⁸ Tohuk lakal meqem kaah abakaay, Baabelon fan seewah been malikwak inkih, tayse kunnabna kaah abak suge.

²⁹ Tonna leemiik, casbi-sartanay edde sugehiyyak katta 'yeh, meqe sarat gacak, rabba 'yam fanah malik adoobita maaqo kaa'lih adoobitaamih idni malikik geeh yen.

³⁰ Tohuk kalah, faxxa haam edde xaamituh, kulli ayro lakqo kaah acayuk sugen. Rabba 'yam fan tonnal suge.