2 Malikwa 20 - NABUWWA KEE MALIKWA

CISKIYYAAHU BIYAAKAK ELLE URUSE'NNA

¹ Toh edde tekke uddurut, Malik Ciskiyyaahu kaxxa biyaakah biyaakite. Rabi kaat xayyooweh suge. Amox-baxi-nabi-Yasaqya kaal yemeeteeh kaak iyyemii, «YALLI, ‹Ahaysa rabi kot xayiih; ama lakimak murta'mmay, buxâ-mara farriimitay cab› kok iyyah yan» 'yaanam kaak iyye.

² Toh yoobbe waqdi, Ciskiyyaahu foocah gidaarat ufkunna 'yeh dooqa abe.

³ Dooqah iyyemii, «YALLAW, inni bagu kee afqadook ku qibaada kee ku taamat sugem atu yok taaxigeh. Ku garil meqem abittoh yok orobtaamat asak suge» 'yaanam dooqah inxicca 'yeeh, namma intik kaxxa ximo kaak akah caxitte weeqah weeqe.

⁴ Nabi Yasaqya kaak gexeh, Malik-Ciskiyyaahuh-buxah gasoh-afa gufe'kal yan waqdi, YALLIH qangara kaal obteeh,

⁵ «Malik Ciskiyyaahuy yi-ummattah amoytah yani fan uduuray kaak intaamah, ‹Yoo YALLAY ku kaxxa abbah yan Dawuduk Dagelta kinnihiyya atu abte dooqa kok oobbeeh, namma intik caxxe ximo kok uble. Koo uruseyyooh, sidiica ayroh addat woo yoo elle yaqbuden qari fan gexetto.

⁶ Taban kee koona sanat qumrik koh osisah an. Ahak sarra taban kee koona sanat sugetto. Carbik koo cateyyo. Ama magaala kaadu Assuuriyah malikih gabat radi mahaa. A magaala inni taaga kee inni naqasu Dawuduh cule qahdih sabbatah dacriseyyo kok iyyah yan› inxic» kaak iyye.

⁷ Yasaqya toh kaah warsek lakal, Malik Ciskiyyaahut dacayrih yan marak iyyemii, «Ama duddubay lehiyya kaak qaffoota'gidih, sublâ-xaylo utukka haay aruqta waqdi edde duuga; tonnal qaffootelek» iyye.

⁸ Sarrak Malik-Ciskiyyaahu nabi-Yasaqyak iyyemii, «YALLI sidiica ayrok lakal yoo urusem elle aaxagu waah, sidooca ayrok lakal kaadu YALLIH Qibaadah-Qari gexu duudeyyom innik elle aaxagu waam mannaay? Aham elle aaxige astah maca tan?» kaak iyye.

⁹ Yasaqya kaal gacsemii, «YALLI isih iyyem duuduselem elle taaxigu wayta asta koh aceelek; atu iraawo tabna maaqatta foocah gexxam kee tabna maaqatta wadir gexxaamak maca koh tayse?» kaak iyye.

¹⁰ Too waqdi Ciskiyyaahu, «Iraawo tabna maaqatta foocah gexxam sahalih taniimikih, tabna maaqatta wadir gacis» iyye.

¹¹ Too waqdi Yasaqya YALLA kallaceeh; YALLI, Malik-Acad bicse mawqeenal radda iraawo tabna-maaqatta wadirih akah taduure innah abe.

BAABELOONUK TEMEETE FARMOYTITTE

¹² Too dabaanal Baabelon-malikiy migaaqah Maroodak-Baldan deqsitahiyya Malik-Ciskiyyaahu lakmisam yoobbeeh; too waqdi yuktube warkat kee mattaco kaah ruube.

¹³ Ciskiyyaahu farmo elle ruuben mara arcibiseeh; sarrak duyye edde daanah haan makdanwa ken yuybulle. Too makdanwah addal lakqooy dahabaay caxâ-sifa kee qatrik suggu 'tem inkih ken yuybulle. Kalah kaadu, qaskar silaacih agantah tu cabe'kal ken yuybulle. Ciskiyyaahu isi qarih adda kee isi xintoh gubat taniimik ken aybulle wayya heem mali.

¹⁴ Sarrak nabi-Yasaqya Malik-Ciskiyyaahu fan yemeeteeh kaak iyyemii, «Too mari akak yemeetem ankeey? Kok iyyeenim macaay?» kaak iyye. Ciskiyyaahu kaak iyyemii, «Akak yemeeteenim, xer baaxoy Baabelon deqsittahiyya» iyye.

¹⁵ Nabi Yasaqya, «Hay, ku qarih addal abaluk sugeenim macaa?» kaak iyye. Too waqdi Ciskiyyaahu, «Yi qarih addal tanim inkih yubleeniih; duyye edde daanah haan kadnoonih addal taniimik ken aybulle wayya heem mayyu» kaak iyye.

¹⁶ Tohuk lakal Yasaqya kaak iyyemii, «Hay tonnal, YALLI kok iyyam koh warisu waa.

¹⁷ ‹Ku qarit duyyek enna 'tam kee, ku kaxxa abbobti a saaku fan gaabosse duyye inkih, Baabelon fan edde weeroonu waan wakti xayyooweeh; caboonu waanam malon.

¹⁸ Ku abuusay kok radu waahiyya seewah beeloonuuh; ken seelabba heenih Baabelon-malikih gasoh addal ken tamsiiselon.› Taham intam YALLA» kaak iyye.

¹⁹ Too waqdi Ciskiyyaahu iyyemii, «Ta way atu edde yabta YALLIH yab meqe yaaba» 'yaanam iyye. Toh akah iyyem, «Anu innih anim fanah baaxo amaan akkele» 'yaanam niyal hayya heeh iyye.

CISKIYYAAHU RABE

²⁰ Wohuk kalah taniimiy Ciskiyyaahu abba heehiyyaay kay agiirinnaay, lee raaqisa dora elle bicisseh, magaalah addal lee culsa'gidih lee edde obta gita boolô-bagul elle dage inna, Yuudâ-Malikwah-Aydaada deqsita kitaabih addal tan.

²¹ Ciskiyyaahu rabeeh kay aracal kay baxi malik yekke. Kay baxi migaaqah Manasse deqsitak yen.