2 Malikwa 22 - NABUWWA KEE MALIKWA

YOOSIYAAHU YUUDAL DARDAARE

¹ Yoosiyaahu naharak malik yekke saaku bacra karmat yen. Soddom kee inki sanat Yarusalaamal malikih suge. Kay ina migaaqah Yadiida deqsitak ten. Teetik abba Boxkat deqsitta magaalal yoobokeeh; migaaqah Qadaaya deqsitak yen.

² Yoosiyaahu YALLI kicna taama abak yen. Isi kaxxa abba Dawuduk kaxxih, Yallih gita kataatak yeneeh, agaagul sinnim Yallih xinto intam abak yen.

CILKIYYA YALLIH AMRI EDDE YAN KITAB GEE

³ Yoosiyaahu malik edde yekke taban kee bacarhaytô sanatat, malik-buxal kutbe-abeenah suge Safan deqsita num, YALLIH Qibaadah-Qari fan farmoh ruube. Safan, Axalyaahu deqsita numuk baxak teneeh, Masullam deqsita numuk baxi baxak ten.

⁴ Farmoh kaah ruubeemih, «Kaxxa seekih yan Cilkiyya fan gexay, intaamah, ‹YALLIH Qibaadah-Qari akak culan culmal tan seeka, ummatak lakqok gaabossem kinnih gide esserra ken haay;

^5-6 too lakqo YALLIH Qibaadah-Qarik tiddigille arooca bicsa mara tamsiisa maral ucuya› keenik inxic. Too marak kaadu, ‹Ta lakqo qarit haan coox maraay, qari xisa mara kee, xeetik qarwa xiso yaaxige marih-cawalah ucuya. Tonnah kaadu ta lakqot, woo qarih bicsah faxxiima coox kee, oren xeet edde xaama› keenik inxic.

⁷ ‹Qari xisne absiisa mari yaaminen mara kinnuk, ken gabat tan lakqok loowoh faxxintam mali› Cilkiyyak inxic» 'yaanam farmoh kaal ruube.

⁸ Safan, malik kaal ruube farmo Cilkiyyah warseh. Too waqdi Cilkiyya, farmo-baahe-Safanak iyyeemih, «Yallih-xinto elle tan kitab, YALLIH Qibaadah-Qarih addal geeh; taway too kitab koo ayballayu waa» kaak iyye. Sarrak too kitab baaheh kaa yuybulleeh; Safan too kitab yikriyeh.

⁹ Tohuk lakal Safan malik fan yuduure. Too waqdi malikik iyyeemih, «Ku gubal yan mari, Qibaadâ Qaril sugte lakqo beenih, taama aba marih amo wagta maral yeceenih.

¹⁰ Tonna'mmay Cilkiyya yol yecee kitab gabat baaheeh, away gabat abbixe» kaak iyye. Sarrak kitaabal tanim fayya haak malikih yikriye.

¹¹ Malik, Yallih-xinto elle tan kitab iyyam yoobbe waqdi, hagga 'yeh wariggah saro isik qanxise.

¹² Sarrak Cilkiyya deqsita numuy seekih yeneey, Safan baxa Acikamaay, Miikayhu baxa Qakboruuy, malik buxal kutbe-abeh suge Safan kee, malik buxal malik faxaamih taamat yen Qasaaya deqsita numul amri oobise.

¹³ Keenik iyyeemih, «Gexay yoo kee inkih tan Yuudah ummatta tanim naaxige'gidih, YALLAL fayu yoh essera. A kitaabal taniimih maqna nagay ismitay ama. Ni kaxxa abbobti YALLI iyyeemiy a kitaabal tanihiyya abe weenimih sabbatah, YALLAK naqbi nee geeh yan» iyye.

¹⁴ Cilkiyya kee Acikam kee Qakboruuy, Safan kee Qasaaya tikka 'yeenih, Culda deqsitta barray nabih tenehiyyay, Yarusalaam magaalak qusbih xisen exxal buxa luk tenehiyya fan gexeeniih, fayu esseren. Tet baqli Sallum deqsitak yeneeh; kay abbak migaaqah Tikwa axcuk yenen. Kay abbah abba Carcas deqsitak yen. Sallum Yallih Qibaadah-Qaril edde gacan sartanak amo wagitak yen. Too mari ta-nabih-tan-barra fan yemeeteeh; malik keenil ruube farmo teetih warsen.

¹⁵ Too waqdi is keenik inteemih, «Malik fanah uduuraay, YALLAY Israayil doore Dagelta kinnihiyyak obtem kaah warisa.

¹⁶ ‹Yarusalaam kee teetil yan mara digaaleyyo. Ama kitaabay koh yikriyeenihiyya elle iyya'nnal, bala oobiseyyo› iyyah yan» inte.

¹⁷ «Kalah kaak intaanamahaa, ‹Toh akah abu waam, oson yoo cineeniih xeet kee cooxuk isinni gabak bicsen duyye yaqbuden. Anu inqibba haam aban. Yi naqbi Yarusalaamal oobeh ikkal, ahaysa maxamaca› 'yaanam iyye kaak inxica» inte.

¹⁸ Qagitteh, «Malik tiyah tu gactek, YALLAY Israayil doore Dagelta kinnihiyya kaak iyyaamah, ‹Atu a kitaabih yab oggolteeh,

¹⁹ toobitteeh, yoh isi nabsi rammisse. Yarusalaam kee Yarusalaam maral baahu waam toobbe waqdi, nadaamah sara isik qanxisseeh weqteh. Too waqdi abteh tan dooqa kok oggoleh. Yarusalaam tiyah tu gactek, Yarusalaam ableh-uma ceelot gacele. Sahda titta abaarta way, Yarusalaamat tekkem siinit takkay, akak inxicca 'ta umaane teetil baaheyyo.

²⁰ Takkay immay, Yarusalaam magaalat abu waah an digaala, atu addunyal tanim fanah, maaba. Atu tanim fanah ku baaxo amaanah xiineleeh; amaanah koo xiiniseyyo› 'yaanam YALLI kaak iyyem kaah warisa» 'yaanam farmoh keenil gacisse. Too mari too farmo luk malik fan yuduure.