2 Malikwa 23 - NABUWWA KEE MALIKWA

YOOSIYAAHU GABAK BICSEN QIBAADAH-DUYYE BAYSE

¹ Sarra ta farmo yoobbe waqdi, Malik Yoosiyaahu, Yarusalaam kee Yuudâ rasuk abbobtih yan marah farmo ruube.

² Too mari yemeete waqdi, gabat ken luk YALLIH Qibaadah-Qari fan gexen. Ken lih seeka kee nabuwwaay, raqqa 'te ummatak gaddaliiy baacoyta axce'kal yakkeenimiik inkih tokke gexen. Too ummat inkih elle gaabowte ikkel malikii, a kitaabay YALLIH Qibaadah-Qaril geytimehiyyal yan yab keenih yikriye.

³ Sarrak malik elle soola qamiddih garil solla 'yeh, «YALLIH amri oggoluh, Yalla kee xagana culah an. Too kitaabal elle enna 'ta innal, YALLIH xinto kee amri inni afqado kee dudda haamal abeyyo» 'yaanam axcuk qahdi cule. Inkih tan ummatta kay lakal xagana culte.

⁴ Tohuk lakal malik kaxxa seekih yan Cilkiyya kee, kay gubal tan seeka kee, YALLIH Qibaadah-Qarih culmak afal dacayrih yen marak iyyeemih, «Gexay, YALLIH Qibaadah-Qarih addal tan duyyey Baqal kee Aseera akak iyyaanamay yallah loonuh qibaadah heenihiyya, wokkeh addak eyyeeqa. Cutuukah qibaadah heen duyye kaadu wokkek addak kala» iyye. Too duyye tokkek yeyyeeqen waqdi, beyya heenih, magaalak afal Kidroon deqsitta goloh addal gira edde ruuben. «Too girak raaqe gombod Beetal fan beya» iyye.

⁵ Qibaada elle aban aroocay fayyat raqtahiyyay Yuudâ-magaaloolih adda kee Yarusalaam garil geytimtahiyya elle suge maray, seekâ-gurral qerto ruubak sugehiyya, wokkek xiiriyeh. Kaak duma Yuudâ-malikwa, too mara, Baqal-akak-iyyan-duyyey yallah loonu kee, ayro kee alsa kee qaran-cutuukah seekâ-gurral qerto ruubaana'gidih, heenih sugen.

⁶ YALLIH Qibaadah-Qarih-addak, Aseera akak iyyaanamay say-yallah luk sugeenihiyyah-ceelo wokkek kaleh, magaalak afal Kidroon-Golo deqsitta goloh addal gira edde ruube. Too girah gombod sahda elle yaaguqen aracal caxe.

⁷ YALLIH Qibaadah-Qaril heen aroocay xiiqareh-xiinak-lab-mari elle sugehiyya wokkek kaleh. Agbi, Aseera akak iyyan say-yallah-qibaadah seeka edde gacta kameswa elle bicisak yenem, tokkek teneeh; too arac tokkek kaleh.

⁸ Yuudâ-magaaloolil sugga 'te seeka Yarusalaam fan baahe. Inkih tan Yuudah baaxol sugte mansafittey too seeka qerto elle ruubak sugtehiyya foyya keenik abe. Tonnah kaadu, magaalâ-xintoh abbah yen Yoosuwa xise culmak foocal hee qibaadah-aroocay magaala akak culan culmak gura le qaxak tenehiyya wokkek kaleh.

⁹ Too maray woo aroocal qerto ruubak sugehiyya, Yarusalaamal yen aracay YALLAH sadgat elle abaanahiyya aben taamat seeka lih angaluk manannoonu'mmay, kamiir-sinni-maaqo ken lih akamuk yenen.

¹⁰ Hinnom deqsitta goloh addal, yalla axcuk yaqbuden duyyeh qibaadah heen aracay Toofet deqsita foyya keenik abe. Toh keenik akah abem, too aracal duma Molok deqsitaamih sadgatah isinni xaylo girat qidak sugen. Toh elle abe waana'gidih, too arac foyya keenik abe.

¹¹ Tonnah kaadu, Yuudâ-malikwa ayrô-qibaadah hayteh sugte faroosa, elle sugte aracak kaleh. Gaariiray kaadu Yuudâ-malikwa ayrô-qibaadah heenih sugeenit gira ruube. A faaris kee gaariira elle sugtem, YALLIH Qibaadah-Qarih-daaratah akak culan afak ten. Tohum, Naatan-Melek deqsita numuy abbootan lehiyya qarik xayi aracak ten.

¹² Yuudâ-malikwa, Malik-Acad buxah amol hayteh sugte mansafittey xeet kee cooxuk bicsen duyyeh qibaada elle abak sugeenihiyya kaleh. Tonnah kaadu, Malik-Manasse qibaadah hee suge mansafittey YALLIH Qibaadah-Qarih namma daaratal sugtehiyya kaleh. Too mansafitte bututtukka heeh, riira keenik Kidroon deqsitta goloh addal qide.

¹³ Tonnah kaadu, Malik-Suleeman duma Yarusalaam magaalak ayrô-mawqal, Umaane-le-qale deqsitta qalek gabbi-qaxat raqta'kkel, ableh-uma duyyeeyah-qibaadah, axcihiiy, Sayda-marak-say-yallay Qastarot deqsitta kee, Mooyab-marih-yallay Kamos deqsita kee, Qammon-marih-yallay Milkom akak iyyaanah qibaadah heeh suge mansafitte foyya abe.

¹⁴ Yoosiyaahu taahirik tan qamidwa akak iyyan qamidway xeetik bicseenihiyya yiggiggileh. Aseera deqsittaamay yaqbudeenihiyyah astah heenih sugen gurumuuda yiggileh. Too duyyeeya elle sugte arac sahdayti lafoofit buule.

¹⁵ Yoosiyaahu, Nabát-Yarobqamay Israayil mara dambit asisehiyya, Beetal deqsita aracal, gabak bicsen duyyeh-ceelo elle yaqbudoonuh heeh suge arac kee sadgat elle aben mansaf yiggileh. Too duyyeh qibaadah aracay tokkel hee sugehiyya butukku heeh, xeet akak iggiggilla heeh, gomboduh gacissa hee. Aseera akak iyyan duyyey say-yallah luk sugeenihiyyah soolisen gurmuddat gira ruube.

¹⁶ Sarra wonna wagga hee waqdi, koomah amol kabaara yuble. Woo kabaarak lafoofi yeyyeeqeh tokkel suge mansafay sadgat elle abeenihiyyak amol cararise. Tonnah abak mansaf foyya keenik abe. Toh akkelem duma Yarobqam, too mansafal sadgat aba'gidih soolak suge waqdi, YALLI nabih afak kaak iyyeh suge. Sarrak Yoosiyaahu kaadu wonnah wagga hee waqdi, aham akkeleemit dumî dabaanal yaabe suge nabih kabri yuble.

¹⁷ Too waqdi, «Ah iyyin kabriiy?» iyye. Too waqdi kaa lih suge mari, «Amah, duma Yuudâ-rasuk yemeete nabiy a mansaf baysettoomut dumal elle yaabeh sugehiyyah kabri. Usuk ta saaku ta mansaf, elle bayissa hayte innal, baysettom, dumal elle warseh suge» iyyen.

¹⁸ Too waqdi malik, «Kay lafa num xage waay, kay kabri yanay 'xica» iyye. Usuk toh iyyek sa, kaa kee kaak kalah yan nabiy dabqih Samaariyal suggu 'yeeh kay garil yoogoqeenihiyyah kabri maxaginnoonuy yanay, iyyen.

¹⁹ Tohuk kalah kaadu, Yoosiyaahu, Israayil-malikwa Samaariyah rasuk magaaloolih addal, gabak bicsen duyye elle yaqbudoonuh bicsen arooca bayse. YALLIH naqbi too aroocat aban qibaadah sabbatah keenil oobak suge.

²⁰ Woo aroocal sugte mansafittel, seekâ-gurrah sadgatah baahan duyye gabal akak acayuk sugen mara inkih yusguudeeh, woo mansafittel sahda lafa cararise. Tohuk gaba kale waqdi, Yarusalaam fanah yuduure.

ELLE-TATRIYYI-QIIDIT ASEN

²¹ Malik-Yoosiyaahu, ummattak inkih, «YALLIH Qahdih-kitab elle inta innal, Elle-Tatriyyi-Qiid YALLAY sin Dageltah yani edde kassitak aba» 'yaanam iyye.

²² Too saaku aben Elle-Tatriyyi-Qiidih bis le qiid, Israayil kee Yuudâ rasu makaabon xiinisak ten saakuk wadir makkinna. Israayil-malikwa kee Yuudâ-malikwa edde reedisak yen wakti, too bis le qiidit maasinnon.

²³ Too qiid YALLIH massakaxxah abeenim, Yoosiyaahu malik edde yekke taban kee bacarhaytô karmak sugte.

²⁴ Kaxxa seekih yen Cilkiyya YALLIH Qibaadah-Qaril gee kitaabal yan yab abinal akah asa'nnah, Yoosiyaahu Yuudâ-baaxo kee Yarusalaam addal sugga 'te ginnilitteey kalluwalleey faal-abeenit kee, buxah addat aqbuduk sugen duyye kee, wohuk kalah tan duyyey yaqbudeenihiyya kee, umâ-yabuli enni intaamak tu macabinnay inkih kale.

²⁵ Kaak duma kay inna le malikiy Yalli-Muusal-oobise-kitab inxicca 'yam inkih abahiyya masuginnaay; usuk dudda haam kee niyak elli haamak isi Dagelta yuqbude. Kay lakal kaadu kay inna le malik magacinna.

²⁶ Takkay immay kaak dumal suge Manasse abeh suge dambik gexxaamah, YALLIH naqbi Yuudâ-maral oobeh sugeeh, maxabbacoowinna.

²⁷ Tohuk gexxaamah YALLI iyyeemih, «Duma Israayil-marak abba heem Yuudâ-marak abeyyo. Yuudâ-mara inni foocak kaleyyo. Yarusalaam-magaalay inni magaala akak exceh suge kee, Qibaadâ-Qariy yoo elle yaqbudoonuh doore excehiyya yim hinna» 'yaanam iyye.

YOOSIYAAHU RABA

²⁸ Wohuk kalah taniimiy Yoosiyaahu abba heehiyya Yuudâ-Malikwah-Aydaada deqsita kitaabih addal tan.

²⁹ Ayrok teena Masri malikiy migaaqah Nako deqsitak yenehiyya, Assuuriyah-malikih catoh, qaskar Fuurat-weeqaytu fanah ruube. Yoosiyaahu toh yuble waqdi, Magiddo deqsita aracal ken yayseede'gidih, keenih matre. Sarrak too qeebit edde rabe.

³⁰ Kay gubal yen mari kay ginaada faras-gaarit hayya heenih Yarusalaam fan been. Tokkel malik kee malik buxah mara edde yoogoqen *kabrit kaa yoogoqen. Yuudâ-mari kay baxa Yowaacad dooreeniih; Yarusalaamal malik yakke'gidih kaa yuskuten.

YOWAACAD YUUDAL DARDAARE

³¹ Yowaacad Yuudâ-malik yekke saaku, labaatanna kee sidooca sanatat yen. Yarusalaam magaalal sidiica alsa malikih suge. Kaak ina Camutal deqsitta barrak ten. Teetik abba Libna deqsitta magaalal yooboke Ermiyaas deqsita numuk ten.

³² Kay kaxxa abbobtik kaxxih, Yowaacad kaadu YALLAL dambi lem baahe.

³³ Nako deqsita Masri-malik xabba kaa heeh seewah kaa bee saaku, kay reeda gaba kalte. Malik-Nako Ribla deqsitta magaalay Camat-rasul geytintahiyyal casbit kaa hee. Nako Yuudâ-marak sidiica alfi kee affara boolih kiilo qado lakqok beeh, soddom kee affara kiilo dahabak gabbarah ken mekelsiise.

³⁴ Sarrak Malik-Nako, Yoosiyaahu-baxa-Elaakim kay abbah aracal malik abe. Migaq kaak korseeh Yahoyaakim kaak iyye. Yowaacad Masri fan beeh, sarrak tokkel rabe.

³⁵ Sarrak Yahoyaakim Masri malik keenik igdiya iyye gabbarah kulli numuk leh gidel lakqo gaaboysek lakal, too gabbara Masri-malikih yecee.

YAHOYAAKIM YUUDAL DARDAARE

³⁶ Yahoyaakim malik yekke saaku qumrik labaatanna kee koona karmat yen. Sarrak Yarusalaamal taban kee inki sanat malikih suge. Kay ina Dabudda deqsitak ten. Teetik abba Ruuma deqsitta magaalal yooboke Fadaaya deqsita numuk ten.

³⁷ Yahoyaakim isi kaxxa abbobtik kaxxih, YALLAL dambi lem baahak suge.