2 Malikwa 24 - NABUWWA KEE MALIKWA

¹ Yahoyaakim malikih suge saaku, Baabelon-malikih suge Nabkadnessar Yuudâ-rasu warare. Tohuk wadir Yahoyaakim Nabkadnessar-milkih gace. Sidooca sanatak lakal, kay milkih gacaanam cineh.

² Too waqdi YALLI, isi nabuwwak dumaak akah iyyeh suge innah, Baabelon kee Suuriya kee Mooyab kee Qammon qaskar Yuudâ-rasu bayissa'gidih kaat ruube.

^3-4 Tah YALLIH fayxih tekkeemiiy; YALLI, Manasse abe dambi kee, axcihiiy, tu baahe wee marat abe qidiyyak gexxaamah, YALLI Yuudâ-mara isi garik xiiriyeh. YALLI, Manasseh too dambi macabinna.

⁵ Tohuk kalah taniimiy Yahoyaakim abba heehiyya inkih Yuudâ-Malikwah-Aydaada deqsita kitaabih addal tan.

⁶ Yahoyaakim rabeeh; kay baxi Yahoyaasin kay aracal malik yekke.

⁷ Baabelon-malik, kaak dumal Masri-milkih gubat ten baaxok, Fuurat-weeqaytuk xabba haanamaay Masri cuduudul yan daqaarih amma 'yaanam takke baaxo yibbixeeh; tohih sabbatah Masri malik kee kay qaskar Masrik gaaduh magexinnon.

YAHOYAASIN YUUDAL DARDAARE

⁸ Yahoyaasin Yuudâ-malik yekke saaku, sanatak taban kee bacaarat yen. Sarrak Yarusalaamal sidiica alsa malikih suge. Kay ina Nacusta deqsitta barrak ten. Teetik abba Yarusalaamal yooboke Elnaatan deqsita numuk ten.

⁹ Yahoyaasin isi abbah raatat gexak, YALLAL dambi lem baahe.

¹⁰ Usuk malikih yen dabaanal, Baabelon-qaskar Yarusalaam fan gaaduh gexxeeh magaalat maro hayte. Too gaadu absissem, Baabelon-malikik teneeh; gabat akak absiisem, kay qaskar abbobtih yen marak ten.

¹¹ Qaskar magaala marot tabbixe saaku, Baabelon-malik isih wokke yemeete.

¹² Too waqdi Malik-Yahoyaasin kee, kay inaay kay buxal taamita-maraay kay doolat-abbobti kee kay qaskar-abbobti Baabelon malikil gaba yeceen. Baabelon-malikiy Nabkadnessar deqsita edde dardaare bacarhaytô-sanatat, Yahoyaasin casbit hee.

¹³ YALLI dumaak akah iyyeh suge innah, YALLIH Qibaadah-Qaril sugga 'te duyye kee malik-qarih-addal sugga 'te duyyek tu macabinnay weerra heeh bee. Duma Malik-Suleeman YALLIH Qibaadah-Qarih-addal heeh suge dahabak bicsen duyyek tu macabinnay iggillaay weerra heeh bee.

¹⁴ Yarusalaamal suggu 'ye marak abbobtih suge mara kee, qaskar-abbobti tittat seewah tabna alfih num bee. Gabâ-naggarinna luk yen mara kee, wohuk kalah tan gabâ-taamah ixxiga luk yen mara inkih seewah bee. Raqtem dibuk masaakiinah yan mara.

¹⁵ Yahoyaasin kee kay inaay kay agabuuy kay gubal doolat abbobtih yen mara kee Yuudal abbobtih yen marih agantah inkih seewah Yarusalaamak Baabelon fanah bee.

¹⁶ Tonnal, qaskarak malciina alfih num kee, taama nagay yaaxigeeh naggaarinna le marak alfi num Baabelon fan bee. Oson inkih masu le maray qaskariinot bicak ten.

¹⁷ Nabkadnessar, Yuudâ-malikih Yahoyaasinik-qammih-yan-numuy Mattanya deqsitahiyya hee. Migaq kaak korseeh Xidkiya kaak iyye.

XIDKIYA YUUDAL DARDAARE

¹⁸ Xidkiya malik yekke saaku, labaatanna kee koona karmat yen. Sarrak Yarusalaamal taban kee inki sanat malikih suge. Kay inak migaaqah Camutal axcuk yenen. Teetik abba Libna deqsitta magaalal yooboke Ermiyaas deqsita numuk ten.

¹⁹ Xidkiya Yahoyaakimik kaxxih, YALLAL dambi lem baahe.

²⁰ YALLI, Israayil kee Yuudah ummat yinqibeeh, ellecabol isi garik ken xiiriyeh. Xidkiya Baabelon malikiy Nabkadnessar deqsitahiyyah gubat xiinaanam cineh.