2 Malikwa 21 - NABUWWA KEE MALIKWA

MANASSE YUUDAL DARDAARE

¹ Manasse malik yekke saaku qumrik taban kee namma karmat yen. Sarrak Yarusalaam magaalal kontom kee koona sanatah malikih suge. Kay ina migaaqah Cifxiba deqsitak ten.

² Manasse, Israayil-mari yamaateenik naharal woo baaxol suge maray YALLI yeyyeeqehiyya edde asak sugen umâ-yabulih-tan-taama kataateeh, YALLAL dambi lem baahe.

³ Kay abba Ciskiyyaahu bayseh suge aroocay diini-maleela qibaadah luk sugtehiyya wadir nammeyhaak xise. Baqal elle yaqbudeeni'gidih, sadgat elle aban arooca bicse. Kaak dumal Israayil-malikih yen Acab akah abe innah, migaaqah Aseera deqsittaamay yaqbudeenihiyyah astah heenih sugen gurmudda soolise. Manasse cutuuka kaadu edde aqbuduk yen.

⁴ YALLIH Qibaadah-Qarih addal, diini-maleela taqbude sadgat elle aban arooca bicse. Woo sadgat arooca elle bicsem, YALLI duma «Yarusalaamal yi qibaada elle takke'gidih doore» akak iyye aracak ten.

⁵ Qibaadâ-Qarih-gasok adda le kabuk namma daaratal inkih, cutuuka elle yaqbuden arac bicse.

⁶ Girat isi baxa sadgatah qide. Ramli-qidiyya kee sicri taamah haysiteeh; ginnili kee kalluwallel takku-waytam essere. YALLAL kaxxa dambi lem baaheeh; YALLIH naqbi kay sabbatah lafitak lafte.

⁷ Yallih Qibaadah-Qarih addal woo migaaqah Aseera deqsittaamay yaqbudeenihiyyah astah heeh suge gurmudda hee. Woo ceelo elle heem, YALLI Malik Dawud kee Suleemanak, «Yi qibaada kulli way elle takke'gidih, Israayil taban kee namma kedo elle tan rasuk inkih Yarusalaam addal doore araca» akak iyye aracak ten.

⁸ YALLI Dawud kee Suleemanak iyyemii, «Israayil mari inkih Muusay yi naqasuh yanih gabat keenih ruube amri oggoleenih too xinto intam abeenik, ken kaxxa abbobtih ecee baaxok ken mayyaaqa» 'yaanam iyye.

⁹ Takkay immay Manasse, Yuudâ-mara, duma woo baaxol suge maray YALLI ken taagah woo baaxok yeyyeeqehiyya abak suge dambik lafita dambit ken asise.

¹⁰ YALLI, nabuwway kay taamat tanih kabuuk keenik iyyemii,

¹¹ «Yuudâ-malikih yan Manasse gacca 'ta taamay Kanqaan mari abeemik kaxxam lafittahiyya abeeh; Yallih-aftok yaqbude duyyet, Yuudâ-mara kaadu Yalla-maleela edde gexxa gitat bee.

¹² Tonna-leemiik yoo YALLAY Israayil doore Dageltah yani, siinik axceemih, Yarusalaam kee Yuudâ-maral, yaabbu waa mari akak wariggitta iyyu waa bala ruubeyyo.

¹³ Samaariya kee Israayil-malikih yen Acab kee kay buxah mara akah digaale innah, anu sin kaadu digaaleyyo. Yarusalaam-magaala, teetil suge marak foyyah tet cabba heeyyo. Bagul sugtem akak duugeeniih deeriik afah korsen sacnih innah, foyyah tet cabba heeyyo.

¹⁴ Tahak raaqu waa marat darre cabeyyo; naqboytit gabal ken heeyyo. Woo mariiy qeebil keenik ayseleeh; yeddereenim keenik buubelon.

¹⁵ Anu inni marak toh abeyyooh; toh keenik akah abu waam, ken kaxxa abbobti Masrik tewqem kee akkeh fanah yol dambi lem baaheeniih; ken sabbatah yi bagcarra lafitak lafitte» keenik iyye.

¹⁶ Manasse, Yuudah-ummatta Yallih-gita cabba hayteh YALLAL dambi lem baahaanamat asise. Too dambik kalah kaadu ossotinah, Yarusalaam-gitittel qabal weeqi innah caxitam fan mango masaakiinay tu baahe wayte qide.

¹⁷ Wohuk kalah taniimiy Manasse abba heehiyyak dambiy edde asehiyyah agantah, Yuudâ-Malikwah-Aydaada deqsita kitaabih addal tan.

¹⁸ Manasse rabeeh; malik qarik bustaan aracay Quddâ-bustaan deqsitahiyyal kaa yoogoqen. Kay baxi kay aracal malik yekke. Kay migaq Amonuk ten.

AMON YUUDAL DARDAARE

¹⁹ Amon Yuudâ-malik yekke saaku labaatanna kee namma karmat yen. Yarusalaam magaalah addal namma sanatah malikih suge. Kay ina Masullemat deqsitta barrak ten. Teetik abba migaaqah Carus deqsitak yen. Elle yookokem, Yotba deqsitta magaalak ten.

²⁰ Amon isi abbah raatat gexak, YALLAL dambi lem baahe.

²¹ Abba abak sugem abeeh; kay abba aqbuduk suge xeet kee cooxuy gabak orra heenih bicseenihiyya kaak kaxxih yuqbude.

²² YALLAY usuk akak rade kay kaxxa abbobti doorehiyya cinna heeh usuk aba iyyam abam cineh.

²³ Amon gubal saqoltih yen mari kaa qidaamal malse. Too mari ayrok teena, malik isi buxal yan waqdi, amma 'yeenih kaa qiden.

²⁴ Yuudâ-mari kaa qide mara qideeniih; kay-baxa-Yoosiyaahu kay lakal malikih heen.

²⁵ Wohuk kalah taniimiy Amon abehiyya Yuudâ-Malikwah-Aydaada deqsita kitaabih addal tan.

²⁶ Amon rabe saaku, Quddâ-bustaanih addal yen kay kabrit kaa yoogoqen. Kay baxi Yoosiyaahu kay lakal malik yekke.